ក្រុមយុវជន ស.ស.យ.ក. ចុះប្រមូលសំរាមនៅសង្កាត់ស្វាយរលំ ក្រុងតាខ្មៅ កាលពីថ្ងៃ១៨ធ្នូឆ្នាំ២០២១។ រូបភាព៖ ហ្វេសប៊ុកសាលាសង្កាត់ស្វាយរលំ

រដ្ឋបាល​ខេត្ត​កណ្ដាល​បាន​ចាត់​ទុក​ក្រុង​តាខ្មៅ គឺ​ជា​បេះដូង​សេដ្ឋកិច្ច និង​ទេសចរណ៍​ដ៏​សំខាន់​ជាងគេ​របស់​ខេត្ត។ ប៉ុន្តែ បញ្ហា​គ្រប់គ្រង និង​ប្រមូល​សំរាម​នៅ​តែ​មិន​ទាន់​គ្រប​ដណ្តប់​ទូទាំង​ក្រុង​តាខ្មៅ​ទាំងមូល​នៅ​ឡើយ។

អភិបាលរង​ខេត្ត​កណ្ដាល លោក តាំង ម៉េងលាន ថ្លែង​ក្នុង​កិច្ចប្រជុំ​ស្ដីពី​ការគ្រប់គ្រង​សំរាម សំណល់​រឹង​នៅ​ក្នុង​ក្រុង​តាខ្មៅ កាល​ពី​ថ្ងៃទី​២៦ ខែ​មករា ឆ្នាំ​២០២២ នៅ​សាលា​ខេត្តកណ្តាល ថា រដ្ឋបាល​ខេត្ត​តម្រូវឱ្យ​អាជ្ញាធរ​គ្រប់​លំដាប់​ថ្នាក់ ក្រុមហ៊ុន​ប្រមូល​សំរាម និង​ប្រជាពលរដ្ឋ ត្រូវតែ​រួមគ្នា​ដោះស្រាយ​បញ្ហា​សំរាម និង​កាកសំណល់​រឹង ទើប​ទទួល​បាន​ជោគជ័យ។

តាមរយៈ​កិច្ច​ប្រជុំ​ដែល​ផ្សព្វផ្សាយ​លើ​ហ្វេសប៊ុក​រដ្ឋបាល​ខេត្ត​នេះ លោក តាំង ម៉េងលាន បន្ត​ថា វិសាលភាព នៃ​ការ​ផ្តល់​សេវា សំអាត​សំរាម នៅ​មិនទាន់​គ្រប​ដណ្តប់​នៅក្នុង​ក្រុង​ទាំងមូល​នៅឡើយ​ទេ ដោយ​នៅ​មាន​ផ្នែក​ខ្លះ​នៃ​សង្កាត់​ស្វាយរលំ រកា​ខ្ពស់ និង​សិត្បូ ខណៈ​ក្រុមហ៊ុន​កំពុងតែ​ខិតខំ​បន្ថែម​ទៀត។ លោក​គូស​បញ្ជាក់​ថា កត្តា​នេះ​ហើយ ដែល​ធ្វើ​ឱ្យ​នៅ​មាន​សំរាម​រាយប៉ាយ នៅ​តាម​ផ្នែក​ខ្លះ​នៃ​ដងផ្លូវ ក្នុង​ប្រភព​ទឹក​សាធារណៈ និង​កន្លែង​សាធារណៈ​សំខាន់ៗ​មួយ​ចំនួន​ទៀត បណ្ដាល​ឱ្យ​ប៉ះពាល់​យ៉ាង​ខ្លាំង ដល់​សោភ័ណភាព បរិស្ថាន​ក្នុង​ទីក្រុង និង​ការរស់នៅ​ប្រចាំថ្ងៃ​របស់​ប្រជា​ពលរដ្ឋ។

ជាង​នេះ​ទៅ​ទៀត​មន្ត្រី​រដ្ឋបាល​ខេត្ត​នេះ​បាន​​ជំរុញ​ដល់​ក្រុមហ៊ុន​ប្រមូល​សំរាម​ស៊ុនទ្រី ត្រូវ​ពង្រឹង និង​ខិតខំ​បន្ថែម​ទៀត​ទៅលើ​ការ​ដឹកជញ្ជូន និង​ទុកដាក់​សំរាម តាម​ស្តង់ដារ​បច្ចេកទេស ហើយ​ត្រូវ​បង្កើន ចំនួន​រថយន្ត​ដឹក​សំរាម រ៉ឺម៉ក​ដឹក​សំរាម ចំនួន​ភ្នាក់ងារ​បោសសំអាត ឱ្យ​សមស្រប​ទៅ​នឹង​បរិមាណ​សំរាម​ដែល​កំពុងតែ​មានការ​កើនឡើង​យ៉ាង​ខ្លាំង​នៅក្នុង​ក្រុង​តាខ្មៅ។

