ម៉ូតូកង់បីអគ្គិសនី អនៀន ធីវ័ន មានរូបរាងស្អាតទូលាយ មិនមានសំឡេងរំខាន និងសន្សំសំចៃ កំពុងបង្ហាញពីភាពពេញនិយមនៅលើទីផ្សារកម្ពុជា។រូបភាព៖ ផ្តល់​ដោយ​ លោក សៀង វិរៈ

រោង​ចក្រ​ផ្គុំ​ដំឡើង​ទោ​ចក្រ​យាន​យន្ត ​និង​ត្រី​ចក្រ​យាន​យន្ត​ប្រើ​ថាមពល​អគ្គិសនី ​អនៀន ​ធីវ័ន​ (​Onion ​T1)​ដែល​មាន​ទុន​វិនិយោគ ​២០ ​លាន​ដុល្លារ​ របស់​ Onion Mobility ​ក្រុមហ៊ុន ​នឹង​សម្ពោធ​ដាក់​ឱ្យ​ប្រើ​ប្រាស់​ជា​ផ្លូវ​ការ​នៅ​ថ្ងៃ​ទី​២៤ ​ខែ​ឧសភា ​ឆ្នាំ២០២២​។​

រោង​ចក្រ​នេះ ​ស្ថិត​នៅ​តំបន់​សេដ្ឋ​កិច្ច​ពិសេស​សុវណ្ណ​ភូមិ​ ក្នុង​ស្រុក​កៀន​ស្វាយ ​ខេត្ត​កណ្តាល ​ដែល​ចម្ងាយ​ប្រមាណ ​៣០គីឡូ​ម៉ែត្រ​ពី​រាជ​ធានី​ភ្នំពេញ​។

រោង​ចក្រ​នេះវិនិយោគដោយ​​ក្រុមហ៊ុន​ Onion Mobility Co., Ltd ជា​បុត្រសម្ព័ន្ធ​របស់​ក្រុមហ៊ុន MVL TADA (Cambodia) Co.,Ltd ​កំពុង​ប្រតិបត្តិការ​លើ​សេវាកម្ម TADA App ​សម្រាប់​កក់​យានជំនិះ​ធ្វើដំណើរ​នៅ​កម្ពុជា។

លោក ​សៀង វិរៈ​ ប្រធាន​ផ្នែក​ទីផ្សារ​នៃ​ក្រុមហ៊ុន​ Onion ​Mobility ប្រាប់​ខ្មែរណាស់ថា រោងចក្រនេះនឹង​​ផ្តល់​ឱកាសការងារដល់ប្រជាពលរដ្ឋកម្ពុជារាប់រយកន្លែង​ ពិសេសអ្នកនៅក្នុងតំបន់នោះ​។

លោក​ថ្លែងដូច្នេះថា៖«យើងអាចមានសមត្ថភាពផលិត​ ៣ ០០០ គ្រឿង​ក្នុង​ឆ្នាំ២០២២  ហើយយើងនឹងបង្កើនចង្វាក់​ផលិតកម្ម​របស់​យើង​ឱ្យកាន់តែច្រើនថែម​ទៀត ​ដើម្បីបំពេញតម្រូវការទីផ្សារ​»។

​​ម៉ូតូកង់​បី​អគ្គិសនី​​ដ៏ទំនើប និង​មាន​ផាសុកភាព អាច​បើក​បាន​ចម្ងាយ ១០០ ​គីឡូម៉ែត្រ​នៅពេល​សាក​អាគុយ​ពេញ ឬ​ជា​មធ្យម​ចំណាយ​ប្រហែល ២ ​ដុល្លារ​សម្រាប់​ការធ្វើដំណើរ ១០០ ​គីឡូម៉ែត្រ​។ ការចំណាយ​នេះ​គឺ​ទាប​ជាង ២០ ​ភាគរយ​ បើ​ធៀប​នឹង​ត្រីចក្រយានយន្ត​ប្រើប្រាស់​ឧស្ម័ន LPN ដែល​កំពុង​ចរាចរ​ច្រើន​នៅ​កម្ពុជា​។

ក្រុមហ៊ុន​បាន​បញ្ចេញ​លក់ អនៀន ​ធីវ័ន ​បាន​ជិត ​២០០​ គ្រឿងគិតចាប់តាំងពី​បើក​លក់ជាផ្លូវ​ការ​កាលពីឆ្នាំ២០២១ និង​អ្នក​កុម្ម៉ង់កក់​ប្រមាណ ៥០០ គ្រឿង ហើយ​ក្រុមហ៊ុន​មានផែន​ការ​បញ្ចេញ​លក់ ​អនៀន​ ធីវ័ន ​ឱ្យ​បាន​ ៣​ពាន់​គ្រឿង នៅ​ឆ្នាំ២០២២​៕