កម្មករប្រមូលផល​ដូងប្រេងនៅក្នុងក្រុមហ៊ុន ម៉ុង ឫទ្ធី គ្រុប។រូបភាព៖ ហ្វេសប៊ុក ឯកឧត្តមបណ្ឌិតឧកញ៉ា ម៉ុង ឫទ្ធី​

កម្ពុជា​រំពឹង​ថា​ដូង​ប្រេងឆៅ​ផលិត​នៅ​កម្ពុជា​នឹង​អាច​ចាប់​យក​ចំណែក​ទីផ្សារ​ដូង​ប្រេង​អន្តរជាតិ​បន្ថែម​ទៀត ​បន្ទាប់​ពី​ឥណ្ឌូនេស៊ី​ដែល​ជា​ប្រទេស​នាំចេញ​ដូង​ប្រេង​ដ៏​ធំ​ជាង​គេ​នៅ​លើ​ពិភព​លោក​បាន​ហាម​ឃាត​ការ​នាំ​ចេញ​ដូង​ប្រេង​ ដើម្បី​ទប់​ទល់​នឹង​តម្លៃ​ទំនិញ​ហក់ឡើង​នៅ​ក្នុង​ប្រទេសនេះ​។

លោក ម៉ុង ឫទ្ធី អគ្គនាយក​ក្រុមហ៊ុន ម៉ុង ឫទ្ធី គ្រុប ដែលជាក្រុមហ៊ុននាំចេញ​ដូងប្រេង​ធំជាងគេនៅកម្ពុជា​ ប្រាប់ខ្មែរណាស់ថា ប្រេងដូងកម្ពុជារំពឹង​មានទីផ្សារល្អនាឆ្នាំនេះ បន្ទាប់ពី​ឥណ្ឌូនេស៊ីដែលជាប្រទេសផលិតប្រេងដូងធំមួយ​នៅលើពិភពលោក​​បានប្រកាសហាមឃាត់ការនាំចេញ​ដូងប្រេងជាបណ្តោះអាសន្ន​។​

លោកថ្លែងដូច្នេះថា៖« ចំពោះឱកាសនេះ​វាជាការល្អមួយដែរ ប៉ុន្តែប្រេងដូង​វាផលិតមក​បាន​ដោយការ​​ប្រើកម្លាំង​ពលកម្ម​ និងចាក់​​ប្រេងម៉ាស៊ូត​និងសាំង​ ដើម្បីដឹកជញ្ជូន​ ប្រមូលផល​ និងចូល​រោងចក្រកែច្នៃ ដូច្នេះ ​កម្ពុជា​មិនអាចមិននាំចេញ​ដូងប្រេងបានទេ»។

លោកថ្លែងបន្តទៀតថា៖«ប្រេងឆៅយើង​ទុកយូអត់បានទេ យើង​អត់មានរោងចក្រកែច្នៃ​ទៅជាប្រេងឆា ឬប្រេងចាក់ឡាន​បានទេ​ យើងមានតែប្រេងដូងឆៅ​ យើងត្រូវតែនាំចេញ។ រីឯនៅឥណ្ឌូនេស៊ី​ ម៉ាឡេស៊ី និងថៃ គេមានរោងចក្រ​កែច្នៃដូងទៅជាប្រេង​សម្រាប់​ចាក់ឡាន​បាន អីចឹង​ យើងមានតែប្រេងឆៅតែប៉ុណ្ណោះ​ យើងត្រូវតែនាំចេញមិនអាច​ទុក​បាននោះទេ​»។

លោកប្រធានាធិបតីឥណ្ឌូនេស៊ី Joko Widodo បានប្រកាសកាលពី​ចុងខែ​មេសាថា ឥណ្ឌូណេស៊ីនឹងលែងឱ្យនាំចេញប្រេងដូង ដើម្បីធានាលទ្ធភាពទទួលបានអាហារ និងប្រេងចម្អិនអាហារនៅក្នុងប្រទេសនេះ​ ដោយសារ​កង្វះខាតវត្ថុធាតុ​ដើម​ក្នុងស្រុក​។

