លោក ប៉ាន សូរស័ក្តិ រដ្ឋមន្រ្តី​ក្រសួងពាណិជ្ជកម្ម តំណាង​ក្រសួងកសិកម្ម រុក្ខាប្រមាញ់ និងនេសាទ សហព័ន្ធស្រូវអង្ករកម្ពុជា និងដៃគូអភិវឌ្ឍន៍ នៅថ្ងៃព្រហស្បត្តិ៍នេះ កាត់ខ្សែបូ​សម្ពោធដាក់ឲ្យប្រើប្រាស់ជាផ្លូវការម៉ាសសមូហភាពអង្ករក្រអូប«SKO» និងអង្ករដំណើប«DMSK» ។រូបភាព៖ ធូ វិរៈ

ក្រសួងពាណិជ្ជកម្ម​ ក្រសួងកសិកម្ម រុក្ខាប្រមាញ់ និងនេសាទ ​សហព័ន្ធស្រូវអង្ករកម្ពុជា និងដៃគូអភិវឌ្ឍន៍ នៅថ្ងៃព្រហស្បត្តិ៍នេះ បាន​សម្ពោធ​​​ដាក់ឲ្យប្រើប្រាស់ជាផ្លូវ​ការ​ម៉ាកសមូហភាពអង្ករក្រអូប​«SKO» និងអង្ករដំណើប​«DMSK» ដើម្បី​​ជំរុញការ​នាំចេញអង្ករ​កក្រអូប​និង​ដំណើប​​ទៅកាន់ទីផ្សារអន្តរជាតិបន្ថែម​ទៀត។

លោក ប៉ាន សូរស័ក្តិ រដ្ឋមន្រ្តី​ក្រសួងពាណិជ្ជកម្ម បាន​ប្រកាស​ដាក់​ឲ្យប្រើប្រាស់​ម៉ាកសមូហភាព​ទាំងនេះ​ចាប់ពី​ពេលនេះតទៅ​។រូបភាព៖ ធូ វិរៈ

លោក ប៉ាន សូរស័ក្តិ រដ្ឋមន្រ្តី​ក្រសួងពាណិជ្ជកម្ម បានប្រកាស​ឲ្យ​ប្រើប្រាស់​ម៉ាកសមូហភាព​អង្ករក្រអូប«SKO»​និងអង្ករដំណើប​«DMSK»ជា​ផ្លូវ​ការនៅថ្ងៃទី២៣ មិថុនានេះ។នេះគឺ​បង្ហាញ​ពីភាពរីកចម្រើន​មួយ​ផ្នែក​ទៀត​លើ​វិស័យ​ស្រូវអង្ករ​កម្ពុជា​ចាប់ពី​ការរៀបចំគ្រាប់ពូជ​រហូត​ដល់​ទីផ្សារ​។

លោក សូរស័ក្តិ ថ្លែងទៀតថា ពូជស្រូវ​សែនក្រអូបកំពុ​ង​ដើរតួនាទី​យ៉ាង​សំខាន់សម្រាប់ការនាំចេញ​ ហើយ​ពូជស្រូវសែន​ក្រអូប​នេះគឺជាជម្រើសមួយ​ថ្មី​សម្រាប់​កសិករ​ននិងអ្នក​នាំចេញ​ក្នុងការប្រកួតប្រជែង​ជាមួយអង្ករក្រអូប​ប្រទេស​ផ្សេងទៀត។

លោករដ្ឋមន្រ្តី​ថ្លែងទៀតថា៖«​នៅថ្ងៃនេះ ខ្ញុំ​សូមប្រកាស​ដាក់​ឲ្យប្រើប្រាស់​ម៉ាកសមូហភាព​ទាំងនេះ​ចាប់ពី​ពេលនេះតទៅ​ និងសូមប្រកាស​បើក​វេទិកា​ស្តីអំពី​ការពង្រឹងខ្សែ​សង្វាក់តម្លៃស្រូវ​អង្ករ និងការ​លើកកម្ពស់​ជីវភាព​​កសិករ​ខ្នាតតូច»។

