រូបភាព៖ Internet

យោងតាមឯកសាររបស់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទបានណែនាំថា មានគន្លឹះចំនួន៥ ដើម្បីរបបអាហារសុខភាព។

បំបៅកូនដោយទឹកដោះម្តាយ និងផ្តល់អាហារបន្ថែមសមស្រប៖ ការបំបៅកូនដោយទឹកដោះម្តាយតែមួយមុខគត់ក្នុងរយៈពេល៦ខែដំបូងនៃជីវិត បន្តការបំបៅកូនដោយទឹកដោះម្តាយរហូតដល់អាយុ២ឆ្នាំ ឬលើស និងចាប់ផ្តើមផ្តល់អាហារបន្ថែមនៅពេលទារកអាយុ៦ខែ ជាមួយនឹងអាហារទន់ ដែលមានអាហារចម្រុះបរិមាណគ្រប់គ្រាន់ និងសុវត្ថិភាព ដោយមិនគួរបន្ថែមអំបិល និងស្ករ ទៅក្នុងអាហារបន្ថែមនេះឡើយ។ មូលហេតុដែលត្រូវបំបៅកូនដោយទឹកដោះម្តាយ និងផ្តល់អាហារបន្ថែមសមស្រប ព្រោះក្នុងរយៈពេល២ឆ្នាំដំបូងនៃជីវិតរបស់កុមារជួយជំរុញឱ្យមានការលូតលាស់ និងអភិវឌ្ឍន៍ខួរក្បាលល្អ កាត់បន្ថយហានិភ័យបញ្ហាលើសទម្ងន់ ឬធាត់ និងការវិវដ្តទៅជាជំងឺមិនឆ្លងនៅពេលក្រោយ។

បរិភោគអាហារឱ្យបានច្រើនប្រភេទ៖ ចូរបរិភោគអាហារឱ្យបានច្រើនប្រភេទផ្សេងៗគ្នាដែលមានក្នុងអាហារថាមពល ដូចជាបាយ ដំឡូង សណ្តែក អាហារការពារមាននៅក្នុងបន្លែ និងផ្លែឈើពណ៌លឿង និងពណ៌បៃតង និងអាហារសាងសង់មានដូចជា សាច់សត្វ ត្រី ស៊ុត និងទឹកដោះគោ។ ការបរិភោគអាហារសុខភាពពេញមួយជីវិតអាចជួយការពារបញ្ហាអាហារូបត្ថម្ភគ្រប់ទម្រង់ក៏ ដូចជាជំងឺមិនឆ្លងមួយចំនួន ហើយការបរិភោគអាហារស្រស់ចម្រុះច្រើនប្រភេទជាប្រចាំ ផ្តល់សារធាតុចិញ្ចឹមគ្រប់គ្រាន់ដល់រាងកាយ និងជួយកាត់បន្ថយរបបអាហារដែលមិនល្អសម្រាប់សុខភាព ដូចជាអាហារមានជាតិស្ករ អំបិល និងខ្លាញ់ច្រើន ដែលធ្វើឱ្យលើសទម្ងន់។

បរិភោគបន្លែ និងផ្លែឈើឱ្យបានច្រើន៖ បរិភោគ បន្លែ និងផ្លែចម្រុះគ្រប់ប្រភេទយ៉ាងហោចណាស់៤០០ក្រាម ឬ៥ប្រភេទក្នុងមួយថ្ងៃ បរិភោគបន្លែឱ្យបានជាប្រចាំ បរិភោគបន្លែ និងផ្លែឈើស្រស់ធ្វើជាអាហារសម្រន់ និងបរិភោគ បន្លែ និងផ្លែស្រស់តាមរដូវកាល។ បន្លែ និងផ្លែឈើជាប្រភពដ៏សំខាន់ដែលសំបូរទៅដោយវីតាមីន សារធាតុរ៉ែ ជាតិសរសៃ ប្រូតេអ៊ីនធម្មជាតិ និងសារធាតុប្រឆាំងអុកស៊ីតកម្ម។ ចំពោះអ្នកដែលមានរបបអាហារសម្បូរដោយបន្លែ និងផ្លែឈើមានហានិភ័យទាបចំពោះការកើតជំងឺធាត់ ជំងឺបេះដូង ជំងឺដាច់សរសៃរឈាមខួរក្បាល ជំងឺទឹកនោមផ្អែម និងប្រភេទជំងឺមហារីកមួយចំនួន។

