លោកស្រី មុត ចរិយា ម្ចាស់សិប្បកម្មកែច្នៃស្វាយចន្ទីនៅខេត្តស្ទឹងត្រែង(ឆ្វេង) និង​កញ្ញា សឿន សុទ្ធនីតា អ្នកគ្រប់គ្រងអភិវឌ្ឍន៍អាជីវកម្មនៃសិប្បកម្ម​នេះ​(ស្តាំ)​ ចូលរួ​ម​ការតាំងពិព័រណ៌​នៅ​ទីក្រុង​ភ្នំពេញ កាលពី​ថ្ងៃទី២៣ ខែមិថុនា ឆ្នាំ២០២២។រូបភាព៖ ធូ វិរៈ

សិប្បកម្ម​កែច្នៃ​គ្រាប់​ស្វាយ​ចន្ទី ​ហ៊ែន​ក្រាហ្វធីត​ ឃែស៊ូណាត់ ​ស្ទឹងត្រែង​( Handcrafted​ Cashew ​Nuts​ Stung Treng) ​មាន​ទីតាំង​ស្ថិត​នៅ​ស្រុក​សៀមបូក​ ស្ទឹងត្រែង​ គ្រោង​ដាក់​ឲ្យដំណើរការ​រោង​ចក្រ​កែច្នៃ​គ្រាប់​ស្វាយ​ចន្ទី​នៅ​ចុង​ខែ​កក្កដា ​ឆ្នាំ​២០២២​ ដើម្បី​បំពេញ​តម្រូវ​ការ​នាំចេញ​ទៅ​ទីផ្សារ​អន្តរ​ជាតិ​។

កញ្ញា សឿន សុទ្ធនីតា អ្នកគ្រប់គ្រងអភិវឌ្ឍន៍អាជីវកម្ម(ឆ្វេង អាវព័ណ៌ផ្កាឈូក) នៃសិប្បកម្មកែច្នៃគ្រាប់ស្វាយចន្ទីស្ទឹងត្រែង។រូបភាព៖ ធូ វិរៈ

កញ្ញា​ សឿន ​សុទ្ធនីតា ​អ្នក​គ្រប់​គ្រង​អភិវឌ្ឍន៍​អាជីវកម្ម​នៃ​សិប្បកម្ម​កែច្នៃ​គ្រាប់​ស្វាយ​ចន្ទី​ស្ទឹង​ត្រែង​ ប្រាប់​ខ្មែរណាស់​នៅ​ថ្ងៃ​ចន្ទ​នេះ​ថា​ រោង​ចក្រ​នេះ​មានសមត្ថភាព​ផលិត​បាន​១៥ តោនក្នុង​១ខែ​ដោយដំណើរការសាងសង់​សម្រេច​បាន​ប្រមាណ ៩០% ដែល​នឹង​ដំណើរការ​នៅចុង​ខែកក្កដា ខាងមុខនេះ​។​

កញ្ញា សុទ្ធនីតា ថ្លែងដូច្នេះថា៖«នៅពេល​រោងចក្រនេះ​រួចរាល់ យើង​អាចនាំចេញ​ជាលើកដំបូង​ចំនួន ១កុងតឺន័រ​ទៅកាន់ទីផ្សារអន្តរជាតិ​។ប្រសិនបើមានតម្រូវ​ការ​ច្រើន​ ដូច្នេះ​យើង​នឹង​បង្កើនការនាំចេញ​កាន់តែច្រើន​ទៅតាម​តម្រូវការទីផ្សារ​។

កញ្ញា បាន​ឲ្យដឹងថា សព្វ​ថ្ងៃ​ សិប្បកម្ម​នេះ​បាននាំចេញទៅ​ទីផ្សារ​អាមេរិក​លើក​ដំបូង​ក្នុងបរិមាណតិចតួច​នៅឡើយ​តាម​រយៈ​ដៃគូ​នៅទីនោះ។​

