លោក សុង សារ៉ន អគ្គនាយកក្រុមហ៊ុន AMRU Rice Cambodia ជាក្រុមហ៊ុននាំចេញអង្ករឈានមុខមួយ​នៅកម្ពុជា​។រូបភាព៖ ហ្វេសប៊ុក សុង សារ៉ន

ការនាំចេញអង្ករកម្ពុជាទៅកាន់ទីផ្សារសហគមអឺរ៉ុប​មានសន្ទុះងើបឡើងយ៉ាងឆាប់រហ័សដែលបានក្លាយទីផ្សារធំទី២ បន្ទាប់ពីទីផ្សារក្នុង​ប្រទេសចិនគឺមានចំណែកទីផ្សារ៣១%នៃទីផ្សារសរុបក្នុងត្រីមាសទី១ឆ្នាំ២០២២។​ 

ការនាំចេញកើនឡើងនេះ បន្ទាប់ពី​វិធានការរក្សាការពារពីសហគមអឺរ៉ុបដែល​យកពន្ធនាំចូលអង្ករពីកម្ពុជា​បានផុតកំណត់ហើយ កាលពីថ្ងៃទី២១ ខែមករា ឆ្នាំ២០២១កន្លងមក។ សហគមអឺរ៉ុបានយកពន្ធនាំចូលអង្ករពីកម្ពុជាក្នុងរយៈពេល៣ឆ្នាំជាប់គ្នាគិតចាប់ពីឆ្នាំ២០១៩។

ជុំវិញបញ្ហានេះ លោក ធូ វិរៈ អ្នករាយការណ៍ព័ត៌មានខ្មែរណាស់ បានសម្ភាសន៍លោក សុង សារ៉ន អគ្គនាយកក្រុមហ៊ុន AMRU Rice Cambodia ជាក្រុមហ៊ុននាំចេញអង្ករឈានមុខមួយ​នៅកម្ពុជា​ មានខ្លឹមសារសំនួរ-ចម្លើយដូចខាងក្រោម។

នេះគឺប្រភេទអង្ករសែនក្រអូបរបស់ក្រុមហ៊ុន AMRU Rice Cambodia ដែលបាននាំចេញទៅកាន់ទីផ្សារអន្តរជាតិ។រូបភាព៖ ហ្វេសប៊ុក AMRU Rice

លោក ធូ វិរៈ៖ តើលោកយល់ឃើញយ៉ាងណា បន្ទាប់វិធានការរក្សាការពារត្រូវបានផុតកំណត់កាលពីដើមឆ្នាំនេះ?

លោក សុង សារ៉ន៖ ទាក់ទងនឹងទីផ្សារនៅសហគមអឺរ៉ុប ក្នុង​មួយរយៈ​ពេលនេះ យើងឃើញថា​ ការនាំចេញអង្ករកម្ពុជា​មានសន្ទុះ​ងើបឡើងគួរឱ្យកត់សម្គាល់ ក្នុងអំឡុងសហគមអឺរ៉ុប​បានលើកលែងវិធានការរក្សាការពារ(safeguard measure) ដែលលែកយកពន្ធនាំចូលអង្ករពីកម្ពុជា បាននាំឱ្យសន្ទុះនាំចេញអង្កររបស់យើង​ងើបឡើងជាង ៣០ ភាគរយ​ បើធៀបនឹងឆ្នាំ២០២០ និង២០២១។

វិធានការរក្សាការពារពីសហគមអឺរ៉ុប​ត្រូវ​បានផុតកំណត់ហើយ កាលពីថ្ងៃទី២១ ខែមករា ឆ្នាំ២០២២។

លោក ធូ វិរៈ៖ តើក្រុមហ៊ុន  AMRU RICE Cambodia សម្លឹងឃើញភាពរីកចម្រើននៃការនាំចេញអង្ករកម្ពុជានៅទីផ្សារអឺរ៉ុបដូចម្តេច?

លោក សុង សារ៉ន៖ ចំពោះ ក្រុមហ៊ុន AMRU RICE ក៏បាននាំចេញអង្ករមានកើនឡើង​ទៅកាន់សហគមអឺរ៉ុបដែរគឺជាង ៣០ ភាគរយក្នុងរយៈពេល៣ដំបូងដើមឆ្នាំនេះ​។ កំណើនដែលយើងឃើញមានការងើបឡើងវិញនេះ ដោយសារកត្តា២គឺទី១ អង្ករកម្ពុជារួចពន្ធនាំចូលទៅសហគមអឺរ៉ុប និងទី២ ដោយសារការដឹកជញ្ជូនទំនិញមានភាពល្អប្រសើរជាងឆ្នាំ២០២១ បើទោះជា តម្លៃដឹកជញ្ជូននៅតែថ្លៃ​ខ្លាំងដូចឆ្នាំ២០២១ ប៉ុន្តែ​វាល្អប្រសើរជាង ព្រោះសំបូរទូរកុងតឺន័រ។

លោក ធូ វិរៈ៖ តើប្រភេទអង្ករអ្វីខ្លះមានទីផ្សារល្អនៅអឺរ៉ុប? ហេតុអ្វី?

