លោក ជា កុកហុង ប្រធានលេខាធិការដ្ឋានមូលនិធិអភិវឌ្ឍន៍សហគ្រិនភាព(ឆ្វេង) និងលោកស្រី Christine Tsai នាយកប្រតិបត្តិក្រុមហ៊ុន 500 Global(ស្តាំ) កាលពីថ្ងៃទី ១៦ ខែឧសភា បានជួបពិភាក្សា ដើម្បីសិក្សាពីការចែករំលែកបទពិសោធន៏នៃអភិវឌ្ឍប្រព័ន្ធអេកូឡូស៊ីសហគ្រិនភាព និងសិក្សាពីលទ្ធភាពទាក់ទាញបណ្តាញមូលនិធិវិនិយោគលើវិស័យធុរកិច្ចបង្កើតថ្មី និងសហគ្រាសធុនតូចនិងមធ្យមនៅក្នុងកម្ពុជា។រូបភាព៖ ហ្វេសប៊ុក មូលនិធិអភិវឌ្ឍន៍សហគ្រិនភាព

មូល​និធិ​អភិវឌ្ឍន៍​សហគ្រិនភាព​ ​ស្ថិត​ក្រោមឆ័ត្រ​ក្រសួង​សេដ្ឋ​កិច្ច ​និង​ហិរញ្ញ​វត្ថុ​កំពុង​នាំ​យក​អាជីវកម្ម​ខ្នាត​តូច​ និង​ធម្យម​របស់​កម្ពុជា​ទៅ​កាន់​ពិភព​លោក​។

លោក​ ជា ​កុកហុង ​ប្រធាន​លេខា​ធិការ​ដ្ឋាន​មូល​និធិ​អភិវឌ្ឍន៍​សហគ្រិន​ភាព​ បាន​ជួប​ពិភាក្សា​ជាមួយ​លោក​ស្រី ​Christine ​Tsai​ នាយក​ប្រតិបត្តិ​ក្រុម​ហ៊ុន​ 500 ​Global ​ជា​ក្រុម​ហ៊ុន​វិនិយោគ​ក្នុង​ធុរកិច្ច​បង្កើត​ថ្មី​ធំ​ជាង​គេ​លើ​ពិភព​លោក ​កាល​ពី​សប្តាហ៍​មុន​ នៅ​តំបន់​ ស៊ីលីខន​ វ៉ាឡេយ៍ ​(Silicon ​Valley)​ក្នុង​រដ្ឋ​កាលីហ្វរ​ញ៉ា​សហ​រដ្ឋ​អាមេរិក​។

ការ​ពិភាក្សា​របស់​ពួក​គេ​បាន​ផ្តោត​លើការ​លើក​កម្ពស់​ប្រព័ន្ធ​អេកូឡូ​ស៊ី​សហគ្រិន​កម្ពុជា និង​កិច្ចសហ​ប្រតិបត្តិការ ​ការ​ពង្រីក​បណ្តាញ​វិនិយោគ​ថ្មី ​និង​ការ​លើក​កម្ពស់​ការ​វិនិយោគ​ផ្នែក​បច្ចេក​វិទ្យា ​ដែល​ត្រូវ​បាន​កំណត់​ថា​ជា​យុទ្ធ​សាស្ត្រ​សំខាន់​សម្រាប់​កំណើន​សេដ្ឋ​កិច្ច​។

ក្នុងជំនួបនេះ​​ក៏​បាន​ពិភាក្សា​អំពី​យុទ្ធ​សាស្រ្ត​ក្នុង​ការ​ទាក់​ទាញ​ការ​វិនិយោគ​ពី​បរទេស​ទៅ​កាន់​សហគ្រាស​ធុន​តូច​ និង​មធ្យម​របស់​កម្ពុជា​ដោយ​មាន​ការ​លើក​ទឹក​ចិត្ត​ពី​រដ្ឋា​ភិបាល​សម្រាប់​ក្រុម​ហ៊ុន​បណ្តាក់​ទុន​ និងការ​ចាប់​ផ្តើម​អាជីវកម្ម​ដែល​មើល​ឃើញ​ថា​ជា​ឱកាស​ដ៏​ជោគ​ជ័យ​។

ការ​វិនិយោគ​លើ​វិស័យ​ដែល​ស្រប​តាម​ក្រប​ខណ្ឌ​សេដ្ឋ​កិច្ច​ឌីជីថល​ជាតិ​របស់​កម្ពុជា ​ក៏​ត្រូវ​បាន​គេ​កំណត់​ថា​ជា​កត្តា​ចាំបាច់​សម្រាប់​ការ​ងើប​ឡើង​វិញ​ និង​ការ​អភិវឌ្ឍន៍​សេដ្ឋកិច្ច​របស់​កម្ពុជា​ ផង​ដែរ​។

