ត្រីបបែលទឹកសាបទន្លេមេគង្គ ត្រូវបានអ្នកនេសាទចាប់បាននៅថ្ងៃទី៤ឧសភា ឆ្នាំ២០២២។ រូបភាព៖Wonders of the Mekong

ត្រី បបែល យក្សទម្ងន់១៨០គីឡូក្រាម ដែលត្រូវបានគេចាត់ទុកថា ជាប្រភេទត្រីកំពុងរងគម្រាមគំហែង ត្រូវបានក្រុមអ្នកអភិរក្សដោះលែងចូលទៅក្នុងទន្លេមេគង្គវិញ ក្រោយពលរដ្ឋនៅខេត្តស្ទឹងត្រែង នេសាទបានដោយចៃដន្យកាលពីថ្ងៃទី៤ឧសភា ឆ្នាំ២០២២នេះ។

លោកស្រី ជា សីលា ប្រធានគម្រោងអច្ឆរិយភាពនៃទន្លេមេគង្គ(Wonders of the Mekong) បានប្រាប់សារព័ត៌មានខ្មែរណាស់តាមប្រព័ន្ធតេឡេក្រាមនៅថ្ងៃទី៩ឧសភានេះថា ត្រីបបែល គឺជាប្រភេទត្រីទឹកសាបធំជាងគេ អាចមានទម្ងន់សរុបរហូត៦០០គីឡូក្រាម និងជាប្រភេទត្រីកំពុងរងការគម្រាមគំហែង នៅក្នុងបញ្ជីក្រហមរបស់អង្គការអាយយូស៊ីអ៊ិន។

ក្រុមអ្នកអភិរក្សចុះដោះលែងត្រីបបែលទឹកសាបចូលទន្លេមេគង្គវិញ ក្រោយអ្នកនេសាទចាប់បាន។ រូបភាព៖Wonders of the Mekong

ទំព័រហ្វេសប៊ុករបស់គម្រោងអច្ឆរិយភាពទន្លេមេគង្គបានលើកឡើងថា ត្រី បបែល ញីមួយក្បាលទម្ងន់១៨០គីឡូក្រាម និងមានទំព័រហ្វេសប៊ុករបស់គម្រោងអច្ឆរិយភាពទន្លេមេគង្គបានលើកឡើងដែរថា ត្រី បបែល ញីមួយក្បាលទម្ងន់១៨០គីឡូក្រាម និងមានទទឹងប្រវែង១៨៥សង់ទីម៉ែត្រ បណ្ដោយមានប្រវែង២០០សង់ទីម៉ែត្រ ឬបើគិតពីក្បាលដល់ចុងកន្ទុយមានប្រវែង៣៩៣សង់ទីម៉ែត្រ ត្រូវបានពលរដ្ឋនេសាទបានដោយចៃដន្យ ស្ថិតក្នុងភូមិកោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែង។

ក្រុមអ្នកអភរក្សកំពុងវាស់វែងត្រីបបែល មុនដោះលែងចូលទន្លេមេគង្គវិញ។ រូបភាព៖Wonders of the Mekong

ក្រោយពីនេសាទបានប្រភេទត្រីជិតផុតពូជនៃទន្លេមេគង្គនេះ ពលរដ្ឋបានរាយការណ៍ទៅ​ក្រុមគម្រោង​អច្ឆរិយភាព​នៃ​មេគង្គ​ភ្លាមៗ ដើម្បីសុំឱ្យចុះពិនិត្យ និង​​ដោះលែង​ឱ្យ​ទៅ​រស់នៅក្នុងទឹកវិញ។

ទន្លេមេគង្គ ជាទន្លេមួយដែលហូរឆ្លងកាត់ប្រទេសចំនួនប្រាំមួយ នៅក្នុងតំបន់អាស៊ីអាគ្នេយ៍ និងជាជម្រករបស់ត្រីយក្សជាច្រើនប្រភេទ និងច្រើនជាងទន្លេនានានៅក្នុងពិភពលោក។

ត្រីធំៗទាំងនោះ មានដូចជា ត្រីគល់រាំង ជាប្រភេទត្រីមានស្រកាធំជាងគេលើពិភពលោក។ ត្រីបបែលយក្ស ជាសត្វដ៏អាថ៌កំបាំង ដែលទើបត្រូវបានអ្នកវិទ្យាសាស្ត្រ និងកំណត់ត្រារបស់ពិភពលោកនាពេលបច្ចុប្បន្នលើកឡើងថា គឺជាប្រភេទត្រីទឹកសាបមានទំហំដ៏ធំមហិមា ដែលរស់នៅតែក្នុងតំបន់ទឹកសាប និងត្រីរាជដែលមានទម្ងន់រហូតដល់២៩៣គីឡូក្រាម។

ទន្លេមេគង្គ ត្រូវបានគេចាត់ទុកថា ជាមាតាគង្គា។ យ៉ាងហោចណាស់មានត្រីចំនួន១ពាន់ប្រភេទ ត្រូវបានគេរកឃើញនៅទូទាំងអាងទន្លេមេគង្គ ហើយក៏នៅមានត្រីជាច្រើនប្រភេទទៀត មិនទាន់ត្រូវបានគេរុករកឃើញនៅឡើយ៕