​រដ្ឋមន្ត្រី​ការបរទេស​ម៉ាឡេស៊ី លោក សៅហ៊្វូឌីន អាប់ដុល្លាហ៍ (Saifuddin Abdullah) (ឆ្វេង) និង សម្ដេចនាយករដ្ឋមន្រ្តី ហ៊ុន សែន (ស្ដាំ)។

ប្រមុខ​រដ្ឋាភិបាល​កម្ពុជា​ព្រមាន​រដ្ឋមន្ត្រី​ការបរទេស​ម៉ាឡេស៊ី លោក សៅហ៊្វូឌីន អាប់ដុល្លាហ៍ (Saifuddin Abdullah) ជុំវិញ​ការ​រិះគន់​ដំណើរ​ទស្សនកិច្ច​របស់សម្ដេចទៅ​ប្រទេស​ភូមា ដែល​របប​យោធា​ភូមា​កំពុង​ដឹកនាំ ក្រោយ​ធ្វើ​រដ្ឋប្រហារ​ទម្លាក់​មេដឹកនាំ​ជាប់​ឆ្នោត។

យោងតាមទំព័រហ្វេសប៊ុក​ហ្វេសប៊ុករបស់នាយករដ្ឋមន្រ្តី​នៅ​ថ្ងៃ​ទី២១មករា បានលើកឡើងថា ក្នុង​ជំនួប​តាម​ទូរសព្ទ​ជាមួយ​ប្រធានាធិបតី​ឥណ្ឌូណេស៊ី លោក ចូកូ វីដូដូ (Joko Widodo) សម្ដេច​ ហ៊ុន សែន បាន​ស្នើ​ទៅ​រដ្ឋមន្ត្រីការបរទេស​ឥណ្ឌូណេស៊ី គឺលោកស្រី រ៉េតណូ ដើម្បី​ឲ្យ​ជួយនាំ​សារ​របស់​សម្ដេច ផ្ញើទៅកាន់​រដ្ឋមន្ត្រីការបរទេស​ម៉ាឡេស៊ី ដោយសាររដ្ឋមន្រ្តីរូបនេះ បង្ហាញចរិតព្រហើន​ពេក និងមាន​សំដីសំដៅ​នេះ​មិន​គប្បី​ចំពោះ​ថ្នាក់​ដឹកនាំ​អាស៊ាន ជា​ពិសេស​ប្រធាន​អាស៊ាន​តែម្ដង។ សម្ដេច​បន្តថា រដ្ឋមន្រ្តីការបរទេសម៉ាឡេស៊ី ប្រើសំដីមិន​សមជា​ភាសា​ការទូត និង​ខ្វះ​នូវ​ការ​គួរសម។

កាល​ពី​សប្ដាហ៍​មុន​​រដ្ឋមន្ត្រី​ការបរទេស​ម៉ាឡេស៊ី​បាន​រិះគន់​ដំណើរ​ទស្សនកិច្ច​របស់​ប្រមុខ​រដ្ឋាភិបាល​កម្ពុជា ទៅ​កាន់​ប្រទេស​ភូមា ឬ​មីយ៉ាន់ម៉ា (Myanmar)។ រដ្ឋមន្ត្រី​ការបរទេស​រូប​នោះ ថា ​សម្ដេច​នាយករដ្ឋមន្រ្តី ហ៊ុន សែន គួរតែ​ពិភាក្សា​ជាមួយ​មេ​ដឹកនាំ​អាស៊ាន មុន​នឹង​សម្រេច​ចិត្ត​ធ្វើ​ដំណើរ​ទៅ​ប្រទេស​ភូមា ជួប​មេដឹកនាំ​​នៃ​របប​យោធា​នោះ។

លោក សៅហ៊្វូឌីន អាប់ដុល្លាហ៍ ត្រូវ​បាន​ស្រង់​សម្ដី​ថា៖ «មាន​មនុស្ស​ដែល​គិត​ថា លោក [ហ៊ុន សែន] មិន​គួរ​ទៅ​បំពេញ​ទស្សនកិច្ច ពីព្រោះ​ទស្សនកិច្ច​របស់​គាត់​ត្រូវ​បាន​យល់​ឃើញផ្សេង ឬ​មាន​ការ​បកស្រាយ​ថា ជា​ការ​ទទួល​ស្គាល់​យោធា​ក្នុង​ប្រទេស​ភូមា»។

រដ្ឋមន្ត្រី​ការបរទេស​​​​ម៉ាឡេស៊ី​បន្ថែម​ថា ដំណើរ​ទស្សនកិច្ច​ក្នុង​នាម​មេដឹកនាំ​រដ្ឋ​មួយ មិនមែន​ជា​បញ្ហា​ឡើយ ប៉ុន្តែ​ដំណើរ​ទស្សនកិច្ច​នេះ កើត​ឡើង​នៅ​ពេល​ដែល​កម្ពុជា​ធ្វើ​​ជា​ប្រធាន​អាស៊ាន​រួច​ហើយ ដែល​លោក​ថា គួរតែ​មាន​ការ​ពិភាក្សា​ជាមួយ​មេដឹកនាំ​អាស៊ាន​ផ្សេង​ទៀត ដើម្បី​ស្វែង​រក​ការ​យល់​ឃើញ។

ទាក់ទង​នឹង​វិបត្តិ​នៅ​ភូមា​នេះ កម្ពុជា​បាន​​​​​​​​​រង​ការរិះគន់​ពី​សំណាក់​បណ្តា​ប្រទេស​សមាជិក​អាស៊ាន​មួយចំនួន ជុំវិញ​ដំណើរ​ទស្សនកិច្ច​ដ៏​ចម្រូងចម្រាស​របស់​ប្រមុខ​រដ្ឋាភិបាល​កម្ពុជា ទៅ​ជួប​មេដឹកនាំ​របប​សឹក​ភូមា លោក មីន អុងឡាំង (Min Aung Hlaing)។ ប្រទេស​ទាំង​នោះ​ថា កម្ពុជា​ព្យាយាម​ផ្តល់​ភាព​ស្រប​ច្បាប់​ឱ្យ​របប​រដ្ឋប្រហារ​ភូមា និង​សម្រេចចិត្ត​តែឯង​ដោយ​គ្មាន​ពិគ្រោះ​យោបល់​ជាមួយ​រដ្ឋ​សមាជិក​អាស៊ាន​ជាមុន​ជាដើម។

ក្រោយ​ដំណើរ​ទស្សនកិច្ច​នេះ​ដែរ កម្ពុជា​ក្នុង​នាម​ប្រធាន​អាស៊ាន​ប្ដូរ​វេន បាន​ខកខាន​រៀបចំ​កិច្ចប្រជុំ​ថ្នាក់​រដ្ឋមន្ត្រីការបរទេស​ជា​លើក​ដំបូង ហើយ​បន្ទាប់​មក​មាន​ប្រទេស​មួយ​ចំនួន​រិះគន់​ដំណើរ​ទស្សនកិច្ច​នេះ ខណៈ​របប​សឹក​ប្រទេស​ភូមា​មិន​បាន​អនុវត្ត​កិច្ច​ព្រមព្រៀង​ជា​ឯកច្ឆន្ទ ៥​ចំណុច​របស់​អាស៊ាន