លោក​បន្ត​ថា៖ «ក្រុមហ៊ុន​ស៊ីនទ្រី​ត្រូវ​យកចិត្តទុកដាក់ ប្រមូល​សំរាម​ប្រចាំការ​នៅ​តាម​មាត់​ទន្លេ ដងផ្លូវ​សាធារណៈ ប្រភព​ទឹក និង​កន្លែង​សាធារណៈ​សំខាន់ៗ ព្រោះ​មាន​សំរាម​រាយប៉ាយ​យ៉ាងច្រើន​នៅ​ទីនោះ ជាង​នេះ​ទៅ​ទៀត ក្រុមហ៊ុន​ត្រូវ​រៀបចំ​ប្រតិទិន​ពេល​វេលា​បញ្ចេញ​សំរាម និង​ប្រមូល​សំរាម​ជាក់លាក់ ពោល​គឺ​ក្រុមហ៊ុន​ត្រូវ​រៀបចំ​បង្កើត​ប័ណ្ណ​ព័ត៌មាន​ផ្សព្វផ្សាយ​ពី​ពេល​វេលា​បញ្ចេញ​សំរាម​របស់​ប្រជាពលរដ្ឋ និង​ពេល​វេលា​ដែល​ក្រុមហ៊ុន​ត្រូវ​ប្រមូល​សំរាម​ជូន​ដល់​ប្រជាពលរដ្ឋ»។

បញ្ហា​សំរាម​ជា​វិបត្តិ​របស់​សង្គម​ទាំងមូល ហើយ​ត្រូវ​ការ​ការ​ចូលរួម​ពី​ពលរដ្ឋ​ទាំងអស់​គ្នា ដោយ​មាន​ការ​គាំទ្រ​ពី​អាជ្ញាធរ​រដ្ឋ។ ពលរដ្ឋ​ត្រូវ​ទុកដាក់​សំរាម ឱ្យ​មាន​មាន​របៀប ហើយ​ក្រុមហ៊ុន​ត្រូវ​ប្រមូល​សំរាម​ជា​ទៀងទាត់​ជាដើម។

យុវជន​សំរាម ដែល​គេ​ស្គាល់​ទូទៅ​ពី​ការងារ​ប្រមូល​សំរាម​ដោយ​ស្ម័គ្រចិត្ត​របស់​ពួកគេ ដែល​ដឹក​នាំ​ដោយ​យុវជន សាន ដារ៉ាវីត កំពុង​ធ្វើ​យុទ្ធនាការ​រៃអង្គាស ស្នើ​សុំ​ធុងសំរាម​ពី​សប្បុរស​ជន​នានា។ យុវជន​ទាំង​នេះ​គូស​បញ្ជាក់​ថា សំរាម​ពាស​វាល​ពាស​កាល គឺ​បាន​ធ្វើ​ឱ្យ​តម្លៃ​ប្រជាជន​យើង​ធ្លាក់ចុះ និង​ធ្វើអោយ​ប្រទេស​របស់​យើង​ត្រូវ​បាន​គេ​មើលងាយ ពួក​យើង​សង្ឃឹម​ថា បងប្អូន​នឹង​ចូលរួម​ស្រលាញ់ ថែរក្សា ព្រមទាំង​ជួយ​លើក​កំពស់​បរិស្ថាន អនាម័យ សណ្ដាប់ធ្នាប់​ប្រទេស​កម្ពុជា​យើង​ឱ្យ​បាន​ប្រសើរ​ជាង​នេះ។

ក្រុម​យុវជន​នេះ​អំពាវនាវ​ដល់​បងប្អូន​ទាំង​អស់​ចូលរួម​ជួយ​ទិញ​ធុងសំរាម​ខ្នាត​២៤០​លីត្រ ក្នុង​មួយ​ធុង​មាន​តម្លៃ ៤៥​ដុល្លា ចំនួន​៥០០​ធុង ដើម្បី​ពង្រាយ​ធុង​សំរាម​ទាំងអស់​នេះ​ទៅកាន់​ទី​សាធារណៈ​នានា ក្នុង​គំរោង​កម្ពុជា​ស្អាត។

