កម្មករម្នាក់កំពុងប្រមូលគ្រាប់​ស្វាយចន្ទីច្រកចូលបេ និងចងមាត់បេថ្លឹងលក់ឱ្យ​ឈ្មួញប្រមូលទិញ​ការពីដើមខែមេសា ឆ្នាំ ២០២១។ រូបភាព៖ ផ្តល់ឱ្យ​ពី​ប្រជាកសិករ​ក្នុង​ស្រុកសណ្តាន់ ឃុំទំរីង ខេត្តកំពង់ធំ

ចាប់តាំង​ពីដើម​ឆ្នាំ ២០២២ រហូតមក​ដល់ពេលនេះ តម្លៃថ្នាំ និង​ជីកសិកម្ម បន្ត​ហក់ឡើង​ទ្វេដងដែល​ធ្វើ​ឱ្យ​កាត់បន្ថយ​ប្រាក់ចំណេញរបស់​ប្រជាកសិករ​ស្របពេល​តម្លៃទំនិញ​ភាគច្រើន​នៅលើទីផ្សារ​កើន​ឡើង​ឥតឈប់ឈរ។​

បុរសវ័យ​កណ្តាលសម្បុររាងខ្មៅគឺ​លោក ថុង សុភាព ដែល​បានដឹកស្វាយចន្ទីបីបាវលើ​ម៉ូតូមកពីចម្ការឈប់នៅក្រោមផ្ទះបានផ្តល់​បទសម្ភាសន៍ជាមួយសារព័ត៌មានខ្មែរណាស់ថា ​ទិន្នផល​ស្វាយចន្ទីរបស់លោក​បាន​កើនឡើងជារៀងរាល់ឆ្នាំ​។​ ជាក់ស្តែង ឆ្នាំនេះ ស្វាយចន្ទីផ្តល់​ផលបានជាង២០តោន​ ខណៈ​ឆ្នាំទៅ​ប្រមូល​បានជាង១០តោន។

កសិករដាំ​ស្វាយចន្ទីលើផ្ទៃដីសរុប ៤០ ហិកតា​នៅខេត្តព្រះវិហាររូបនេះ កត់សម្គាល់ថា ទោះបីយ៉ាងណា សព្វ​ថ្ងៃ ថ្នាំបាញ់សម្លាប់ស្មៅ និងថ្នាំបាញ់សម្លាប់​សត្វល្អិត​បានឡើងថ្លៃខ្លាំងណាស់​​។​

លោក អះអាងថា តម្លៃថ្នាំ​បាញ់​ស្មៅបានកើនពី ២៣០ ០០០រៀល ដល់ ៥២០ ០០០ រៀលក្នុង ១កេស ខណៈ​ ថ្នាំបាញ់សម្លាប់សត្វ​ល្អិត​(ប្រភេទម្សៅ)បានកើនពី ៦០០ ០០០រៀលក្នុង១កេស ដល់ ៩០០ ០០០រៀលក្នុង១កេស។​

ចំណែក ជីទឹកសម្រាប់​បំប៉នលើដំណាំ​ស្វាយចន្ទី​បាន​កើនឡើងគុណនឹងពីរបើប្រៀបធៀបនឹងឆ្នាំទៅ។ឆ្នាំនេះ តម្លៃជីទឹក​​មាន​តម្លៃ ​៥០០ ០០០រៀល​ក្នុង​១កេស(២០ដប់)ហើយ តម្លៃនេះ​មាន​ការប្រែប្រមួលខុសៗគ្នា​ទៅតាម​ប្រភេទជីនីមួយៗ។