សេចក្តីថ្លែងការណ៍របស់​ប្រធានាធិបតីមួយថ្លែងថា៖«ខ្ញុំនឹងបន្តតាមដាន និងវាយតម្លៃការអនុវត្តគោលនយោបាយនេះ ដើម្បីឱ្យលទ្ធភាពទទួលបានប្រេងចម្អិនអាហារនៅក្នុងប្រទេសមានច្រើនក្រៃលែងក្នុងតម្លៃសមរម្យ»។

ដូងប្រេងគឺជា​វត្ថុធាតុដើម​ដ៏សំខាន់សម្រាប់​ច្នៃ​ជា​ចំណីអាហារ ថាមពល ឱសថ និង​គ្រឿងសម្អាង​។

បច្ចុប្បន្ន កង្វះជម្រើសជំនួសប្រេងដូង ​មាន​កាន់តែធ្ងន់ធ្ងរឡើងដោយសង្រ្គាមនៅអ៊ុយក្រែន ព្រោះ​អ៊ុយក្រែនជាអ្នកផលិត និងនាំចេញប្រេងផ្កាឈូករ័ត្នដ៏សំខាន់ បានជំរុញឱ្យតម្លៃប្រេងកែច្នៃ​ពី​បន្លែនៅទូទាំងពិភពលោកកើនឡើង។

ប្រទេសឥណ្ឌូនេស៊ី​បាន​ចេញដូងប្រេងប្រហែល ៦០% នៅលើពិភព​លោក​ដែល​ចិននិងឥណ្ឌាជាអ្នកប្រើប្រាស់ច្រើនជាងគេ។

ក្នុងឆ្នាំ ២០២០-២០២១ ឥណ្ឌាបាននាំចូលប្រេងដូងចំនួន ៨,៥ លានតោន ខណៈ​ចិនបានបញ្ជាទិញយ៉ាងតិច ៦,៨ លានតោន ដែលគេ​រំពឹងថានឹងកើនឡើងដល់ ៧,២ លាននៅឆ្នាំ ២០២១-២០២២។

លោក ម៉ុង ឫទ្ធី ថ្លែងទៀតថា តម្លៃដូងប្រេង​ឆៅនៅលើទីផ្សារអន្តរជាតិ​កំពុង​ហក់ឡើងគួរឱ្យកត់សម្គាល់​ក្នុងរយៈពេលប៉ុន្មានខែដើមឆ្នាំ​២០២២។ តម្លៃ​ដូងប្រេងនៅលើទីផ្សារអន្តរជាតិឆ្នាំ ២០២១ ជាមធ្យម ៩៨៨ ដុល្លារ​ក្នុង​១តោន​ ហើយបានកើនដល់ជាង១ពាន់​ដុល្លារ​ក្នុង១តោន​ក្នុងដើមឆ្នាំនេះ។

​លោកបន្តថា៖« សម្រាប់រយៈពេល​៤ខែដើម​ឆ្នាំ២០២២តម្លៃជាមធ្យម ១ ៥២០ដុល្លារ​ក្នុង​១តោន​ ហើយ ក្នុងឆ្នាំ២០២២ តម្លៃនឹង​កើនដល់ជាមធ្យម​ ១ ១៩០ ដុល្លារក្នុង​១តោន»​។​

បច្ចុប្បន្ន ក្រុមហ៊ុន ម៉ុង ឫទ្ធី គ្រុប កំពុងវិនិយោគដំាដូងប្រេង​លើផ្ទៃដី​ជាង២ម៉ឺន​ហិកតា​ នៅក្នុងខេត្តព្រះសីហនុ​។ក្រុមហ៊ុននេះបានចាប់ផ្តើមវិនិយោគ​លើដំណាំដូងប្រេង​តាំងពី​ឆ្នាំ១៩៩៦។

បើតាម​ទិន្នន័យ​ក្រសួង​កសិកម្ម រុក្ខាប្រមាញ់ និងនេសាទ ​ក្នុង​ឆ្នាំ​ ២០២១ កម្ពុជា​បាន​នាំចេញ​ដូងប្រេងជាង ៦២ ២១៦ ​តោន កើន ១៤,២២ ​ភាគរយ​បើ​ធៀប​ឆ្នាំ ​២០២០ ក្នុងនោះ​នាំទៅ​ប្រទេស​ឥណ្ឌាជាង ៤៨ ៩៧៦ ​តោន និង​ម៉ាឡេស៊ី ១៣ ២៤០ ​តោន៕