កញ្ញា ថ្លែងទៀតថា៖«យើង​បាន​ផ្ញើ​ផលិតគំរូ​ទៅ​កាន់ទីផ្សារ​ប្រទេស​ជាច្រើន ដូចជា កូរ៉េខាងត្បូង អាល្លឺម៉ង់ អង់គ្លេង តួគី  អាមេរិក ប៉ទុយហ្គាល សិង្ហបុរី និង​ជប៉ុន​ ជាដើម​។ គេកំពុង​រងចាំ​យើង​ដំឡើង​រោងចក្រ​ដែល​មានម៉ាស៊ីន​កែច្នៃគ្រាប់ស្វាយចន្ទី​ធំរួចរាល់សិន ព្រោះឥឡូវយើង​នៅប្រើប្រាស់ម៉ាស៊ីន​តូច​នៅឡើយ»​។

ផលិតផលស្វាយចន្ទី៥ រសជាតិ មានដូចជារសជាតិឈើអែម រសជាតិ Milk Cream រសជាតិហិរ រសជាតិអំបិល និងរសជាតិតុងយ៉ាំ។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានភ្លក់ រសជាតិ គ្រាប់ស្វាយចន្ទីរបស់សិប្បកម្មកែច្នៃគ្រាប់ស្វាយចន្ទី ហ៊ែនក្រាហ្វធីត ឃែស៊ូណាត់ ស្ទឹងត្រែង។រូបភាព៖ ធូ វិរៈ

កាលពីថ្ងៃទី ២៣ ខែមិថុនា ឆ្នាំ​២០២២ សិប្បកម្ម​នេះ បានចូលរួម​តាំងពិព៌រណ៍​ផលិតផល​នៅក្នុង​កម្ម​វិធីសម្ពោធម៉ាកសមូហភាព​អង្ករក្រអូប០១ និង​អង្ករដំណើប​ស្បៃមង្គល​ នៅរាជធានីភ្នំពេញ​ ដើម្បី​ផ្សព្វ​ផ្សាយ​ពីផលិតផលរបស់​យើង​ទៅកាន់​សាធារណជន។

​កម្មវិធីនេះ ប្រព្រឹតិ្តទៅ​ក្រោមអធីបតីភាព លោក ប៉ាន​ សូរស័ក្តិ រដ្ឋមន្រ្តីក្រសួងពាណិជ្ជកម្ម​។

កញ្ញាថា៖«ឯកឧត្តម​ រដ្ឋមន្រ្តីបាន​ភ្លក់​គ្រាប់​ស្វាយ​ចន្ទី​របស់​ខ្ញុំ​ដោយ​បានសរសើរថាមាន​រសជាតិឆ្ងាញ់​ប្លែក​ខុសពី​គ្រាប់​ស្វាយ​ចន្ទីគេ​ផ្សេងៗដូចជា រស់ជាតិ​ ឈើអែម​ ហើយគាត់ថាគ្រាប់ស្វាយ​ចន្ទី​យើង​ធំល្អ​។ គាត់​លើកចិត្ត​ឲ្យខិតខំប្រឹងប្រែង​បន្តទៀត​ព្រោះ​រសជាតិ​គ្រាប់ស្វាយចន្ទី​នឹងអាច​​ដើរទៅ​មុខបានល្អ»​។

នៅកម្ពុជាមានក្រុមហ៊ុន រោងចក្រ សហគ្រាស សិប្បកម្មកែច្នៃស្វាយចន្ទីចំនួន១៧កន្លែង ក្នុងនោះមានរោងចក្រខ្នាតធំចំនួន៤នៅខេត្តព្រះវិហារ ខេត្តត្បូងឃ្មុំ ខេត្តរតនគិរី និងខេត្តសៀមរាប។នេះបើ​តាម លោក អួន ស៊ីឡត ប្រធានសមាគមស្វាយចន្ទីកម្ពុជា។

 យោងតាមរបាយការណ៍ពីក្រសួងកសិកម្ម បង្ហាញថា ក្នុងឆ្នាំ២០២១ ផលិតកម្មដំណាំកសិកម្មនៅទូទាំងប្រទេសទទួលបានសរុបជាង ៣៥ លានតោន ក្នុងនោះ ស្វាយចន្ទីផលិតបានចំនួន ៤៧២ ៦៣៦ តោន៕