ត្រឹមដំណាច់ត្រីមាសទី១ឆ្នាំ២០២២ ប្រាសាក់ មានទ្រព្យសម្បត្តិសរុបមាន៤,៥ ពាន់លានដុល្លារ កើនឡើង ២១,៣៣% បើធៀបនឹងត្រីមាសទី១ឆ្នាំ២០២១។ រូបភាព៖ ហ្វេសប៊ុក ប្រាសាក់

គ្រឹះស្ថានមីក្រូហិរញ្ញវត្ថុ ប្រាសាក់ ជាគ្រឹះស្ថានឈានមុខគេមួយនៅកម្ពុជា​ បានបង្ហាញពីប្រាក់ចំណេញក្រោយការបង់ពន្ធ ៤៩,៣លានដុល្លារ ​ក្នុងត្រីមាសទី១ឆ្នាំ២០២២ កើន ៣៧% បើធៀបនឹងរយៈពេលដូចគ្នា​កាលពី​ឆ្នាំមុន ​មាន​ចំនួន ៣៥,៩ លានដុល្លារ។នេះបើតាម​របាយការណ៍​ផ្ញើទៅផ្សារមូលបត្រកម្ពុជា​(CSX)។

លោក Kwi Sang JUN ប្រធានក្រុមប្រឹក្សាភិបាល គ្រឹះស្ថានមីក្រូហិរញ្ញវត្ថុ ប្រាសាក់ ភីអិលស៊ី បាន​ថ្លែងថា​ ជាមួយនឹងលក្ខខណ្ឌម៉ាក្រូសេដ្ឋកិច្ចដ៏អំណោយផល ប្រាសាក់ជាថ្មីម្តងទៀតបានបង្ហាញពីកំណើនដ៏រឹងមាំលើប៉ារ៉ាម៉ែត្រសំខាន់ៗទាំងអស់ រួមទាំងទ្រព្យសម្បត្តិសរុប ប្រាក់បញ្ញើ និងប្រាក់កម្ចី ប្រាក់ចំណេញ ក៏ដូចជា បច្ចេកវិទ្យាហិរញ្ញវត្ថុ។

លោក​បន្តថា ជាលទ្ធផលក្នុង​ដំណាច់ត្រីមាសទី១ឆ្នាំ២០២២ ទ្រព្យសម្បត្តិសរុបមាន៤,៥ ពាន់លានដុល្លារ កើនឡើង ២១,៣៣% បើធៀបនឹងត្រីមាសទី១ឆ្នាំ២០២១។ សមតុល្យប្រាក់បញ្ញើបានកើនឡើងដល់ ២,៧ពាន់លានដុល្លារ ហើយសម្ពៀតឥណទានសរុប ៤ ពាន់លានដុល្លារ។

លោកថ្លែងដូច្នេះថា៖ «យើង​បាន​រៀន​សូត្រ​ច្រើន​ពី​បញ្ហា​ប្រឈម​ក្នុង​រយៈពេល​ប៉ុន្មាន​ឆ្នាំ​កន្លង​មក​នេះ ដែល​ធ្វើ​ឲ្យ​ប្រាសាក់​ក្លាយ​ជា​ស្ថាប័ន​ដ៏​រឹងមាំ និង​ស្ថិរភាព​សម្រាប់​កំណើន​ប្រកប​ដោយ​និរន្តរភាព​រយៈពេល ២៧ ឆ្នាំ»។

លោក​ ​អ៊ុំ​ ​សម​អឿន​ ​ប្រធាន​នាយក​ប្រតិបត្តិ​របស់​ប្រា​សាក់​ ​មានប្រសាសន៍​ថា​ ​ប្រា​សាក់​ ​បាន​ធ្វើ​វិសោធនកម្ម​លក្ខ​ន្តិកៈ​ក្រុមហ៊ុន​ដើម្បី​ដំឡើង​ដើមទុន​ចុះបញ្ជី​ពី​ ៣០០​លាន​ដុល្លារ​ ​ដល់​ ៤០០​លាន​ដុល្លារ​។ ការដំឡើង​ដើមទុន​នេះ​នឹង​ជួយ​ដល់​យុទ្ធសាស្ត្រ​កំណើន​របស់​គ្រឹះស្ថាន​ ​និង​ពង្រឹង​ជំហរ​នៅ​ក្នុង​ទី​ផ្សារ​។​ ​

លោកថ្លែងដូច្នេះថា៖«លើស​ពី​នេះ​ ​ក៏​នឹង​ជួយ​យើង​ពង្រីក​ការ​ផ្ដល់​សេវា​ឱ្យ​កាន់តែ​ទូលំទូលាយ​ ​និង​ធ្វើ​ពិពិធ​កម្ម​ផលិតផល​និង​សេវា​ហិរញ្ញវត្ថុ​របស់យើង​ ​ជាពិសេស​គឺ​ផ្នែក​ឌី​ជី​ថល​។យើងខ្ញុំ​ពិតជា​រីករាយ​និង​សូម​ថ្លែង​អំណរគុណ​យ៉ាង​ស្មោះស្ម័គ្រ​ចំពោះ​ ​ធនាគារជាតិនៃកម្ពុជា​ ​និង​ក្រសួង​ពាណិជ្ជកម្ម​ ​ចំពោះ​ការ​អនុម័ត​និង​ទទួលស្គាល់​ការដំឡើង​ដើមទុន​នេះ​»​។​

ប្រាសាក់បានប្រកាសប្រាក់ចំណេញសុទ្ធ ១៥៥,៥លានដុល្លារក្នុង​ឆ្នាំ២០២១ កើន ៤២,៩% បើធៀបនឹង​ឆ្នាំ២០២០ ដែលមាន​ ១០៨,៨លាន​ដុល្លារ​។នេះបើតាមរបាយការណ៍ប្រចាំឆ្នាំ២០២១ របស់ប្រាសាក់៕