សម្ព័ន្ធធនាគារអេស៊ីលីដា មានបណ្តាញប្រតិបត្តិការចំនួន ៣១៩ សាខា នៅកម្ពុជា សាធារណរដ្ឋប្រជាធិបតេយ្យប្រជាមានិតឡាវ និងសាធារណរដ្ឋសហភាពមីយ៉ាន់ម៉ា។ រូបភាព៖ ហ្វេសប៊ុក ធនាគារអេស៊ីលីដា

ធនាគារ​អេស៊ីលីដា​ដែល​ចុះ​បញ្ជី​នៅ​ផ្សារ​មូលបត្រ​កម្ពុជា​ បាន​ឱ្យដឹងថា ​ការ​ធ្វើ​ប្រតិបត្តិការ​ហិរញ្ញ​វត្ថុ​របស់​ធនាគារ​អេស៊ីលីដា​តាម​ប្រព័ន្ធ​ឌីជីថល​កំពុង​មាន​កំណើន​ជា​លំដាប់​ដែល​អ្នក​ចុះឈ្មោះ​ប្រើ​ប្រាស់​ប្រព័ន្ធ​ឌីជីថល​មាន​ជាង​ ២,៣ ​លាន​នាក់​ គិត​ត្រឹម​ខែមីនា​ ឆ្នាំ ២០២២​។​

លោក ​អ៊ិន ​ចាន់នី ​ប្រធាន​នាយក​ប្រតិបត្តិធនាគារ​អេស៊ីលីដា​ ភីអិលស៊ី។រូបភាព៖ ហ្វេសប៊ុក ធនគារអេស៊ីលីដា

លោក ​អ៊ិន ​ចាន់នី ​ប្រធាន​នាយក​ប្រតិបត្តិធនាគារ​អេស៊ីលីដា​ ភីអិលស៊ី ​បាន​ថ្លែងប្រាប់អ្នកសារព័ត៌មាន​ក្នុងកម្មវិធីជួបជុំនាយក-នាយិកាសាខានៅក្រុងព្រះសីហនុ កាលពីថ្ងៃ២៩ មេសាថា ក្នុងចំណោម​អ្នកចុះឈ្មោះ ២,៣ លាននាក់​មាន​អ្នល​ប្រើប្រាស់​សកម្ម​ជាមធ្យមជាង ១លានប្រតិបត្តិការ​ក្នុង១ថ្ងៃៗ។

លោក​ថ្លែងដូច្នេះថា៖«​​ក្នុង​ស្ថានភាព​ដ៏​លំបាកដែលមានការ​បិទ​ខ្ទប់ និង​ក្តីបារម្ភ​ពីប៉ះពាល់សុខភាព​ការ​ឆ្លង​ជំងឺ​កូវីដ​១៩ គាត់ចាប់ផ្តើមកុម្ម៉ង់ទំនិញតាមឌីជីថល​ ពេលនោះហើយ​ កំណើន​​​គាត់​​​​ចុះ​ឈ្មោះ​ប្រើប្រាស់​ប្រព័ន្ធ​ឌីជីថល​​របស់​ធនាគារ​អេស៊ីលីដា​ហក់​ឡើង​យ៉ាង​លឿន​»។​

លោកបន្ថែមថា ក្នុងឆ្នាំ ២០២២ ធនាគារអេស៊ីលីដានឹងជំរុញ​ចំនួននេះ​ឱ្យកើនដល់​ប្រមាណ ៩៧%នៃប្រតិបត្តិការទាំងអស់ យើងទុក ៣% សម្រាប់អ្នក​ដកសាចប្រាក់នៅតាមបញ្ជរ(ATM) ហើយធនាគារអេស៊ីលីដានឹង​បន្តជំរុញអតិថិជន​ដែលនៅ​សល់​ប្រហែល​ ៧០​ម៉ឹន​នាក់​ទៀតឱ្យ​​ប្រើ​ប្រាស់​ប្រព័ន្ធឌីជីថល​របស់ខ្លួន​។​

លោកថ្លែងបន្តថា៖«យើង​មាន​ជាង ៣ លានគណនី​របស់​ធនាគារអេស៊ីលីដា ដូច្នេះ យើងចង់ឱ្យគាត់ទាំងអស់ប្រើប្រាស់App យើង។យើង​​នៅ​សល់ប្រមាណ​ ៧០​ម៉ឹន​នាក់​ទៀត​ប៉ុណ្ណោះ​មិន​ទាន់​ប្រើ​ប្រាស់​​»។​

ក្នុង​ឆ្នាំ២០២១ សម្ព័ន្ធធនាគារអេស៊ីលីដា មានទ្រព្យសកម្មសរុប ៧ ៨៥៥ លាន​ដុល្លារ កើនឡើង ១៩,៩០% និង​សេវាបញ្ញើ-សន្សំមាន​ជាង ៥ ៧១៦ លាន​ដុល្លារ​​ កើន ២៣,៩៦% បើធៀបនឹង​ឆ្នាំ២០២០។

សម្ព័ន្ធធនាគារអេស៊ីលីដា មានបណ្តាញប្រតិបត្តិការចំនួន ៣១៩ សាខា នៅកម្ពុជា សាធារណរដ្ឋប្រជាធិបតេយ្យប្រជាមានិតឡាវ និងសាធារណរដ្ឋសហភាពមីយ៉ាន់ម៉ា។

របាយកការណ៍​ប្រចាំឆ្នាំ ២០២១ នៃធនាគារជាតិ​នៃកម្ពុជា ឱ្យដឹងថា ប្រព័ន្ធ​ធនាគារ​កម្ពុជា​បន្ត​មានស្ថិរភាព និងភាពធន់ ព្រមទាំង​បានចូលរួម​យ៉ាងសកម្មក្នុងការ​កាត់បន្ថយ​ផល​ប៉ះពាល់ពីវិបត្តិ និងគាំទ្រ​កម្ម​ភាព​សេដ្ឋកិច្ច។

របាយការណ៍នេះ​បង្ហាញទៀតថា ក្នុងឆ្នាំ ២០២១ វិស័យធនាគារមានទ្រព្យសកម្ម​បាន​កើន​ ១៨ % ដល់​ ៥៥,១ ពាន់លានដុល្លារ និង​ប្រាក់បញ្ញើបាន​កើនឡើង ២០,៨ % ដល់ ៣២,៧ ពាន់លាន​ដុល្លារ៕