លោកប្រាប់ខ្មែរណាស់ដូច្នេះថា៖«ខ្ញុំ​ចំណាយអស់​ប្រមាណមួយម៉ឺនដុល្លារ​សម្រាប់ទិញជី បំប៉ននិងថ្នាំ​សម្លាប់សត្វ​ល្អិត​​ក្នុង១រដូវនៅ​លើផ្ទៃដីសរុប ៤០ ហិកតា។ នេះ​យើង​មិន​គិតពីការ​ចំណាយលើ​តម្លៃកម្លាំង​ពលកម្ម និងប្រេងម៉ាស៊ូតផង។អញ្ចឹងក៏ដោយ យើងនៅតែទទួល​បានប្រាក់ចំណេញខ្លះ​ តែ​មិនច្រើនទេ»។

លោកបន្ថែមទៀតថា នារដូវប្រមូល​ឆ្នាំនេះ តម្លៃ​ស្វាយចន្ទីស្រស់មាន​តម្លៃជាមធម្យម​ចន្លោះពី ៣ ៥០០រៀល ទៅ ៣ ៨០០រៀលក្នុង​១គីឡូក្រាម និង​ស្វាយចន្ទីស្ងួតមាន​តម្លៃចន្លោះពី៤ ០០០រៀល ទៅ ៥០ ០០រៀលក្នុង​១គីឡូក្រាម។តម្លៃនេះ ធ្លាក់ចុះជាងឆ្នាំមុន​ជាមធ្យម​ ៥០០ រៀលក្នុង១គីឡូក្រាម។​

លោកថ្លែងយ៉ាងដូច្នេះថា៖«ខ្ញុំ​ឃើញថាស្វាយចន្ទី​មាន​តម្រូវ​ការទីផ្សារ​ល្អ​នៅ​លើពិភពលោកព្រោះជាដំណាំឧស្សាហកម្មដែល​អាចកែច្នៃវិចខ្ចប់សម្រាប់នាំចេញបាន​។ បើទោះជា តម្លៃចន្ទីឡើងចុះពី១ឆ្នាំទៅ១ឆ្នាំ ក៏​យើងអាចលក់ចេញបានដោយ​មិនពិបាករកទីផ្សារ​ ដូចនឹងកសិផលហូបផ្លែ​ផ្សេងទៀត»។​

កសិករម្នាក់ទៀត លោក វ៉ាន់ សំណាង មានចម្ការស្វាយចន្ទី និងដំឡូងមី លើផ្ទៃ​ ៣០ ហិកតា ស្ថិត​ក្នុងស្រុកសណ្តាន់ ឃុំទំរីង ខេត្តកំពង់ធំ បានឱ្យដឹងថា ក្នុងតំបន់​របស់​លោក​ ជីនិងថ្នាំកសិកម្ម​ឡើងថ្លៃគ្រប់ប្រភេទ។ ជាក់ស្តែង ជីស(ជីអ៊ុយរេ) តម្លៃបានហក់ឡើងពី ៩០ ០០០រៀល ដល់ចន្លោះពី ១៦០ ០០០រៀល ទៅ ១៨០ ០ ០០រៀលក្នុង១បាវ។

លោកថ្លែងដូច្នេះថា៖«យើងគិតមើល កាលពីមុនជីសមានតម្លៃ ៩ ០០០០រៀល ស្ទើតែគ្មានលុយទិញប្រើផង ចុះទម្រាំវាឡើងគុណនឹងពីរដងទៀត គ្រាន់តែ១ហិកតា យើងចំណាយ​លើជីអស់ពី ៥០ម៉ឺនទៅ ៦០ម៉ឺនរៀល ហើយ​ផលដែល​យើង​បាន​មកវិញ​ស្ទើតែទប់ទលនឹងតម្លៃជីមិន​រួច»។

