នុង​អំឡុងពេល​មាន​ផ្ទៃពោះ ស្រ្តីគ្រប់រូប​គឺ​ចាំបាច់​ត្រូវ​​តាមដាន​សុខភាព​ឱ្យបានទៀងទាត់​ ដើម្បី​ទទួល​ការណែនាំ​ល្អៗពី​គ្រូពេទ្យ អំពីការថែទាំ​ខ្លួនក្នុង​អំឡុងពេលមាន​ផ្ទៃពោះ ។រូបភាពទាកយកពី​Google

ក្នុង​អំឡុងពេល​មាន​ផ្ទៃពោះ ស្រ្តីគ្រប់រូប​គឺ​ចាំបាច់​ត្រូវ​​តាមដាន​សុខភាព​ឱ្យបានទៀងទាត់​ ដើម្បី​ទទួល​ការណែនាំ​ល្អៗពី​គ្រូពេទ្យ អំពីការថែទាំ​ខ្លួនក្នុង​អំឡុងពេលមាន​ផ្ទៃពោះ​​​ ពិសេស​ស្រ្តី​ទើបនឹង​មាន​ផ្ទៃពោះ​ជាលើកដំបូង​គួរ​យល់ដឹងអំពី​ការថែទាំសុខភាពម្តាយ ​និង​ទារក​។​

​សារព័ត៌មានខ្មែរណាស់ សូមលើកយកអត្ថប្រយោជន៍​នៃការតាមដាន​សុខភាព​​អំឡុងពេលមាន​ផ្ទៃពោះ ​ដែលនេះ​ជា​ចំណេះដឹងទូទៅងាយៗ​សម្រាប់​ស្រ្តី​មាន​ផ្ទៃពោះ ពិសេស​ស្រី្ត​ទើប​មាន​ផ្ទៃពោះ​ជា​លើក​ដំបូង ​ តាមរយៈកិច្ចសម្ភាសន៍ជាសំនួរចម្លើយជាមួយអ្នកស្រី ខេង សៀងហោ​​ ពេទ្យធ្មបនៅមន្ទីរពហុព្យាបាល និងសម្ភពសាកល។

នៅពេល​ដឹងថា មាន​ផ្ទៃពោះ ស្រ្តី​គួរតែមកមណ្ឌល​សុខភាព ឬមន្ទីរពេទ្យ​ដែល​មាននៅជិតផ្ទះ​បំផុត​ ដើម្បីធ្វើការតាមដាន​សុខភាព​​ពីគ្រូពេទ្យ​ខាង​ផ្នែក​សម្ភព​។រូបភាពទាញ​យកពី ​Google

ខ្មែរណាស់៖​តើ​ហេតុអ្វី​ត្រូវ​តាមដាន​សុខភាព​អំឡុងពេល​មាន​ផ្ទៃពោះ?​

អ្នកស្រី ខេង សៀងហោ៖​ ការ​តាម​ដាន​អំឡុងពេល​មានផ្ទៃពោះ ​គឺជា​ការណាត់ជួបរវាង​ស្រ្តីមានផ្ទៃពោះជាមួយ​គ្រូពេទ្យ ដើម្បីធ្វើការ​ពិនិត្យមើលសុខភាព​របស់ម្តា​យ និង​សុខភាព​របស់ទារក​។​

ជាទូទៅ ម៉ាក់ៗ នៅពេល​បាត់​រដូវ​ភ្លាម​ ម៉ាក់ៗគួរតែមកមណ្ឌល​សុខភាព ឬមន្ទីរពេទ្យ​ដែល​មាននៅជិតផ្ទះ​បំផុត​។​ ការពិនិត្យ​ផ្ទៃពោះ​ នឹងទទួលបាន​អត្ថប្រយោជន៍​ច្រើនពីលោកគ្រូអ្នកគ្រូពេទ្យ​ខាង​ផ្នែក​សម្ភព​។

