Kulara Water ទទួលបានពានរង្វាន់ទាំង២នោះ រួមមានពានរង្វាន់ «ភាពជាអ្នកដឹកនាំបៃតង-Green Leadership» និង ពានរង្វាន់«ភាពជាអ្នកដឹកនាំអាជីវកម្មប្រកបដោយការទទួលខុសត្រូវ-Responsible Business Leadership» ដែលបានផ្តល់កាលពីថ្ងៃទី២១ ខែកក្កដា ឆ្នាំ២០២២។រូបភាព៖​ផ្តល់​ដោយ Kulara Water

ក្រុម​ហ៊ុន​ Kulara ​Water ​(គូឡារ៉ា វ៉ធើរ)​ ជា​ក្រុម​ហ៊ុន​ផលិត​ទឹក​រ៉ែ​ធម្ម​ជាតិ​ អូ គូលែន​ ឈាន​មុខគេ​នៅ​កម្ពុជា​ បាន​ប្តេជ្ញា​ចិត្ត​បន្ត​អភិវឌ្ឍប្រកប​ដោយ​ចីរភាព ​និង​ទំនួល​ខុសត្រូវ​សង្គម​បន្ទាប់​ពី​ឈ្នះ​ពាន​រង្វាន់​ថ្មី​ចំនួន​២ ​សម្រាប់​ជា​ការ​​ផ្តល់​កត្តិយស​ដល់ ​គូឡារ៉ា វ៉ធើរ ​នៃ​កិច្ច​ខិត​ខំប្រឹង​ប្រែង​ចូល​អភិវឌ្ឍន៍​បៃតង​ក្នុង​ជីវកម្ម​ជិត​១​ទសវត្ស​រ៍​នៅ​កម្ពុជា​។​

កម្មវិធី​ពានរង្វាន់សហគ្រាសទទួលខុសត្រូវអាស៊ី(AREA)​ឆ្នាំ​២០២២​ដែល​រៀបចំដោយ​អង្គការ​ Enterprise Asia ត្រូវ​បាន​បង្កើត​ឡើង​ក្នុង​គោល​បំណងដើម្បី​​លើកកម្ពស់ភាពជាសហគ្រិនដែលមានទំនួលខុសត្រូវ និងលើកទឹកចិត្តឱ្យក្រុមហ៊ុនចូលរួមក្នុងទំនួលខុសត្រូវរបស់ពួកគេ។

ក្រុមហ៊ុន Kulara Water បានដាំដើមឈើកម្របានជាង ១០ម៉ឺនដើមចាប់តាំងពីឆ្នាំ២០១៨មក។រូបភាព៖​ផ្តល់​ដោយ​ Kulara Water

លោកបណ្ឌិត Jacques Marcille នាយកប្រតិបត្តិ និងជាសហស្ថាបនិក Kulara Water ប្រាប់ខ្មែរណាស់តាម​សារអេឡិចត្រូនិក​នៅ​ថ្ងៃចន្ទថា ពានរង្វាន់ទាំង២នោះ ដែល Kulara Water ទទួល​បាន​​ រួមមានពានរង្វាន់ «ភាពជាអ្នកដឹកនាំបៃតង-Green Leadership» និង ពានរង្វាន់«ភាពជាអ្នកដឹកនាំអាជីវកម្មប្រកបដោយការទទួលខុសត្រូវ-Responsible Business Leadership» ដែល​បានផ្តល់​កាលពី​ថ្ងៃទី២១ ខែកក្កដា ឆ្នាំ​២០២២។

ពានរង្វាន់«ភាពជាអ្នកដឹកនាំបៃតង»ផ្តល់​ឱ្យ​ Kulara Water ទៅលើ​កម្មវិធីដាំដើមឈើឡើងវិញ និងការដាំឡើងវិញនូវប្រភេទដើមឈើដែលគំរាមកំហែងជិត​ផុតពូជដែល​បានចាប់ផ្តើមនៅឆ្នាំ ២០១៨ ក្នុង​ភាពជាដៃគូឈានមុខគេជាមួយអង្គការមូលនិធិបុរាណវិទ្យា និងអភិវឌ្ឍន៍ (ADF)។