លោក សំណាង បញ្ជាក់ថា ក្នុងរដូវប្រមូល​ឆ្នាំ២០២២ តម្លៃ​ដំឡូងមីស្រស់ក៏ធ្លាក់ថ្លៃដែរគឺ ៣៣០ រៀលក្នុងគីឡូក្រាម​ បើធៀបនឹង​ឆ្នាំមុន​ ៣៧០ រៀលកក្នុង១គីឡូក្រាម។​ លោកនិយាយដូច្នេះថា៖«កសិករឥឡូវ​ ពិបាកណាស់ ការចំណាយលើកម្លាំងពលកម្ម ​ជី និង​ថ្នាំកសិកម្មកាន់តែកើនឡើងពី១ឆ្នាំទៅ១ឆ្នាំ​។ យើងចំណាយច្រើន ដល់ពេលយើង​លក់វិញ​គ្មានបានចំណេញប៉ុន្មានទេ​ ទូទាត់ទៅ ១ហិកតា​ សល់លុយ ២ ទៅ ៣លានរៀលប៉ុណ្ណោះ»។

ដំណាំ​ដំឡូងមីត្រូវ​បានគេដាំស្ទើទូទាំងប្រទេសកម្ពុជា​ ដែលជាធម្មតាគេចាប់​ផ្តើម​ដាំ​កក្នុង​​ឧសភា និង​ប្រមូល​ផល​ចាប់ពីខែវិច្ឆិកា រហូតដល់​ខែ​កុម្ភៈ​ក្នុង​ឆ្នាំនីមួយៗ។

លោក ម៉ុង ឫទ្ធី អគ្គ​នាយក​ក្រុមហ៊ុន ម៉ុង ឫទ្ធី គ្រុប កាលពីខែមីនា កន្លងទៅបានសរសេរនៅលើទំព័រហ្វេសប៊ុក​ផ្លូវការរបស់លោកថា បច្ចុប្បន្ន ​ជីគីមីថ្លៃជាមធ្យម ៨២០ ដុល្លារ​ក្នុង​១តោន​ កើនពី​ ៤២០ ដុល្លារ​ក្នុង១តោន​ កាលពីឆ្នាំទៅ។លោក​បាន​ណែនាំ​ឱ្យ​ប្រជាកសិករ​ងាកមក​ប្រើប្រាស់​និង​ផលិតជីសេរីរាង​ដោយ​ខ្លួន​ឯង ដើម្បីកាត់​បន្ថយការចំណាយ។​

លោកសរសេរដូច្នេះថា៖«ខ្ញុំចង់អោយ​កសិករ​យើង​ងាកមក​ផលិតជី​សេរីរាង​ដោយខ្លួន​ឯង​វិញសម្រាប់ពេលនេះ​បើយើង​ទិញ​ជីសេរីរាង​នាំចូល​តម្លៃ ៤២០ ដុល្លារក្នុង​មួយតោន​ ដែល​ពីមុនមក​តម្លៃ​ជាមធ្យម​គឺតែ​ ២២០ ដុល្លារក្នុង​មូយតោន។​ តែបើខ្ញុំផលិត​ជាក់ស្តែង​ដោយផ្ទាល់វិញ​អស់តែ ២៤ ដុល្លារក្នុង​មួយតោន​ទេ ជា​មធ្យម​អាច​ផលិតបាន ​២៤​ តោន​ជារាងរាល់ថ្ងៃ​ ហើយប្រសិនបើទិញគេវិញ​អស់​ប្រមាណ ១០ ០០០ ដុល្លារមួយថ្ងៃ​»។

​របាយការណ៍​បូកសរុបលទ្ធផលការងារពាណិជ្ជកម្ម​ឆ្នាំ២០២១ និងទិសដៅពាណិជ្ជកម្ម​ឆ្នាំ​២០២២ បង្ហាញថា ប្រទេស​កម្ពុជា​បាននាំចូល​ថ្នាំ និងជីកសិកម្ម​មានតម្លៃជាប្រាក់ ៣៩០ លាន​ដុល្លារ​ក្នុងរយៈពេល ១០ខែឆ្នាំ ២០២១ កើន​ ៤០ ភាគរយ បើធៀបនឹង​រយៈ​ពេល​ដូចគ្នា​ឆ្នាំ ២០២០ មានតម្លៃ​ ២៧៦ លាន​ដុល្លារ​៕