អត្ថប្រយោជន៍ជាច្រើន​ដែលយើងទទួល​បានជាច្រើននោះ ចំណុចទី​១​ ទាក់ទងនឹង​សុខភាពរបស់ម្តាយ ​គឺ​លោកគ្រូអ្នកគ្រូ ​នឹង​ធ្វើការ​ពិនិត្យ​សម្ពាធឈាម វាស់កម្ពស់ ថ្លឹងគីឡូ​ ធ្វើការ​ពិនិត្យ​ចង្វាក់បេះដូង​កូន ធ្វើការ​ពិនិត្យ​សុខភាព​មិនប្រក្រតីជាមួយនឹង​ទម្រង់របស់កូន​ ដើម្បីមើល​ទម្រង់ក្បាល ឬទម្រងគូទរបស់កូន​ ហើយគ្រូពេទ្យ​នឹង​បូមឈាម​របស់ម៉ាក់​ដើម្បី​ធ្វើការ​ពិនិត្យ​រកមើលថាម៉ាក់មានបញ្ហា​ទាក់ទងជាមួយកង្វះ​គ្រាប់ឈាម​ក្រហម​ឬអត់។

ប្រសិនបើ ម៉ាក់ មានបញ្ហាជាមួយនឹង​ការ​កង្វះគ្រាប់ឈាមក្រហម គ្រូពេទ្យ​នឹង​​ឱ្យថ្នាំ​ទៅញ៉ាំបន្ថែម​ ដើម្បីបង្រ្គប់គ្រាប់ឈាមក្រហម​​ ព្រោះជាទូទៅ ម៉ាក់ៗ ចាប់​ផ្តើម​មានទម្ងន់​តែងតែមានអការៈចាញ់ ក្អូតចង្អោរ​ បញ្ហាទាំងអស់នោះហើយ ដែល​តែងតែធ្វើ​ឱ្យម៉ាក់​មាន​បញ្ហា​ស្លេកស្លាំង​ និងបញ្ហាទាក់ទងនឹងកង្វះ​គ្រាប់ឈាម​ក្រហម។​

​គ្រូពេទ្យ​នឹង​​ធ្វើការ​ពិនិត្យទឹកនោម ​ដើម្បីពិនិត្យរកបញ្ហា​ជំងឺទឹកនោម​ផ្អែម​ បញ្ហាទឹកនោម​ប្រៃ​ និង​ធ្វើការពិនិត្យ​រកមើល​បញ្ហា​ជំងឺឆ្លង​។​

​ទាក់ទងនឹងសុខភាពរបស់ទារក​ គឺគ្រូពេទ្យ​នឹង​​ពិនិត្យ​ដោយ​ឆ្លុះអេកូ​ ដើម្បី​ពិនិត្យ​រក​មើល​ការ​លូតលាស់របស់ទារក​ថាគ្រប់លក្ខណៈឬអត់​ ពិនិត្យមើលបញ្ហា​ទង់សុក​ ពិនិត្យ​បញ្ហា​ទឹក​ភ្លោះ​ ធ្វើការពិនិត្យ​មើល​ចង្វាក់បេះដូង​កូនថាតើ​ចង្វាក់បេះដូងកូន​ដើរញាប់ឬខ្សោយ​?​

ទាក់ទង​នឹងការ​ទទួល​បាន​បន្ថែមថ្នាំ​​គ្រាប់ជាតិ​ដែក​យ៉ាង​ហោចណាស់៩០គ្រាប់ ​និង​ទទួល​បានថ្នាំ​តេតានុសពីរដង​ក្នុងអំឡុងពេល​មាន​ផ្ទៃពោះ​។

ខ្មែរណាស់៖ តើ​​ស្ត្រី​គួរទទួល​បានការអប់រំ​អ្វី​ខ្លះ អំឡុងពេល​មាន​ផ្ទៃពោះ​?

