វេទិកាធុរកិច្ច និងវិនិយោគកម្ពុជា-ចិន ឆ្នាំ២០២២ ប្រារព្វឡើងក្រោមប្រធានបទ«ការចែករំលែកកាលានុវត្តភាពអភិវឌ្ឍន៍ និងបង្កើតវិបុលភាពតំបន់» កាលពីថ្ងៃទី១៨ ខែឧសភាឆ្នាំ២០២២។រូបភាព៖​ហ្វេសប៊ុក​ក្រសូងពាណិជ្ជកម្ម

លោក ​Qian ​Keming ​អនុ​រដ្ឋ​មន្ត្រី​ក្រសួង​ពាណិជ្ជ​កម្ម​ចិន​ បាន​ថ្លែង​ក្នុង​វេទិកា​ធុរកិច្ច​និង​វិនិយោគ​កម្ពុជា-ចិន​ ឆ្នាំ​២០២២​ថា​ចិន​នៅ​តែ​ជា​ដៃ​គូ​ពាណិជ្ជ​កម្ម​ដ៏​ធំ​បំផុត​របស់​កម្ពុជា​និង​ប្តេជ្ញា​បន្ត​សហ​ប្រតិបត្តិការ​វិនិយោគ​លើវិស័យ​កសិកម្ម​ ថាមពល​អគ្គិសនី​ វាយន​ភណ្ឌ​ជាដើម​។

លោក ​Qian ​Keming ​ថ្លែង​ទៀត​ថា​ ចិន​បាន​ក្លាយ​ជា​គោល​ដៅ​នាំ​ចូល​អង្ករ ​និង​ចេក​ដ៏​ធំ​បំផុត​ពី​ កម្ពុជា​។ ជាក់​ស្ដែង ​ភាគី​ទាំង​ពីរ​បាន​សម្រេច​គោល​ដៅ​ទំហំ​ពាណិជ្ជ​កម្ម​ទ្វេភាគី​ ១០ ​ពាន់​លាន​ដុល្លារ ២​ឆ្នាំ​មុន​ផែន​ការ​កំណត់​។

លោក​ថ្លែង​ដូច្នេះ​ថា​៖ «​ក្នុង​ភាព​ជា​ដៃគូ​សហ​ប្រតិបត្តិការ​យុទ្ធ​សាស្ត្រ​គ្រប់​ជ្រុង​ជ្រោយ​រវាង​ចិន​ និង​កម្ពុជា​ត្រូវ​បាន​ធ្វើ​ឱ្យ​ស៊ី​ជម្រៅ​ពី​មួយ​ឆ្នាំ​ទៅ​មួយ​ឆ្នាំ ​ហើយ​ការ​កសាង​រួម​គ្នា​នៃ​«ខ្សែ​ក្រវាត់​ និង​ផ្លូវ​»ត្រូវ​បាន​លើក​កម្ពស់​បន្ថែម​ទៀត ​ចំណែក​កិច្ច​សហ​ប្រតិបត្តិការ​សេដ្ឋ​កិច្ច​-​ពាណិជ្ជ​កម្ម​ជាក់​ស្តែង​ទទួល​បាន​លទ្ធ​ផល​ជាផ្លែ​ផ្កា​គួរ​ឱ្យ​កត់​សម្គាល់​»។

វេទិកា​ធុរកិច្ច​ និង​វិនិយោគ​កម្ពុជា​-​ចិន​ ឆ្នាំ​២០២២ ​ប្រារព្វ​ឡើង​ក្រោម​ប្រធាន​បទ​«ការ​ចែក​រំលែក​កាលានុវត្ត​ភាព​អភិវឌ្ឍន៍ ​និង​បង្កើត​វិបុល​ភាព​តំបន់​» ​កាល​ពី​ថ្ងៃទី​១៨​ ខែ​ឧសភា​ឆ្នាំ​២០២២។

លោក ​ស៊ាង ​ថៃ ​រដ្ឋ​លេខាធិការ​ និង​ជា​អ្នក​នាំ​ពាក្យ​ក្រសួង​ពាណិជ្ជ​កម្ម​បាន​ថ្លែ​អំណរ​គុណ​ដល់​រដ្ឋាភិបាល​ចិន​ ក៏ដូចជា​វិនិយោគិន​ចិន​តែងតែ​គាំទ្រ​ដល់​ការ​ជំរុញ​ការ​អភិវឌ្ឍ​សេដ្ឋ​កិច្ច​-ពាណិជ្ជ​កម្ម​និង​វិនិយោគ​នៅកម្ពុជា​។

លោក​ថ្លែង​ដូច្នេះ​ថា​៖«​កិច្ច​សហ​ប្រតិបត្តិការ​ពាណិជ្ជ​កម្ម​កម្ពុជា​-​ចិន​ត្រូវ​បាន​ពង្រឹង​និង​ពង្រីក​ជា​បន្ត​បន្ទាប់​ក្រោម​ការ​ដឹកនាំ​ប្រកប​ដោយ​ចក្ខុ​វិស័យ ​និង​ស្មារតី​សហ​ប្រតិបត្តិការ​របស់​ថ្នាក់​ដឹក​នាំ​កំពូល​នៃ​​កម្ពុជា​-ចិន​ ក្នុង​នោះ ​ក្រោម​ក្រប​ខ័ណ្ឌ​តំបន់​ភាគី​ទាំង​ពីរ​បាន​ចូល​រួម​បង្កើត​កិច្ច​ព្រម​ព្រៀង​ពាណិជ្ជ​កម្ម​សេរីអាស៊ាន​-ចិន ​និង​ជំរុញ​ឱ្យ​សម្រេច​បាន​នូវ​កិច្ច​ព្រម​ព្រៀង​ភាព​ជា​ដៃគូសេដ្ឋ​កិច្ច​គ្រប់​ជ្រុង​ជ្រោយ​តំបន់​(RCEP)​»​។

គិតត្រឹមចុងឆ្នាំ២០២១ វិនិយោគផ្ទាល់បរទេសនៅកម្ពុជា(FDI) បន្តមានភាពរឹងមាំកក្នុងទំហំទឹកប្រាក់១៦៨,៨ ទ្រីលានរៀល កើនឡើង ១១,២% ធៀបនឹងចុងឆ្នាំ២០២០។ ក្នុងនោះ វិនិយោគផ្ទាល់បរទេសចិន​ឈរនៅលំដាប់ទី១គឺ ៧៤ ទី្រលានរៀល ស្មើនឹង​ ៤៣,៩ % តាម​ពីក្រោយ​ដោយ​កូរ៉េខាងត្បូង​ ២០,១ទ្រីលានរៀល(១១,៩%) បន្ទាប់មក វៀតណាម សិង្ហបុរី ជប៉ុន និងម៉ាឡេស៊ី ក្នុងវិស័យ​ហិរញ្ញវត្ថុ កម្មន្តសាល អចលនទ្រព្យ សណ្ឋាគារនិងភោជនីយដ្ឋាន កសិកម្ម និងសំណង់។នេះបើ​តាម​ទិន្នន័យពីធនាគារជាតិនៃកម្ពុជា​៕