ពលរដ្ឋដែលរងរបួសដោយសារសត្វខ្ទីងជលនៅភូមិគូ ឃុំគោកមន ស្រុកបន្ទាយអំពិល ខេត្តឧត្ដរមានជ័យកាលពីថ្ងៃទី៣០មីនាឆ្នាំ២០២២។ រូបភាព៖ដកស្រង់ចេញពីទំព័រហ្វេសប៊ុករបស់លោក អូត ឡាទីន

សត្វខ្ទីងព្រៃមួយក្បាលនៅខេត្តឧត្ដរមានជ័យ ត្រូវបានពលរដ្ឋនិងអាជ្ញាធរ សហការគ្នាចាប់បាននៅព្រឹកថ្ងៃទី៣១មីនានេះ ក្រោយពីបានដេញវ័ធមនុស្ស៣នាក់ឱ្យរបួសធ្ងន់ ស្ថិតនៅក្នុងឃុំគោកមន ស្រុកបន្ទាយអំពិល កាលពីថ្ងៃទី៣០មីនា។ អាជ្ញាធរបញ្ជាក់ថា សត្វខ្ទីងព្រៃនេះ នឹងត្រូវដឹកយកទៅអភិរក្សនៅសួនសត្វភ្នំតាម៉ៅ។
លោក នៅសំ តារារិទ្ធិ អភិបាលស្រុកបន្ទាយអំពិល បានប្រាប់សារព័ត៌មានខ្មែរណាស់នៅថ្ងៃទី៣១មីនានេះថា សត្វខ្ទីងដែលវ័ធពលរដ្ឋឱ្យរងរបួសនោះ ត្រូវបានកម្លាំងជំនាញរបស់មន្ទីរបរិស្ថានខេត្ត អ្នកជំនាញមកពីសួនសត្វភ្នំតាម៉ៅសហការគ្នាជាមួយពលរដ្ឋ ព័ទ្ធចាប់បាន ហើយនៅពេលនេះកំពុងរក្សាទុកនៅក្នុងសាលាស្រុក ដើម្បីរង់ចាំការបញ្ជូនទៅភ្នំតាម៉ៅ។

លោកថ្លែងដូច្នេះថា៖«បាទ នឹងបញ្ជូនទៅភ្នំតាម៉ៅ ឥឡូវនេះយើងកំពុងធ្វើកំណត់ហេតុនិងប្រគល់ទទួលទៅឱ្យភ្នំតាម៉ៅ។ ហើយគាត់ក៏មិនចង់ដឹកកាត់ថ្ងៃដែរដោយសារខ្លាច វាមានបញ្ហានៅតាមផ្លូវ អ៊ីចឹងគាត់ថាចាំត្រជាក់ចាំគាត់ចេញដំណើរពីនេះទៅ»។
យោងតាមទំព័រហ្វេសប៊ុកមួយឈ្មោះ អូត ឡាទីន បានបង្ហោះថា មានពលរដ្ឋចំនួន៣នាក់ដែលត្រូវសត្វខ្ទីងវ័ធបណ្ដាលឱ្យរបួសធ្ងន់ គឺឈ្មោះ ទិក ក្រឹង ភេទប្រុស ដែលបានរងរបួសជើងឆ្វេងរយះសាច់ជង្គង់ប៉ុនបាតដៃ។
ពលរដ្ឋម្នាក់ទៀតឈ្នោះ យ៉ុន វឿ ភេទប្រុស ត្រូវបានសត្វខ្ទីងវ័ធឱ្យរងរបួសសាច់ភ្លៅខាងស្ដាំ ធ្លុះពីរកន្លែង ប៉ុន្តែមិនប៉ះចំឆ្អឹងនោះទេ រីឯពលរដ្ឋម្នាក់ទៀត គឺឈ្មោះ ស្នេហ៍ នាវ ភេទស្រី ដែលត្រូវជាប្រពន្ធរបស់ឈ្មោះ យ៉ុន វឿ គឺត្រូវបានសត្វខ្ទីងវ័ធឱ្យរងរបួសរយះសាច់កដៃខាងស្ដាំ ខណៈលោកស្រីនិងប្ដីកំពុងកាប់ដើមដំឡូងមី។

ជនរងគ្រោះទាំងបីនាក់នោះ ត្រូវបានបញ្ជូនទៅសម្រាកព្យាបាលនៅមន្ទីបង្អែកខេត្ត ខណៈសត្វខ្ទីងនេះ ត្រូវបានពលរដ្ឋអះអាងថា ជាសត្វដែលរស់នៅតាមតំបន់ជើងភ្នំជាយូរមកហើយ ប៉ុន្តែមូលហេតុដែលវាចូលក្នុងភូមិបណ្ដាគ្រោះថ្នាក់ដល់អ្នកស្រុកនេះ អាចប្រហែលដោយសារង្វេងហ្វូង៕