ក្រពើនៅក្នុងកសិដ្ឋានមួយកន្លែងនៅខេត្តសៀមរាប កាលពីឆ្នាំ២០១៩។ រូបភាព៖ វេង សាខុន

កសិដ្ឋានចិញ្ចឹមធំៗ​នៅក្នុងខេត្តសៀមរាប​កំពុងប្រឈមនឹង​កង្វះ​ទីផ្សារ​ទាំងក្នុងស្រុក ​និង​ក្រៅស្រុក​​ដែល​នាំឱ្យតម្លៃ​កូន​ពូជនិងក្រពើសាច់​ធ្លាក់ថ្លៃ​យ៉ាងគំហុកក្នុងរយៈពេល​៣ឆ្នាំចុងក្រោយដោយ​ពួកគេ​ត្រដចិញ្ចឹមទាំងខាតចុងខាតដើម​។

លោក វ៉ា ចំណាប់ ម្ចាស់កសិដ្ឋានចិញ្ចឹមក្រពើចំនួន ៣០០ក្បាល នៅឃុំរលួស ស្រុកបាគង ខេត្តសៀមរាប ប្រាប់ខ្មែរណាស់នៅថ្ងៃសុក្រនេះថា តម្លៃក្រពើ​បានធ្លាក់ចុះយ៉ាងខ្លាំងក្នុង​រយៈពេល ៣ឆ្នាំ ចុងក្រោយ​នេះ។ សព្វថ្ងៃ មេក្រពើបានធ្លាក់ថ្លៃមកត្រឹម​ជាង១ ដុល្លារក្នុង១គីឡូក្រាមប៉ុណ្ណោះ​ ដែលធ្វើឱ្យលោកខាតអស់១ម៉ឺនដុល្លារកាលពីឆ្នាំមុន។

លោកថ្លែងដូច្នេះថា៖«ឥឡូវក្រពើវាស៊ីចំណីរាល់ថ្ងៃ មួយខែ២ទៅ៣ ដង យើងពិបាករឿងរកលុយដាក់ចំណីវា។ កូនញាស់មកវាលក់អត់បានតម្លៃ យើងទូទាត់ថ្លៃចំណីអត់រួច ផងហ្នឹង។ និយាយទៅក្នុង១ឆ្នាំចំណាយឱ្យចំណីអស់៥០ដុល្លារក្នុង១ក្បាល»។

លោកបន្តថា ទោះបីជា គ្មានទីផ្សារក៏លោកនៅតែបន្តរបរនេះ ព្រោះមេក្រពើមានតម្លៃថោកគ្មានឈ្មួញមកទិញនោះទេដោយរំពឹងថា​តម្លៃមេក្រពើនឹង​ហក់ឡើងវិញ​នៅពេលអនាគត។​ លោកអំពាវនាវឱ្យ​មាន​វិនិយោគិនពីក្រៅប្រទេស បង្កើតរោចក្រកែច្នៃក្រពើក្នុងស្រុក ដើម្បីនាំចេញទៅទីផ្សារអន្តរជាតិ។

លោកលើកឡើងដូច្នេះថា៖«និយាយទៅផលិតផលយើងមានតែនៅក្នុងស្រុកនាំចេញទៅក្រៅអត់រួច។ ឥឡូវខាងវៀតណាម អត់សូវទិញទេ ហើយថៃក៏បិទជិតតែម្តង អត់ទិញទេ ដោយសារ ថៃ និង​វៀតណាមគេក៏ផលិតបានច្រើនដែរ»។

បច្ចុប្បន្ន នៅខេត្តសៀមរាបមានចំនួនកសិដ្ឋានចិញ្ចឹមក្រពើធំៗមិនមានការថយចុះនោះទេ​គឺមានចំនួន ១៩០ ប៉ុន្តែសម្រាប់ការចិញ្ចឹមលក្ខណៈគ្រួសារមានការបោះបង់មួយចំនួន។​នេះបើ​តាម លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប។​

រូបភាព៖ ហ្វេសប៊ុក Sakhon Veng

លោក​ គឹមសុទ្ធ ប្រាប់ខ្មែរណាស់ថា បើទោះជា ប្រឈមបញ្ហាកង្វះទីផ្សារ ការចិញ្ចឹមក្រពើនៅតាមកសិដ្ឋានខ្នាតធំៗនៅក្នុង​ខេត្តនេះ មិនទាន់មានការបោះបង់ចោលនោះទេ។