បរិភោគ ខ្លាញ់ ឬប្រេងឆាក្នុងបរិមាណសមស្រប៖ កាត់បន្ថយការបរិភោគខ្លាញ់ ដោយជ្រើសរើសប្រេងឆាដែលផ្តល់ផលល្អដល់សុខភាព ដូចជាប្រេងផ្កាឈូករ័ត្ន ឬប្រេងពោត ជាជាងខ្លាញ់សត្វ ប្រេងដែលមានជាតិខ្លាញ់ឆ្អែត ដូចជាប្រេងដូងជាដើម។ ត្រូវចៀរខ្លាញ់ដែលមើលឃើញចេញពីគ្រប់ប្រភេទសាច់ទាំងអស់ កាត់បន្ថយការហូបចៀន ឬឆា ដោយត្រូវឆា ចំហុយ និងដុត។ ត្រូវជ្រើសរើសសាច់ស ដូចជាសាច់មាន់ និងត្រីដែលជាទូទៅមានជាតិខ្លាញ់ទាបជាងសាច់ពណ៌ក្រមាន និងត្រូវបរិភោគសាច់កច្នៃក្នុងកម្រិតមួយដែលបានកំណត់ប៉ុណ្ណោះ ព្រោះសាច់ទាំងនោះមានជាតិខ្លាញ់ និងអំបិលច្រើន។ ត្រូវជៀសវាងបរិភោគអាហារកែច្នៃ ដុត និងចៀនដែលមានជាតិខ្លាញ់ចេញពីរោងចក្រ។ខ្លាញ់ និងប្រេង ជាប្រភេទថាមពលប្រមូលផ្គុំ ហើយការបរិភាគជាតិខ្លាញ់ច្រើនពេក អាចធ្វើឱ្យប៉ះពាល់ដល់សុខភាពបាន ដូចជាអ្នកដែលបរិភោគជាតិខ្លាញ់ឆ្អែតច្រើនពេក និងមានជាតិខ្លាញ់ខ្ពស់ មានហានិភ័យជំងឺបេះដូងខ្ពស់ និងជំងឺដាច់សរសៃរឈាមខួរក្បាល។ ជាតិខ្លាញ់មិនល្អអាចមានដោយធម្មជាតិនៅក្នុងសាច់ និងផលិតផលទឹកដោះគោ។

កាត់បន្ថយបរិភោគបរិមាណអំបិល និងស្ករ៖ មនុស្សពេញវ័យគួរបរិភោគអំបិលតិចជាង៥ក្រាមក្នុង១ថ្ងៃ ត្រូវជ្រើសរើសអាហារស្រស់ ជាជាងអាហារកំប៉ុង ត្រូវប្រើប្រាស់អាហារដែលមានប្រភពពីធម្មជាតិជាជាងអំបិល ទឹកត្រី ដើម្បីបន្ថែមរសជាតិ ជៀសវាងអាហារសម្រន់ដែលមានជាតិអំបិល និងជាតិស្ករខ្ពស់ ត្រូវកាត់បន្ថយផឹកទឹកក្រូច ឬសូដា និងភេសជ្ជៈផ្សេងៗដែលមានជាតិស្ករខ្ពស់ ដូចជាទឹកផ្លែឈើកំប៉ុង ទឹកស៊ីរ៉ូ ទឹកដោះគោមានជាតិផ្អែម និងយ៉ាអួ។ ត្រូវជ្រើសរើសផ្លែឈើស្រស់ជំនួសអាហារសម្រន់ផ្អែមៗ ដូចជានំឃុកឃី នំខេក និងសូកូឡា។ អ្នកដែលមានរបបអាហារមានជាតិសូដ្យូមខ្ពស់ រួមទាំងអំបិល មានហានិភ័យកើតជំងឺលើសឈាមខ្ពស់ដែលអាចបង្កជាហានិភ័យជំងឺបេះដូង និងជំងឺដាច់សរសៃរឈាម។ អ្នកដែលកាត់បន្ថយរបបអាហារមានជាតិស្ករក្នុងរបបអាហាររបស់ពួកគេ អាចកាត់បន្ថយជំងឺមិនឆ្លង ដូចជាជំងឺបេះដូង និងជំងឺដាច់សរសៃរឈាម។

សរុបមករបបអាហារសុខភាព ជួយការពារប្រឆាំងនឹងកង្វះអាហារូបត្ថម្ភគ្រប់ទម្រង់ទាំងអស់ ជំងឺមិនឆ្លង ជំងឺទឹកនោមផ្អែម ជំងឺបេះដូង ជំងឺដាច់សរសៃឈាមខួរក្បាល និងជំងឺមហារីក។ នេះបើតាមអង្គការសុខភាពពិភពលោក៕