Joe Hart បាននិយាយអំពីឥទ្ធិពល​​ចំពោះ​ផ្លូវចិត្ត​របស់គាត់ ពេល​ដែល​អ្នកចាត់ការក្លឹប Manchester City មិនជ្រើសយកគាត់។

អតីតអ្នកចាំទីជម្រើសជាតិអង់គ្លេស​វ័យ ៣៣ឆ្នាំរូបនេះ​ លែងក្លាយជាទីចាប់អារម្មណ៍ ក្រោមការដឹកនាំរបស់អ្នកចាត់ការសញ្ជាតិ​អេស្ប៉ាញរូបនេះ កាលពីឆ្នាំ២០១៦។ លោក Guardiola ពេញចិត្ត​អ្នកចាំទី Claudio Bravo ជាង Joe Hart ព្រោះគាត់យល់ថាមានការលេងផ្ដើមពីខាងក្រោមទៅ​មានផលល្អជាង​ចំពោះប្រព័ន្ធលេងរបស់គាត់។

Hart ដែលបច្ចុប្បន្ន​កំពុងលេងនៅ​ក្លឹប Burnley បានជជែកអំពីរឿងនេះជាមួយ​ព្រះអង្គម្ចាស់ William ក្នុងកម្មវិធីមួយ​ដែលមានឈ្មោះថា “កីឡាបាល់ទាត់ ព្រះអង្គម្ចាស់ William និងសុខភាព​ផ្លូវចិត្ត​របស់យើង” ដែលចាក់ផ្សាយ​តាម​ស្ថានីយ៍ទូរទស្សន៍ BBC One ។



Image may contain: 1 person

ពេលដែលព្រះអង្គម្ចាស់ William សួរថាតើហេតុការណ៍អ្វីដែល​បានធ្វើឱ្យប៉ះពាល់​ដល់ផ្លូវចិត្ត​គាត់​ខ្លាំងបំផុត​ក្នុងអាជីពរបស់គាត់ អ្នកចាំទីរូបនេះ​បានឆ្លើយថា៖ “ស្ដាប់ទៅហាក់ដូចជាគួរឱ្យអាណិត ប៉ុន្តែវាជាការពិត គឺការដែលលែងបានចូលលេង និងអារម្មណ៍​ដែល​លែងមានគេត្រូវការ”។

Hart បានបន្តទៀតថា មិនមែនលោក Guardiola មិនចូលចិត្ត​គាត់នោះទេ គ្រាន់តែគាត់មិនគ្រប់តាម​លក្ខខណ្ឌ​ដែលអ្នកចាត់ការរូបនេះចង់បានប៉ុណ្ណោះ។ ស្ថានភាពបច្ចុប្បន្ន​របស់គាត់​ក៏មិនសូវជាប្រសើរប៉ុន្មានដែរ ព្រោះគាត់ត្រូវប្រជែងយក​តួនាទី​អ្នកចាំទីជម្រើសទី១។ ទោះជាយ៉ាងនេះក្ដី អតីតអ្នកចាំទីដែលធ្លាប់ឈ្មះពានរង្វាន់ស្រោមដៃមាស ៤រដូវកាល​ក្នុងលីគ​កំពូលអង់គ្លេសរូបនេះ​មិនចុះចាញ់ស្ថានភាពនេះឡើយ៕

ប្រភព៖ BBC One