ក្រុម​យុវជន​ទាំង​នេះ​បន្ត​ថា សំរាប់​បងប្អូន​ដែល​ជឿជាក់ គាំទ្រ​គំរោង​ពួកគេ និង​ដើម្បី​ឱ្យ​គំរោង​មួយ​នេះ​បាន​ដើរទៅ​មុខ​ជា​បន្ត បងប្អូន​អាច​ទិញ​ជា​ធុង​សំរាម​ខ្នាត​នេះ ដើម្បី​បរិច្ចាគ ឬ​អាច​បរិច្ចាគ​តាម​កំលាំង​សទ្ធា តាមរយៈ​គណនី​ធនាគារ​អេប៊ីអេ (ABA): 000 48 73 57 (San Daravit)

គណនី​អេស៊ីលីដា (ACLEDA): 3473 0053 0926 16 (San Daravit) គណនី​អេស៊ីលីដា​ទាន់​ចិត្ត : 069 21 60 85 និង​គណនី​វីង (Wing) :069216085 ។

ចាប់​ពី​ថ្ងៃ​ទី១ កុម្ភៈ ឆ្នាំ២០២២ តទៅ សាលារាជធានី​ភ្នំពេញ នឹង​ចាប់ផ្ដើម​ផាក​ពិន័យ​ទៅ​តាម​ច្បាប់​ចំពោះ​អ្នក​ដែល​មិន​បាន​បែងចែក​សំរាម​ឱ្យ​បាន​ត្រឹមត្រូវ និង​បញ្ចេញ​ខុស​ម៉ោង ដែល​ខាង​សាលារាជធានី​បាន​កំណត់​ក្នុង​ខណ្ឌ​ចំនួន៥ ដូចជា ខណ្ឌ​ដូនពេញ ខណ្ឌ​ចំការមន ខណ្ឌ​៧មករា ខណ្ឌ​ទួលគោក និង​ខណ្ឌ​បឹងកេងកង។

យោង​តាម​អនុក្រឹត្យ​លេខ​១១៣ ស្ដីពី​ការ​គ្រប់គ្រង​សំណល់រឹង ជំពូក​ទី៧ ដែល​បាន​ចេញ​នៅ​ឆ្នាំ២០១៥ បាន​កំណត់​ថា ការ​មិន​អនុវត្ត​តាម​ការ​កំណត់ ក្នុង​ការ​ញែក និង​ការ​វេច​ខ្ចប់​ដោយឡែក​នូវ​សំរាម សំណល់​រឹង​ក្នុង​ទីប្រជុំជន ដែល​អាច​ប្រើប្រាស់​ឡើង​វិញ ឬ​កែច្នៃ​បាន ត្រូវ​ទទួល​ការ​ពិន័យ​អន្តរការណ៍​ចំនួន ១ម៉ឺនរៀល​សម្រាប់​លំនៅឋាន និង​១សែន​រៀល សម្រាប់​ទីតាំង​អាជីវកម្ម សិប្បកម្ម អាគារ​ខុនដូរ ឬ​បុរីលំនៅឋាន និង ២សែនរៀល សម្រាប់​រោងចក្រ សហគ្រាស ក្រុមហ៊ុន ហើយ​ក្នុង​ករណី​មិន​រាងចាល គឺ​ត្រូវ​ទទួល​ពិន័យ​ទ្វេដង​នៃ​ប្រាក់​ពិន័យ​អន្តរកាណ៍​លើក​មុន។ ចំណែក​បុគ្គលដែល​នាំ​យក​កញ្ចប់ ឬ​ធុង​ផ្ទុក​សំរាម សំណល់​រឹង​ទីប្រជុំជន ទៅ​ដាក់​នៅ​តាម​ដងផ្លូវ ឬ​ទីសាធាណៈ​ខុសម៉ោង​អនុញ្ញាត ត្រូវ​ពិន័យ​ប្រាក់ ២ម៉ឺនរៀល​សម្រាប់​លំនៅឋាន ១សែន ៥ម៉ឺនរៀល​សម្រាប់​ទីតាំង​អាជីវកម្ម ទីតាំង​សេវាកម្ម សិប្បកម្ម ខុនដូរ និង​បុរី​លំនៅឋាន និង ៤សែន​រៀល​សម្រាប់​រោងចក្រ សហគ្រាស ក្រុមហ៊ុន ហើយ​ក្នុង​ករណី​មិន​រាងចាល​ ត្រូវ​ពិន័យ​ប្រាក់​ទ្វេដង នៃ​ប្រាក់​ពិន័យ​លើក​មុន៕