ភ្ញៀវទេចរបាន​បេះផ្កាបំពង់ក្រឡោមដុះនៅលើឧទ្យានជាតិព្រះមុនីវង្ស «បូកគោ» ។រូបភាព៖ ហ្វេសប៊ុកក្រសួងបរិស្ថាន

ក្រសួង​បរិស្ថាន​បាន​សរសេរ​នៅ​ទំព័រ​ហ្វេស​ប៊ុក​ផ្លូវ​ការ​នៅ​ថ្ងៃ​ទី​១១ ​ឧសភា នេះ​ដោយអំពាវនាវដល់​ភ្ញៀវទេសចរ​ឈប់​បេះ​បំផ្លាញ​ផ្កា​បំពង់​ក្រឡោមដែលជារុក្ខជាតិ​កម្រ​ដុះ​តិច​តួច​នៅកម្ពុជា។

ហ្វេស​ប៊ុក​ក្រសួង​បរិស្ថាន​សរសេរ​ដូច្នេះ​ថា​៖«​ឱ!​ ផ្កា​បំពង់​ក្រឡោម​ អ្វី​ដែល​ពួក​គាត់​កំពុង​ធ្វើ​នេះ ​គឺ​ខុស​ហើយ ​និង​សូម​កុំ​ប្រព្រឹត្ត​ដូច្នេះ​ទៀត​នៅ​ថ្ងៃ​ក្រោយ!​ សូម​អរគុណ​ចំពោះ​ការ​ស្រឡាញ់​ធន​ធាន​ធម្ម​ជាតិ​ ប៉ុន្តែ​កុំ​បេះ​ដូច្នេះ​ វា​ទៅ​ជា​បំផ្លាញ​វិញ​ទេ!​»។

យោងតាមការសិក្សារបស់អ្នកជំនាញ ផ្កាបំពង់ក្រឡោម គេអាចហៅឈ្មោះ​បានជាច្រើនប្រភេទទៀត ដូចជា បំពង់ស្រមោច ឬ ផ្កាបំពង់លុក គឺជាពួករុក្ខជាតិស៊ីសាច់ ដែលគេបានដឹងតិចតួចណាស់នៅកម្ពុជា។

គេហៅវាថាជារុក្ខជាតិស៊ីសាច់ ព្រោះវាអាចចាប់ សម្លាប់ និងរំលាយសត្វដែលចូលទៅក្នុងទម្រង់ស្លឹកពិសេសរបស់វា។

រុក្ខជាតិនេះមានដុះនៅតាមតំបន់ការពារធម្មជាតិនានានៅកម្ពុជា ដូចជា នៅឧទ្យានជាតិព្រះមុនីវង្សបូកគោ នៅតំបន់ខ្នងផ្សារ និងនៅឧទ្យានជាតិជួរក្រវ៉ាញកណ្តាល ជាដើម។

 ផ្កាបំពង់ក្រឡោម ជាប្រភេទរុក្ខជាតិម៉្យាងមានរាងដូចបំពង់ ហើយផ្ទុកសារធាតុម្យ៉ាង ដែលអាចទាក់ទាញសត្វល្អិតឱ្យធ្លាក់ចូលទៅក្នុងបំពង់របស់វា ហើយក៏លង់ទឹកក្នុងបំពង់នោះរហូតដល់ងាប់។

នៅពេលសត្វល្អិតងាប់ហើយ សរីរាង្គពិសេសរបស់វាក៏ចាប់ផ្ដើមបំបែករំលាយសាកសពសត្វល្អិតទៅជាសារធាតុចិញ្ចឹម ធ្វើឱ្យរុក្ខជាតិប្រភេទនេះលូតលាស់បានល្អ។

នៅលើពិភពលោក ផ្កាបំពង់ក្រឡោមនេះមានដល់ទៅ១២៩ប្រភេទ ក្នុងនោះមានប្រាំប្រភេទកំពុងដុះលូតលាស់នៅប្រទេសកម្ពុជា។ រាល់រុក្ខជាតិបំពង់ក្រឡោមទាំងអស់ ត្រូវបានដាក់ក្នុងឧបសម្ព័ន្ធទី២នៃអនុសញ្ញាស្តីពីពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលកំពុងរងគ្រោះ (CITES) ដោយមិនអនុញ្ញាតឱ្យមានការជួញដូរឡើយ៕