ប្រទេសជប៉ុននឹងតម្រូវធ្វើឱ្យតេស្ដកូវីដ១៩លើអ្នកដំណើរមកពីប្រទេសចិនដីគោកចាប់ពីថ្ងៃទី៣០ខែធ្នូនេះ នេះបើតាមការប្រកាសពីនាយករដ្ឋមន្រ្តីជប៉ុនលោក Fumio Kishida នៅថ្ងៃអង្គារនេះ ហើយត្រូវបានចុះផ្សាយដោយទីភ្នាក់ងារសារព័ត៌មានAFP។

រដ្ឋាភិបាលជប៉ុនបានបន្ធូរបន្ថយវិធានការតឹងរឹងរបស់ខ្លួនលើអ្នកដំណើរទេសចរកាលពីប៉ុន្មានខែមុនថ្មីៗនេះ ដូច្នេះគោលការណ៍ថ្មីនេះ គឺមានន័យថា អ្នកដំណើរមកពីប្រទេសចិន នឹងក្លាយជាអ្នកទេសចរតែមួយគត់ដែលតម្រូវឱ្យធ្វើតេស្ដរកកូវីដ១៩ បន្ទាប់ពីធ្វើដំណើរមកដល់ទឹកដីជប៉ុន ថ្វីត្បិតមិនបង្ហាញរោគសញ្ញាក្ដី។

នាយករដ្ឋមន្រ្តីជប៉ុនបានលើកឡើងថា មានព័ត៌មានដែលថា ការឆ្លងកូវីដ គឺកំពុងរីករាលដាលយ៉ាងឆាប់រហ័សនៅក្នុងប្រទេសចិន ហើយ​វា​ពិបាក​ក្នុង​ការ​បញ្ជាក់​ពី​ស្ថានភាពឱ្យបាន​ច្បាស់លាស់​ ដោយសារមាន​ភាព​ខុស​គ្នា​យ៉ាង​ខ្លាំង​រវាង​អាជ្ញាធរ​ថ្នាក់កណ្តាល និង​មូលដ្ឋាន និង​រវាង​រដ្ឋាភិបាល និង​វិស័យ​ឯកជននៅចិន​ ហើយនេះ​ជា​ការ​បង្ក​ការ​ព្រួយ​បារម្ភ​កាន់​តែ​ខ្លាំង​ឡើង​នៅ​ប្រទេស​ជប៉ុន។

ការសម្រេចរបស់ជប៉ុននេះបានកើតឡើង បន្ទាប់ពីទីក្រុងប៉េកាំងបានប្រកាសថា អ្នកធ្វើដំណើរចូលចិន នឹងមិនតម្រូវឱ្យដាក់នៅដាច់ពីគេចាប់ពីថ្ងៃទី៨មករា ខណៈប្រទេសចិនបានលុបចោលការរឹតត្បិតយ៉ាងតឹងរឹងលើការគ្រប់គ្រងកូវីដជាបន្តបន្ទាប់ ក្រោយពីមានការតវ៉ាទូទាំងប្រទេស ហើយកំពុងធ្វើឱ្យមានការកើនឡើងនៃការឆ្លងដែលមិនធ្លាប់មានពីមុនមក។
លោក Fumio Kishida បានបញ្ជាក់ថា អ្នកធ្វើដំណើរមកពីប្រទេសចិនដីគោក ឬបានទៅចិនក្នុងរយៈពេល៧ថ្ងៃ នឹងត្រូវធ្វើតេស្តនៅពេលមកដល់ប្រទេសជប៉ុនចាប់ពីថ្ងៃសុក្រ ហើយអ្នក​ដែល​ធ្វើ​តេស្ត​វិជ្ជមាន​ នឹង​ត្រូវ​ដាក់​ឱ្យ​នៅ​ដាច់​ដោយ​ឡែក​រយៈពេល​៧ថ្ងៃ​នៅ​កន្លែង​ដែល​បាន​កំណត់។
លោកក៏បានបញ្ជាក់ថា ជប៉ុនក៏នឹងកាត់បន្ថយជើងហោះហើមកពីប្រទេសចិនដីគោកដែរ។ ប្រទេសជប៉ុនបានបើកដំណើរការឡើងវិញទាំងស្រុងសម្រាប់ទទួលភ្ញៀវទេសចរនៅក្នុងខែតុលា បន្ទាប់ពីការរឹតបន្តឹងអស់រយៈពេល២ឆ្នាំកន្លះ ដែលធ្វើឱ្យបាត់បង់ស្ទើរទាំងអស់នៃអ្នកដំណើរបរទេស៕