ធនាគារ SME កាលពីថ្ងៃទី១៦ ខែមិថុនា ឆ្នាំ២០២២ បានចុះហត្ថលេខាលើអនុស្សរណៈយោគយល់គ្នាជាមួយគ្រឹះស្ថានហិរញ្ញវត្ថុចំនួន ១៩ ដើម្បីអនុវត្តគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍។រូបភាព៖ ធនាគារ​ SME

ធនាគារ​សហគ្រាស​ធុន​តូច​ និង​មធ្យម​កម្ពុជា​(SME Bank) ​និង​គ្រឹះ​ស្ថាន​ហិរញ្ញ​វត្ថុ​ (PFIs)​ ជាដៃគូ​ចំនួន​១៩ បាន​ប្រកាស​ចាប់​ផ្តើម​ទទួល​សំណើ​សុំ​ឥណទាន​ក្រោម​គម្រោង​សហ​ហិរញ្ញប្ប​ទាន​ស្តារ​ និង​ជំរុញ​កំណើន​ក្នុង​វិស័យ​ទេសចរណ៍​ចាប់​ពី​ថ្ងៃ​ទី១​ ខែកក្កដា ​ឆ្នាំ២០២២ ​តទៅ​។​នេះ​បើ​តាម​សេចក្តី​ប្រកាស​ព័ត៌មាន​របស់​ធនាគារ​ SME ​បាន​ផ្សាយ​កាល​ពី​ថ្ងៃ​សុក្រ​។

សេចក្តី​ប្រកាស​ព័ត៌មាន​បន្ត​ថា​ ការ​ប្រកាស​ផ្តល់​កម្ចី​ដល់​វិស័យ​ទេសចរណ៍​នេះ ​ត្រូវ​បាន​ធ្វើឡើង​បន្ទាប់​ពី ​លោក​ អូន​ ព័ន្ធ​មុនី​រ័ត្ន​ ឧបនាយក​រដ្ឋ​មន្ត្រី​ រដ្ឋ​មន្ត្រី​ក្រសួង​សេដ្ឋកិច្ច​ និង​ហិរញ្ញវត្ថុ​ និង​ជា​ប្រធាន​គណៈ​កម្មាធិការ​ជាតិ​អភិវឌ្ឍន៍​ទេសចរណ៍ ​នៅថ្ងៃ​ទី​១៧​ ខែ​ឧសភា ​ឆ្នាំ​២០២២ ​បាន​សម្ពោធ​ដាក់​ឲ្យ​ដំណើរ​ការ​«គម្រោង​សហ​ហិរញ្ញប្ប​ទាន​ស្តារ​វិស័យ​ទេសចរណ៍»​ ជាមួយ​នឹង​គម្រោង​ថវិកា​សរុប​ចំនួន​ ១៥០​ លាន​ដុល្លារ​។

សេចក្តី​ប្រកាស​ព័ត៌មាន ​បន្ថែម​ថា​ ក្នុង​ចំណោម​ថវិកា​ ១៥០​លាន​ដុល្លារ​គឺ ​ថវិកា​បដិភាគ​របស់​រាជ​រដ្ឋាភិបាល​ចំនួន​ ៧៥​លាន​ដុល្លារ​តាម​រយៈ​ធនាគារ ​SME ​និង​ថវិកា​បដិភាគ​របស់​គ្រឹះ​ស្ថាន​ហិរញ្ញ​វត្ថុ​ទាំង​១៩​ចំនួន​ ៧៥​លាន​ដុល្លារ​។

លោក ​លឹម​ អូន​ អគ្គ​នាយក​នៃ​ធនាគារ​ SME​(ឆ្វេង) បាន​ចុះហត្ថលេខា​លើអនុស្សរណយោគយល់ជាមួយ លោក អ៊ិន ចាន់នី ប្រធាននាយក​ប្រតិបត្តិ ធនាគារ អេស៊ីលីដា(ស្តាំ)។រូបភាព៖ SME Bank

លោក ​លឹម​ អូន​ អគ្គ​នាយក​នៃ​ធនាគារ​ SME​ បាន​ថ្លែង​ថា ​ម្ចាស់​អាជីវកម្ម​ក្នុង​វិស័យ​ទេស​ចរណ៍​អាច​ចាប់​ផ្តើម​ស្នើ​សុំ​កម្ចី​ដែល​មាន​ទំហំ​រហូត​ដល់ ​៤០០​ ០០០​ដុល្លារ ​ឬ​សម​មូល​ជា​ប្រាក់​រៀល ​នូវ​អត្រាការ​ប្រាក់​ទាប​ត្រឹម​តែ ​៦.៥% ​ក្នុង​មួយ​ឆ្នាំ ​និង​រយៈពេល​ឥណទាន​រហូត​ដល់ ​៧ ឆ្នាំ​ ហើយ​រយៈ​ពេល​អនុ​គ្រោះ​បង់​ប្រាក់​ដើម​រហូត​ដល់ ​១២​ខែ​។