ការ​វិចខ្ចប់​អង្ករ​ក្រអូប​«SKO»និងអង្ករដំណើប​​«DSMK» សម្រាប់ការនាំចេញ​ទៅកាន់ទីផ្សារ​អន្តរជាតិ​។រូបភាព៖ធូ វិរៈ

ការ​ចុះឈ្មោះ និង​ការបង្កើត​ម៉ាកសមូហភាព​សម្រាប់​«SKO»និង​«DSMK» ត្រូវ​បាន​ធ្វើ​ឡើង​ក្នុង​គោល​បំណង​ដើម្បី​បង្កើត​អត្តសញ្ញាណ​អង្ករ​ក្រអូប​ និង​អង្ករដំណើប​កម្ពុជា​ដើម្បី​ប្រកួត​ប្រជែង​ជាមួយ​អង្ករក្រអូប​ស្រដៀងគ្នា​នៃ​ប្រទេស​ផលិតអង្ករ​ក្រអូប​ផ្សេងៗទៀត​។

លោក ហ៊ុន ឡាក់ ប្រធាន​ក្រុមប្រឹក្សា​ភិបាល​ សហព័ន្ធស្រូវ​អង្ករ​កម្ពុជា បង្ហាញក្តី​​សង្ឃឹម​ជឿជាក់ថា ​តាម​រយៈ​ម៉ាក​សមូហភាព​ថ្មី​នឹង​ជួយ​ជំរុញ​ការ​នាំចេញ​ឲ្យ​កាន់តែច្រើន​ថែម​ទៀត​។ រូបភាព៖ ធូ វិរៈ

លោក ហ៊ុន ឡាក់ ប្រធាន​ក្រុមប្រឹក្សា​ភិបាល​ សហព័ន្ធស្រូវ​អង្ករ​កម្ពុជា​ បាន​ថ្លែង​ក្នុង​កម្ម​វិធី​សម្ពោធថា ដោយ​មើលឃើញពីភាពចំបាច់ និ​ងសក្តានុពល​នៃការអភិវឌ្ឍន៍​ពូជស្រូវ​សែន​ក្រអូប​០១​ និងអង្ករដំណើប​ ស្របពេល​និន្នការ​នៃតម្រូវ​ការ​ប្រភេទ​អង្ករ​ក្រអូប​ធម្មតា​ និងអង្ករដំណើប​កំពុង​មាន​ទីផ្សារ​ល្អ​ទើប​សហព័ន្ធ​ស្រូវ​អង្ករកម្ពុជា​បានខិតខំ​ស្វះ​ស្វែង​រក​នូវ​ប្រភព​ធនធាន​ក្នងការ​អភិវឌ្ឍន៍​នូវ​ម៉ាក​សញ្ញា​ពាណិជ្ជកម្មមួយពិត​ប្រាកដ​ដែល​អាច​ប្រើប្រាស់​ជារួម​សម្រាប់​ប្រយោជន៍ទាំងអស់គ្នា​នៅកម្ពុជា។

លោក ហ៊ុន​ ឡាក់ ថ្លែងទៀតថា តាម​រយៈ​កម្ម​វិធីខ្សែសង្វាក់​តម្លៃ​កសិកម្ម​កម្ពុជា-អូស្រ្តាលី(CAVAC) គាំទ្រ​ហិរញ្ញវត្ថុ​លើកា​រផ្សព្វ​ផ្សាយ​ម៉ាក​«ម្លិះអង្គរ» និង​ការចុះបញ្ជី​ម៉ាក​សមូហភាពថ្មីសម្រាប់អង្ករក្រអូបពូជស្រូវ​សែន​ក្រអូប«SKO»​និងអង្ករដំណើប​«DMSK»នៃពូជស្រូវ​ដំណើបស្បៃមង្គល។