អ្នកស្រី ខេង សៀងហោ៖ ការ​អប់រំ​សុខភាព​ម្តាយ​ក្នុង​អំឡុងពេលមានផ្ទៃពោះ គឺទាក់ទង​នឹងរបរអាហារ​។ ម៉ាក់ៗគួរតែញុំាអាហារ​ដែល​សម្បូរទៅ​ដោយ​ជីវជាតិដែល​មាន​សារធាតុបំប៉ន់​ដល់ម្តាយ​និង​ទារក​ក្នុង​ផ្ទៃ។ ​ទាំងអស់នេះ គឺវាមាននៅក្នុង​ជាតិដែក​ អាស៊ីត​ហ្វូលីត​ កាល់ស្យូម​ ស័ង្គសី​​​​ វីតាមីនស៊ី សារធាតុ​ទាំងអស់នេះវាមាននៅក្នុងបន្លែផ្លៃ​ឈើពណ៌បៃតង សុតមាន់ទា សាច់ ទឹក​ដោះគោ និងគ្រាប់ធុញ្ញជាតិជាដើម​។​

ទាកទង់ជាមួយ​អាហារគួរចៀសវាង​ ដូចជា ស្រា បារី គ្រឿងញៀន ថ្នាំ​បុរាណខ្មែរ ដែល​អាហារ​ទាំងអស់នេះមាន​ផល​ប៉ះពាល់​ដល់ម្តាយ ​និង​ទារកក្នុង​ផ្ទៃ​។ ម៉ាក់គួរតែ​ញុំាទឹក​យ៉ាងណាស់​ក្នុង​១ថ្ងៃ​​ឱ្យបាន ​២ ទៅ ៣លីត្រ ដើម្បី​ទ្រទ្រង់ដល់​សារពាង្គកាយ​របស់ម្តាយ​។

ខ្មែរណាស់​៖ តើស្រ្តី​មាន​ផ្ទៃពោះ​ត្រូវ​ដឹងចំណុចគ្រោះ​ថ្នាក់អ្វី​ខ្លះ?​

អ្នកស្រី ខេង សៀងហោ៖ ចំណុច​មួយ​ទៀត ម៉ាក់ៗគួរ​យល់ដឹង​ក្នុងសញ្ញាគ្រោះថា្នក់​ក្នុង​អំឡុងពេល​មានផ្ទៃពោះ​ ព្រោះជាទូទៅ ក្នុង​អំឡុងពេលមានផ្ទៃពោះ តែងតែមានសញ្ញាគ្រោះថា្នក់​ជាច្រើន​ដែល​ម៉ាក់​គួរតែយល់ដឹង​។ សញ្ញាទាំងអស់នោះ មាន​ដូចជា គ្រុនក្តៅ មានហើមដៃជើង​ ស្រវំាង​ភ្នែក​ ឈឺក្បាលវិលមុខ មានការជ្រាបទឹក​ភ្លោះ​ មាន​ធ្លាក់​ឈាម​តិច​ៗ​តាម​ទ្វាមាស​ មានការបម្រាស់ខ្សោយ​។ ប្រសិន​បើម៉ាក់ៗ​មានរោគសញ្ញាណាមួ​យ ​ក្នុង​ចំណោម​រោគសញ្ញាទាំងអស់នោះ ម៉ាក់ៗគួរតែប្រញាប់​មកមន្ទីរពេទ្យ ឬមណ្ឌលសុខភាព​ដែល​នៅ​ជិត​ផ្ទះ​បំផុត​។​

មន្ទីរពហុព្យាបាល និង​សម្ពព សាកល មាន​សេវាកម្មជាច្រើន​ទាក់ទងនឹង​ផ្នែកជំងឺទូទៅ ផ្នែកកុមារ និង​មនុស្សចាស់​ រោគស្រ្តី​។ ផ្នែក​សម្ពព​ មានសេវាកម្ម​សម្រាល​ដោយធម្មជាតិ សម្រាល​ដោយ​​វះកាត់ និង​ផ្នែក​វះកាត់ទូទៅ។

ទីតាំង​មន្ទីរពហុព្យាបាល​យើង​ខ្ញុំ​ ស្ថិតនៅ​ភូមិក្រពើហារ សង្កាត់ព្រាំ​ឫស្សី​ ក្រុង​តាខ្មៅ ខេត្ត​កណ្តាល​៕