លោក សុង សារ៉ន៖ ប្រភេទអង្ករដែលភាគច្រើនយើងនាំចេញទៅកាន់ទីផ្សារសហគមអឺរ៉ុបគឺប្រភេទអង្ករក្រអូប អង្ករល្អប្រណិត និងអង្ករសរីរាង្គ។​ហើយទីផ្សារអឺរ៉ុបនៅតែជាទីផ្សារខ្លាំង ដែលយើង​អាចឈរជើងបាន មានកេរ្តិ៍ឈ្មោះល្បីល្បាញ​ ពិសេសផ្តល់ដល់អ្នកហូប(អ្នកប្រើប្រាស់)ដែលជាជនជាតិអាស៊ីដែលគាត់រស់នៅប្រទេសបារំាង​ នៅទីនោះ ក៏មានប្រជាពលរដ្ឋខ្មែរយើងគាំទ្រផលិតផលយើងច្រើនដែរ ហើយយើងបានសាយភាយទៅដល់​តំបន់អឺរ៉ុបខាងកើត ដូចជា ហូឡង់ អាលឺម៉ង់ ប៊ែលហ្សិក និងអង់គ្លេស រហូតដល់តំបន់អឺរ៉ុបប្រទេសអ្នកមានមួយចំនួនទៀតដែលមានមូលដ្ឋាននៅអឺរ៉ុបខាងជើង មានប្រទេសហ្វាងឡង់ ដាណឺម៉ាក ស្វីស និង​ណ័រវេ។ទីនោះគឺទីផ្សារអង្ករសរីរាង រឹងមាំមែនតែនទីផ្សារសរីរាង្គរបស់យើង​ មានភាពល្បីល្បាញ ឈរជើង​រឹងមាំនៅក្នុងទីផ្សារក្នុងតំបន់អឺរ៉ុបខាងជើង។

ចំណែក ទីផ្សារនៅអឺរ៉ុបខាងកើតយើងនៅចាញ់គេនៅឡើយ​ ដោយសារអឺរ៉ុបខាងកើត ដែលភាគច្រើនគាត់ទិញតែអង្ករដែលមានតម្លៃថោក។ អង្ករមានតម្លៃថោកយើងពិបាកប្រកួតប្រជែងជាមួយមីយ៉ាន់ម៉ា(ភូមា) យើងអត់អាចមានឱកាសបាន​ដូចភូមាទេ ដោយសារអង្ករភូមាមានតម្លៃថោកខ្លាំងជាងអង្ករយើង។

លោក ធូ វិរៈតើក្រុមហ៊ុន AMRU RICE មានផែនការនាំចេញអង្ករទៅទីផ្សារអឺរ៉ុបចំនួនប៉ុន្មានតោន? អង្ករប្រភេទអ្វីខ្លះ?

លោក សុង សារ៉ន៖ ចំពោះ ផែនការរបស់ក្រុមហ៊ុន AMRU RICE យើងផ្តោតទៅលើការនាំចេញអង្ករសរីរាង្គ​ទៅកាន់សហគមអឺរ៉ុបប្រហែលជា១ម៉ឺនតោននៅឆ្នាំ២០២០។ ហើយប្រភេទអង្ករល្អប្រណិត អង្ករក្រអូប​ ប្រហែលជាង២ម៉ឺនតោន​ ដូច្នេះយើងមានផែនការនាំចេញទាំងអស់ខ្ទង់៣ម៉ឺនតោន​ទៅកាន់ទីផ្សារសហគមអឺរ៉ុបនេះ។ ហើយស្ថានភាពយើងក្នុងរយៈពេល ៣ខែនេះ យើងឃើញថាមានភាពល្អប្រសើរ​ ដែលយើងនឹងអាចសម្រេចគោលដៅនេះ​ ប្រសិនបើការដឹកជញ្ជូន​មានភាពធូរស្បើយ រឹតតែមានលទ្ធភាព​ មានកុងតឺន័រគ្រប់គ្រាន់​ តម្លៃសមរម្យ យើង​នឹងអាចសម្រេច​គោលដៅនេះ ឬក៏លើសនេះ។

យោងតាមទិន្នន័យពីសហព័ន្ធស្រូវអង្ករកម្ពុជា ​(CRF) កម្ពុជា​នាំចេញ​អង្ករ​ក្នុង​បរិមាណ​សរុប ១៧០ ៥៣៩​តោន​ ​មាន​តម្លៃជាប្រាក់​​ជាង ១០០ លាន​​ដុល្លារ​ក្នុង​ត្រី​មាសទី១ ឆ្នាំ ២០២២ កើនឡើង ១០,៩៦ ភាគ​រយ​ បើធៀប​នឹង​រយៈ​ពេល​ដូចគ្នា​កាលពី​ឆ្នាំមុន។​ ក្នុងនោះ ទីផ្សារអឺរ៉ុបឈរលំដាប់ទី២ បន្ទាប់ពីទីផ្សារចិន ដែលមានបរិមាណ ៥២ ២២២តោន មានតម្លៃជាប្រាក់ជិត ៣៦ លានដុល្លារ៕