លោកថ្លែងដូច្នេះថា៖«ដោយសារស្ថានភាពសេដ្ឋកិច្ច ពាក់ព័ន្ធនឹងតម្លៃក្រពើ ជាពិសេសតម្លៃកូនក្រពើតែម្តង។ អ្នកដែលមានហើយ គាត់នៅតែចិញ្ចឹមដដែល ​អ្នកខ្លះដែលមើលឃើញស្ថានភាពយ៉ាប់ ក៏គាត់យ៉ាប់យឺនខ្លះដែរ។ មិនទាន់មានអ្នកបោះបង់ចោលនៅឡើយនោះទេ គ្រាន់តែថានៅតែចិញ្ចឹមទាំងខាត ដោយរង់ចាំទីផ្សារវិញ»។​

លោកបន្តថា ក្នុងរយៈពេលប៉ុន្មានឆ្នាំចុងក្រោយនេះ កូនក្រពើមានតម្លៃថោកខ្លាំង ដោយកូនក្រពើមួយ១ក្បាលមានតម្លៃត្រឹមជាង១ ដុល្លារ ខណៈមុនអំឡុងការរីករាលដាលជំងឺកូវីដ១៩ កូនក្រពើមានតម្លៃពី៥ ដុល្លារ ទៅ៩ ដុល្លារ ក្នុង១ក្បាល។ ​នេះគឺជាតម្លៃ​នាំចេញទៅប្រទេសវៀតណាម និងប្រទេសថៃ និង​នាំចេញបន្តទៅប្រទេសចិន។

លោកថា កន្លងមកស្បែកក្រពើក៏ត្រូវបាននាំចេញផងដែរ ប៉ុន្តែក្នុងចំនួនតិចតូចប៉ុណ្ណោះ សម្រាប់កែច្នៃជារបស់ប្រើប្រាស់ផ្សេងៗ។

លោកថ្លែងដូច្នេះថា៖«វាពាក់ព័ន្ធនឹងទីផ្សារ កាលណាវាគ្រប់គ្រាន់ ចិនអត់ទទួលយកពីយើងតទៅទៀត ហើយណាមួយយើងពឹងផ្អែកទីផ្សារពីថៃ និងវៀតណាម។ ស្បែកក្រពើរបស់​យើងអត់ត្រូវជាមួយទីផ្សារអន្តរជាតិទេ ដល់ចឹងអត់មានអ្នកណាធ្វើស្បែកលក់ទៀតទេ ធ្វើទៅលុះត្រាតែស្បែកវាល្អដែរ»។

លោកលើកឡើងទៀតថា ការផលិតអាស្រ័យលើទីផ្សារ កាលណាតម្រូវការលើទីផ្សារមានចំនួនលើស ដូច្នេះ ការផលិតរបស់កសិករគ្មានតម្លៃ ស្របពេលការផលិតកូនក្រពើនៅទីផ្សារអន្តរមានចំនួនកើនឡើង។

លោកថ្លែងដូច្នេះថា៖«កាលពីមុនយើងផលិតកូនក្រពើច្រើន ដោយសារ កូនក្រពើវាមានទីផ្សារខ្ពស់មានតម្រូវការច្រើន ប៉ុន្តែឥឡូវនេះ គេចិញ្ចឹម(អ្នកចិញ្ចឹមក្រពើ​នៅក្រៅប្រទេស)វាច្រើនទៅដែរពីរបីឆ្នាំនេះ ដូច្នេះ វាបានកាត់បន្ថយអត្រាការនាំកូនក្រពើពីយើង»។

រូបភាព៖ ហ្វេសប៊ុក Sakhon Veng

របាយការណ៍ក្រសួងកសិកម្ម រុក្ខាប្រមាញ់ និងនេសាទឆ្នាំ២០២១ បានឱ្យដឹងថា កម្ពុជាមានចិញ្ចឹមក្រពើចំនួន ២៩២ ១០០ក្បាល ហើយបច្ចុប្បន្នកម្ពុជាបាននាំចេញកូនក្រពើប្រមាណ ៣២ម៉ឺនក្បាលក្នុង១ឆ្នាំ៕