លោក​ថ្លែងថា៖«ការរៀបចំ​ឲ្យមាន​ម៉ាកសមូហភាពនៅពេលនេះ​គឺជារឿងដែលចាំបាច់​បំផុត​សម្រាប់ការកសាង​ទំនុកចិត្ត​ដល់​អតិថិជន និងការកសាងភាព​ច្បាស់​លាស់​មួយ​សម្រាប់ប្រជាកសិករ​ ព្រោះ​បច្ចុប្បន្ន​ កសិករមួយចំនួន​ប្រឈម​លើផលលំបាកនៃការលក់​ស្រូវរបស់ខ្លួននៅពេល​ប្រមូល​ផល​ដោយសារការដាំដុះ​មិនមានប្រភព​ព័ត៌មាន​នៃតម្រូវការទីផ្សារ​​ច្បាស់លាស់ ហើយ​អ្នកនាំចេញក៏មិនមាន​ព័ត៌មានឲ្យ​បានជាក់លាក់​ពីកសិករផងដែរ»។

ការ​តាំង​បង្ហាញ​ប្រភេទ​អង្ករ​ក្រអូប​ SKO និង​អង្ករដំណើប DSMK ត្រូវ​បានដាំ​ដុះ​នៅ​តាម​តំបន់​និមួយៗនៃប្រទេស​កម្ពុជា។រូបភាព៖ ធូ វិរៈ

លោក​បន្ថែមថា ការបង្កើត​ម៉ាកសមូហភាព​នេះ​នឹង​បង្កើន​ការលក់​អង្ករក្រអូប​ពូជ​ស្រូវ​សែនក្រអូប ​និង​អង្ករដំណើប​ពូជ​ស្រូវ​ដំណើប​ស្បៃ​មង្គល​នៅ​លើទីផ្សា​រ​អន្តរជាតិ​ និង​ដើម្បី​នាំយក​ម៉ាក​អង្ករ​ក្រអូប​ប្រណិត​ អង្ករក្រអូប​កម្ពុជា​ និង​អង្ករដំណើប​ទៅ​កាន់​ទីផ្សារអន្តរជាតិ​ឲ្យ​កាន់​តែ​កើន​ឡើង​ថែម​ទៀត។ ​​ពិសេស​ បង្កើន​តម្លៃអង្ករក្រអូប​ និង​អង្ករដំណើប​ ជូន​កសិករកម្ពុជា​។

លោក​ថ្លែងដូច្នេះថា៖«​ការរៀបចំ​ម៉ាកអង្ករនេះ​នឹងផ្តល់​នូវផល​ឲ្យយើង​ក្នុងរយៈ​ពេលធ្យម និងវែង​ ដែលតម្រូវ​ឲ្យយើង​ធ្វើការ​ឲ្យកាន់តែច្រើន​ជាងមុន​ និ​ងជួយកាត់បន្ថយ​នូវគម្លាត​ព័ត៌មាន​នៃតម្រូវ​ការទីផ្សារ​ និង​ការ​ផលិត​រវាង​អ្នកនាំចេញ​ រោងម៉ាស៊ីនកិនស្រូវ​ និងប្រជាកសិករ»។​

បច្ចុប្បន្ន ពូជស្រូវ​ សែនក្រអូប០១ កំពុង​រីកសាយភាយនៅកម្ពជា​ដោយ​ពូជស្រូវ​នេះ​ផ្តល់នូវ​ទិន្នផល​ខ្ពស់ មានក្លិនក្រអូប គុណភាព​អង្ករ​ល្អ​មានភាព​ថ្លាវែងរលូន និង​បាយទន់ឆ្ងាញ់ពិសារ​ ពិសេស​មានតម្លៃល្អ​ និងមាន​តម្រូវការ​ខ្ពស់​នៅលើទីផ្សារ​ជាតិនិងអន្តរជាតិ។

លោក ងិន ឆាយ អគ្គនាយក​នៃអគ្គនាយក​ដ្ឋានកសិកម្ម​ ថ្លែងថាពូជស្រូវ​ក្រអូប០១ជាប្រភេស​ពូជស្រូវ​ស្រាល​ មិនប្រកាន់​រដូវ​ដែល​អាច​ឲ្យកសិករ​ដាំដុះ​គ្រប់​រដូវ​កាល មាន​រយៈពេល​ត្រឹម​តែ​១១៥ ទៅ១២០​ថ្ងៃ ប៉ុណ្ណោះ។រូបភាព៖ ធូ វិរៈ​