កម្មវិធីដ៏មានមហិច្ឆិតារបស់ Kulara Water នេះបានដាំដើមឈើកម្របានជិត ១០ ៣០០០ ដើម ក្នុងរយៈពេលប្រហែល​ ៤ឆ្នាំ ក្នុង​នោះ​ ឈើ​ ៩ ១៣៦ដើម បាន​ដាំលើផ្ទៃ​ដី ៤០,៥ហិកតាក្នុងតំបន់អភិរក្សរបស់ Kulara Water និងឈើ ៩២ ៩៣៥ដើម ត្រូវ​បានដាំ​ក្នុងឧទ្យានជាតិភ្នំគូលែន។

កម្មវិធីនេះក៏​បានរួមបញ្ចូលនូវសកម្មភាពលើកកម្ពស់ការយល់ដឹងដល់យុវជនជំនាន់ក្រោយអំពីការការពារបរិស្ថាន និងធនធានធម្មជាតិ ដោយមានការចូលរួមពីកុមារជិត ៦០០នាក់ មកពីសាលាបឋមសិក្សាចំនួន៣ ព្រមទាំងលោកគ្រូ អ្នកគ្រូចំនួន ២០នាក់ បានផ្តល់ជាប្រយោជន៍ផ្ទាល់ដល់ប្រជាពលរដ្ឋចំនួន ៤៣០គ្រួសារ និង អ្នកភូមិចំនួន ២ ១០០នាក់នៅតំបន់ភ្នំគូលែន។

បន្ទះស្រូបពន្លឺព្រះអាទិត្យជិត ៦ ៥០០ m2 ត្រូវបានដំឡើងដែល​មាន​សមត្ថភាពផលិតថាមពលបៃតងសរុប ៦៥០ kWp សម្រាប់ប្រើប្រាស់​នៅក្នុង​ក្រុមហ៊ុន​ Kulara Water។ រូបភាព៖​ផ្តល់​ដោយ​ Kulara Water

រីឯ ពានរង្វាន់«ភាពជាអ្នកដឹកនាំអាជីវកម្មប្រកបដោយការទទួលខុសត្រូវ»របស់ AREA បាន​ផ្តល់កិត្តិយសដល់ដំណើរជីវិតអាជីពនៃការប្តេជ្ញាចិត្តរបស់បណ្ឌិត Jacques Marcille នាយកប្រតិបត្តិ និងជាសហស្ថាបនិក Kulara Water រួមទាំង​ លោក Bernard Forey ផងដែរ។​

ដោយសហប្រតិបត្តិការឈានមុខជាមួយក្រុមហ៊ុន TotalEnergies ក្រុមហ៊ុន Kulara Water កំពុងវិវឌ្ឍន៍ខ្លួនទៅអនាគតជាមួយនឹងមហិច្ឆតាជាថ្មីទាក់ទងនិងស្វ័យភាពថាមពល ការកាត់បន្ថយដានកាបូន ការអភិវឌ្ឍន៍ប្រកបដោយចីរភាព ទំនួលខុសត្រូវសង្គម និងកំណើនក្រុមហ៊ុន។

បន្ទះស្រូបពន្លឺព្រះអាទិត្យជិត ៦ ៥០០ m2 ត្រូវបានដំឡើង សម្រាប់សមត្ថភាពផលិតថាមពលបៃតងសរុប ៦៥០ kWp នៅនឹងកន្លែង និង​កសិដ្ឋានបន្ទះស្រូបពន្លឺព្រះអាទិត្យក៏ត្រូវបានភ្ជាប់ទៅប្រព័ន្ធអាគុយផ្ទុកថាមពល ៨៩៦ kW ដែល​ប្រព័ន្ធនេះដំណើរការតាំងពីខែមករា ឆ្នាំ ២០២២។





នាំ​មុខនៅក្នុងទីផ្សារទឹករ៉ែធម្មជាតិ ក្រុមហ៊ុន Kulara Water បន្តកំណើនរបស់ខ្លួនដោយផ្អែកលើនុវត្តភាព និងទំនួលខុសត្រូវសង្គមជាកត្តាជំរុញដ៏សំខាន់នៃការអភិវឌ្ឍន៍។រូបភាព៖​ផ្តល់​ដោយ​ Kulara Water