លោក​ថ្លែង​ដូច្នេះ​ថា​៖«​ឥណទាន​ត្រូវ​បាន​អនុញ្ញាត​ឲ្យ​ប្រើប្រាស់​ក្នុង​គោល​បំណង​ស្តារ​ប្រតិបត្តិ​ការ​អាជីវ​កម្ម​ឡើង​វិញ​ ការ​កែលម្អ ​និង​ធ្វើ​ទំនើប​កម្ម​ ការ​ពង្រីក​ខ្លួន​បន្ថែម​ និង​ធ្វើ​ពិពិធ​កម្ម​សេវា​ទេសចរណ៍ ​ដើម្បី​ត្រៀម​ខ្លួន​ទទួល​ភ្ញៀវ​ទេសចរណ៍​ជាតិ​ និង​អន្តរជាតិ​»។

ធនាគារ ​SME ​កាល​ពី​ថ្ងៃ​ទី​១៦​ ខែ​មិថុនា ​ឆ្នាំ២០២២ ​បាន​ចុះ​ហត្ថ​លេខា​លើ​អនុស្សរណៈ​យោគ​យល់​គ្នា​ជា​មួយ​គ្រឹះ​ស្ថាន​ហិរញ្ញ​វត្ថុ​ចំនួន​ ១៩​ ដើម្បី​អនុវត្ត​គម្រោង​សហ​ហិរញ្ញប្ប​ទាន​ស្តារ​ និង​ជំរុញ​កំណើន​ក្នុង​វិស័យ​ទេសចរណ៍​។

គ្រឹះ​ស្ថាន​ហិរញ្ញ​វត្ថុ​ចូល​រួម​ជាដៃគូ​ទាំង​នោះ​ រួមមាន ​ធនាគារ​ កាណាឌីយ៉ា ​ធនាគារ​ ស្ថាបនា​ធនាគារ​ អេស៊ីលីដា ​ធនាគារ​ ជីប ម៉ុង​ ធនាគារ​ វឌ្ឍនៈ​អាស៊ីចំកាត់​ ធនាគារ​ វីង​ ធនាគារ​ព្រីន​ស៍ ​ធនាគារ ​ស៊ីអាយអិមប៊ី ​ធនាគារ​ ប្រៃសណីយ៍​កម្ពុជា ​ធនាគារ​ ភ្នំពេញ​ពាណិជ្ជ​។

ព្រមទាំង​ ធនាគារ ​អ អេច​ ប៊ី​ ធនាគារ​ សាខម ​ធនាគារ ​ហត្ថា ​ធនាគារ​ ហ្វីលីព ​ធនាគារ​ អេស៊ា-​ប៉ាស៊ីហ្វិក ​ធនាគារ​ ពាណិជ្ជ​កម្ម​ក្រៅ​ប្រទេស​នៃ​កម្ពុជា ​និង​គ្រឹះ​ស្ថាន​មីក្រូ​ហិរញ្ញ​វត្ថុ​ ប្រាសាក់ ​គ្រឹះស្ថាន​ មីក្រូហិរញ្ញវត្ថុ​ ខេមា ​និង​គ្រឹះ​ស្ថាន​មីក្រូហិរញ្ញវត្ថុ ​អិលអូអិលស៊ី​។

ដើម្បីជំរុញ និងស្តារវិស័យទេសចរណ៍ឡើងវិញ កាល​ពីថ្ងៃ​ទី​១៦ ​ខែ​ធ្នូ​ ឆ្នាំ២០២១ ​រាជរដ្ឋាភិបាលបាន​ប្រកាស​ដាក់​ឲ្យ​ប្រើប្រាស់​ផ្លូវការ​នូវ​ក្របខណ្ឌ​យុទ្ធសាស្ត្រ ​និង​កម្មវិធី​ស្តារ ​និង​ជំរុញ​កំណើន​សេដ្ឋកិច្ច​កម្ពុជា​ ក្នុងការ​រស់​នៅ​ជាមួយ​កូវីដ១៩​ តាម​គន្លង​ប្រក្រតី​ភាព​ថ្មី ​ឆ្នាំ ​២០២១-២០២៣​៕