លោក ​ជា ​កុកហុង ​បាន​ថ្លែង​ក្នុង​កម្ម​វិធី​នេះ​ថា ​បន្ទាប់​ពី​បាន​ពិភាក្សា​គ្នា ​អង្គ​ប្រជុំ​បាន​យល់​ស្រប​គ្នា​នូវ​បញ្ហា​ប្រឈម​ជាសកល​ដែល​បាន​កើន​ឡើង​អតិផរណា​នៃ​សេដ្ឋ​កិច្ច​ពិភព​លោក ​ការ​រាំង​ស្ទះ​ខ្សែ​ច្រវាក់​ផលិត​កម្ម ​សង្គ្រាម​រុស្សី ​និង​អ៊ុយ​ក្រែន​ និង​ការ​រាត​ត្បាត​នៃ​ជំងឺ​កូវីដ​១៩​ បាន​ធ្វើ​ឱ្យ​មាន​ការ​បង្អាក​និង​ការ​ថម​ថយ​នៃ​លំហូរ​មូល​និធិ​វិនិយោគ​ទៅ​កាន់​ធុរកិច្ច​ថ្មី​។

លោក​ថ្លែង​ដូច្នេះ​ថា​៖ ​«យ៉ាង​ណា​មិញ​ ការ​រីក​ចម្រើន​នូវ​បច្ចេក​វិទ្យា​ឌីជីថល ​ស្រប​ពេល​ដែល​មាន​ការ​កើន​ឡើង​នៃ​ការ​ប្រើ​ប្រាស់​បច្ចេក​វិទ្យានេះ​ បាន​បង្កើត​នូវ​ឱកាស​ជា​ច្រើន​សម្រាប់​សហគ្រិន​ក្នុង​ការ​ប្រើប្រាស់​បច្ចេក​វិទ្យា​ឌីជិថល ​ដើម្បី​បង្កើត​ជា​ម៉ូឌែល​ធុរកិច្ច​ថ្មី​ដែល​អាច​លើក​កម្ពស់​ផលិត​ភាព​និង​ប្រសិទ្ធិ​ភាព​ផលិត​កម្ម​ ព្រម​ទាំង​អាច​បង្កើត​ការ​ងារ​ថ្មីៗ​ដែល​មាន​តម្លៃ​បន្ថែម​សម្រាប់​សេដ្ឋកិច្ច​»។

លោក​បន្ថែម​ថា ​ដើម្បី​ធានា​នូវ​មូល​និធិ​វិយោគ ​VC ​ចូល​ទៅ​កាន់​វិស័យ​ធុរកិច្ច​ថ្មី​ដែល​ប្រើ​ប្រាស់​បច្ចេក​វិទ្យា​ទំនើប​កាន់​តែ​ច្រើន ​ក្រុម​វិនិយោគិន​បាន​សង្កត់​ធ្ងន់​ពី​សារៈ​សំខាន់​នៃ​វត្ត​មាន​គោល​នយោបាយ​លើក​ទឹក​ចិត្ត​របស់​រដ្ឋ​ទៅ​ដល់​ក្រុម​ហ៊ុន​មូល​និធិវិ​យោគ​ VC​។

លោក​ថ្លែង​ដូច្នេះ​ថា​៖​«ទន្ទឹម​នឹង​នេះ​ ស្រប​តាម​ក្រប​ខ័ណ្ឌ​គោល​នយោបាយ​សេដ្ឋ​កិច្ច​ឌីជីថល​របស់​រាជ​រដ្ឋា​ភិបាល​កម្ពុជា​នឹង​បន្ត​បង្កើត​គោល​នយោបាយ​និង​កម្ម​វិធី​លើក​ទឹក​ចិត្ត​លម្អិត​បន្ថែម​ទៀត​ដើម្បី​ធានា​ទាក់​ទាញ​មូល​និធិវិយោគ​VC​ ដែល​ជា​ផ្នែក​មួយ​នៃ​ការ​ចូល​រួម​បន្ថែម​លើ​មូល​និធិវិ​យោគ​ការ​អភិវឌ្ឍន៏​សហគ្រិន​ភាព ​និង​ការ​ផ្តល់​កម្ចី​របស់​រដ្ឋ​លើស​ហគ្រាស​ធុន​តូច​ និង​មធ្យម​កម្ពុជា​»។

មូល​និធិ​អភិវឌ្ឍន៍​សហគ្រិន​ភាព​គឺជា​មូល​និធិ​សាធារណៈ​បង្កើត​ឡើង​ក្នុង​គោល​បំណង​ស្វែង​រក​ និង​ផ្តល់​ការ​គាំ​ទ្រ​ដល់​សហគ្រិន​ ដែល​មាន​សក្តានុពល​នៅ​កម្ពុជា ​ពិសេស​សហ​គ្រិន​ដែល​កំពុង​ធ្វើ​កិច្ចការ​ងារ​ចូល​រួម​ដោះ​ស្រាយ​បញ្ហា​រាំង​ស្ទះ​នានា​ និង​ការ​ពង្រីក​ធុរកិច្ច​របស់​ពួក​គេ​។

ក្រុមហ៊ុន ​500 ​Global ​មាន​តម្លៃ​ទីផ្សារ​ជាង​ ៣០០​ពាន់​លាន​ដុល្លារ​អាមេរិក​។ ​កម្ម​វិធី​បង្កើន​ល្បឿន​របស់​ក្រុមហ៊ុន​ 500​ Global ​ផ្តោត​លើ​ទីផ្សារ​បច្ចេក​វិទ្យា ​ការ​ច្នៃ​ប្រឌិត​ និង​ មូលធន​អាច​ធ្វើ​ការ​ដោះ​ស្រាយ​នូវ​តម្លៃ​រយៈ​ពេល​វែង​ និង​ជំរុញ​កំណើន​សេដ្ឋ​កិច្ច​៕