លោក ងិន ឆាយ អគ្គនាយក​នៃអគ្គនាយក​ដ្ឋានកសិកម្ម​នៃក្រសួងកសិកម្ម រុក្ខាប្រមាញ់ និងនេសាទ​ ថ្លែងថា ​ការរៀប​ចំម៉ាកសមូហភាព​ទាំងពីរនេះ គឺជា​បច្ច័យមួយ​ថ្មីទៀតសម្រាប់​ជួយលើក​កម្ពស់អង្ករ​កម្ពុជា​នៅក្នុង​ទីផ្សារ​ប្រកួត​ប្រជែង​អន្តរជាតិ​ និងជាវេទិកាសម្រាប់​ពិភាក្សា​លើការប្រឈម​ និងការ​ស្វែង​រកដំណោះស្រាយ​សម្រាប់​កសិករ​ខ្នាតតូច​នៅកម្ពុជា។

លោកថ្លែងដូច្នេះថា៖«តាមរយៈ​កម្ម​វិធីនៃការអភិវឌ្ឍន៍នូវម៉ាកសមូហភាពនេះ ​ខ្ញុំសង្ឃឹមជឿជាក់​ថាវានឹងអាវជួយឲ្យមាន​ភាព​កាន់តែច្បាស់​លាស់​សម្រាប់​ទីផ្សារ​អង្ករនៅកម្ពុជា​ យើង​មានម៉ាកសម្រាប់អង្ករពូជប្រណិត​ផ្ការំដួល​ ផ្ការមៀត ផ្ការំដេង ដែល​មានម៉ាក«ម្លិះអង្គរ» សម្រាប់អង្ករក្រអូបធម្មតា ឬអង្ករក្រអូប​ស្រូវ​ប្រាំងសែនក្រអូប ​«SKO»​និងអង្ករដំណើប​«DMSK» ដែល​កត្តាមួយ​សម្រាប់​ជួយតម្រង់ទិស​ដល់​កសិករ​ក្នុង​ការ​ដាំដុះ​ដែល​ឆ្លើយ​តបទៅ​នឹងតម្រូវ​ការ​ទីផ្សារ​សម្រាប់​អ្នក​នាំចេញ​ ពិសេស​យកទៅផ្សព្វ​ផ្សាយ​ និងទាក់ទាញ​អ្នក​ទិញ​នៅលើ​ទីផ្សារអន្តរជាតិ​»។

បើ​តាម​លោក ហ៊ុន ឡាក់ គិត​ត្រឹម​សប្តាហ៍​ទី៣ ក្នុង​ខែមិថុនា ឆ្នាំ២០២២ កម្ពុជា​បាននាំចេញ​អង្ករគ្រប់ប្រភេទ​ទៅកាន់ទីផ្សារអន្តរជាតិ​ជាង៣១ម៉ឺន​តោន​ មានតម្លៃជាប្រាក់​១៩១លាន​ដុល្លារ​ កើន​ឡើង​២១,៧៣% ធើប​នឹង​រយៈពេល​ដូចគ្នា​កាលពី​ឆ្នាំមុន។​ ក្នុងនោះ អង្ករក្រអូប​ប្រណិត​ជាង៤១,៦២% អង្ករសែន​ក្រអូប​ ២២,៤២%​ អង្ករស ៣៣,១២% អង្ករចំហ៊ុយ១,៤២%​ និង​អង្ករ​សរីរាង្គ​១,៤២%​។​

លោក​ថ្លែងថា៖«​យើង​សង្ឃឹម​ជឿជាក់​តាម​រយៈ​ម៉ាក​សមូហភាព​ថ្មី​នឹង​ជួយ​ជំរុញ​ការ​នាំចេញ​ឲ្យ​កាន់តែច្រើន​ថែម​ទៀត​»។

តាម​ការពន្យាករណ៍​របស់សហព័ន្ធ​ស្រូវអង្ករ​កម្ពុជា ការ​នាំចេញ​អង្ករក្នុង​ឆ្នាំ​២០២២ នឹង​សម្រេច​បាន​ក្នុង​រង្វង់​៧០ទៅ​៧៥ម៉ឺន​តោន​ដែល​មានកំណើន​ជាង​១០ម៉ឺន​តោន​ បើធៀប​នឹង​ឆ្នាំ​២០២១៕​