លោកបណ្ឌិត Jacques Marcille បាន​ឱ្យដឹងថា ក្រុមហ៊ុនបានប្តេជ្ញាចិត្តចាប់តាំងពីការចាប់ផ្តើមរបស់ខ្លួនទៅកាន់គោលដៅនៃកំណើនប្រកបដោយនិរន្តរភាព ទើបតែបានបំពាក់រោងចក្រផលិតទឹករ៉ែធម្មជាតិរបស់ខ្លួននៅជើងភ្នំគូលែនជាមួយនឹងប្រព័ន្ធព្រះអាទិត្យកូនកាត់ដែលធានានូវឯករាជ្យភាពថាមពលរបស់ខ្លួន។

លោកថ្លែងទៀតថា៖«ប្រព័ន្ធប្រកបដោយភាពច្នៃប្រឌិតនេះ ដែលត្រូវបានរចនា ដំឡើង និងដំណើរការដោយក្រុមហ៊ុនTotalEnergies គឺជាប្រព័ន្ធដំបូងគេក្នុងប្រទេសកម្ពុជា។ Kulara Water បាន​អនុវត្តអាជីវកម្មត្រូវបានផ្សារភ្ជាប់យ៉ាងជិតស្និទ្ធទៅនឹងឧត្តមភាព ទំនួលខុសត្រូវសង្គម និង សមធម៌ ហើយមានបំណងជំរុញអ្នកដើរតួក្នុងតំបន់ផ្សេងទៀតអោយអនុវត្តអាជីវកម្មប្រកបដោយនិរន្តរភាព ដើម្បីផ្តល់ជាប្រយោជន៍ដល់មនុស្សជាតិចំនួនច្រើនបំផុត»។

ក្រុមការងារ Kulara Water បានប្តេជ្ញាចិត្តក្នុងការបន្តជារៀងរាល់ថ្ងៃនូវមហិច្ឆតាដ៏រឹងមាំក្នុងការ «បង្កើត និង ជួយ» របស់លោក Bernard Forey ស្ថាបនិកក្រុមហ៊ុន និងក្រុមហ៊ុនធំៗផ្សេងទៀតនៅជុំវិញពិភពលោក។រូបភាព៖ផ្តល់ដោយ Kulara Water

ទឹករ៉ែធម្មជាតិ ម៉ាក អូ គូលែន គឺជាទឹករ៉ែធម្មជាតិដំបូងគេរបស់កម្ពុជាដែលទាញយកប្រភពរបស់វាពីភ្នំដ៏ពិសិដ្ឋបំផុតរបស់ប្រទេសកម្ពុជាត្រូវបានដាក់ឱ្យដំណើរការក្នុងឆ្នាំ២០១៣។

កាលពី​ឆ្នាំ ២០១៩ ក្រុមហ៊ុន Kulara Water បានឈ្នះពានរង្វាន់​អាជីវកម្ម​ដែល​មានការ​ទទួលខុស​ត្រូវ​សង្គម(CSR)លើកទី១​ពីសភាពាណិជ្ជកម្ម​អឺរ៉ុប ​និង​ពានរង្វាន់​សហគ្រាសដែលមានទំនួលខុសត្រូវអាស៊ី(Asia Responsible Enterprise Awards)លើ​ការវិនិយោគលើមនុស្សនៅ​ឆ្នាំ​២០២០។

ក្រៅពីក្រុមហ៊ុន Kulara Water កម្មវិធី​ពានរង្វាន់សហគ្រាសទទួលខុសត្រូវអាស៊ី(AREA)​ឆ្នាំ​២០២២ ក៏បាន​ផ្តល់ពានរង្វាន់​ដល់ក្រុមហ៊ុន​វិនិយោគនៅកម្ពុជា​ចំនូន ២ ផ្សេងទៀត។

រួមមាន ក្រុមហ៊ុន Prince​ Holding ​Group ទទួលបាន​ពានរង្វាន់​សហគ្រាស​ទទួល​ខុស​ត្រូវ​អាស៊ី ​(AREA) ក្រោម​កម្មវិធី​អាហា​រូបករណ៍ ​Chen Zhi ​របស់ ​Prince Foundation និង​ក្រុមហ៊ុន​ Speedwind ឈ្នះពានរង្វាន់សហគ្រាសដែលមានទំនួលខុសត្រូវអាស៊ីសម្រាប់គំនិតផ្តួចផ្តើម ភាព​ទំនួលខុសត្រូវសង្គម​(CSR)នៃកម្មវិធី Giving with Heart»របស់ខ្លួន៕