ក្រសួង​វប្បធម៌ និងវិចិត្រសិល្បៈ ​បាន​អំពាវនាវដល់ប្រជាពលរដ្ឋ ជាពិសេសយុវជន ត្រូវយល់ដឹង និងប្រើប្រាស់ទិវាបុណ្យនៃក្តីស្រឡាញ់នេះ ឱ្យសមស្របតាម​គន្លងប្រពៃ​ណីដ៏ត្រកាលរបស់ខ្មែរ ដើម្បីកិត្តិយស និងភាពថ្លៃថ្នូររបស់ខ្លួន របស់ក្រុមគ្រួសារ ជាពិ​សេស​ដើម្បីរួមចំណែកលើកកម្ពស់កិត្យានុភាពនៃសង្គមជាតិ។

យោងតាម​សេចក្តី​អំពាវនាវ​របស់​ក្រសួង​វប្បធម៌ កាលពីពេលថ្មីៗនេះ បាន​ឱ្យ​ដឹងថា បច្ចុប្បន្ន​ទិវាបុណ្យនៃក្តីស្រឡាញ់​នេះ​ បាននិង​កំពុង​ជ្រៀត​ចូលមក​សង្គមជាតិ​កម្ពុជា ជាពិសេស​ក្នុង​ស្រទាប់​យុវជន បណ្តា​ឱ្យ​មនុស្ស​មួយចំនួន​បាន​ទទួល​យក និង​ប្រើប្រាស់​ដោយ​ភ័ន្តច្រឡំ​នាំឱ្យ​មាន​ផលប៉ះពាល់​ដល់​វប្បធម៌ ទំនៀមទម្លាប់​ប្រណី​ជាតិ​ទៀតផង​។

ក្រសួង​វប្បធម៌​បញ្ជាក់ថា​៖ «​ក្នុង​បរិការណ៍​នេះ ក្រសួង​វប្បធម៌ និង​វិចិត្រ​សិល្បៈ ឱ្យ​ប្រជាជន ជាពិសេសេ​យុវជន​កម្ពុជា​ត្រូវ​សិក្សា​ឈ្វេងយល់​ឱ្យ​ស៊ីជម្រៅ​ចំពោះ​វប្បធម៌ ប្រពៃណី ដែលជា​មរតក​ដ៏ថ្លៃថ្លា​របស់​ដូនតា​យើង​ព្រមទាំង​ត្រូវ​សិក្សា​ឈ្វេងយល់​ឱ្យ​គ្រប់​ជ្រុងជ្រោយ​ពី​ខ្លឹមសារ និង​ឥទ្ធិពល​នៃ​វប្បធម៌ ទំនៀមទម្លាប់​ពី​ខាងក្រៅ ដើម្បី​បន្សី​ចូលទៅក្នុង​ឥរិយាបថ និង​បរិបទ​នៃ​សង្គម​របស់ខ្លួន​ក្នុង​គោលដៅ​រក្សា​ឱ្យ​បាន​នូវ​អាទិភាព​ជា​ប្រជាជាតិ​ថ្លៃថ្នូរ​មួយ​ដែល​មាន​វ័យ​ចំណាស់​រាប់ពាន់​ឆ្នាំ​មក​ហើយ​នៅ​ទ្វីបអាស៊ី​នេះ​»​។

ជាមួយគ្នានេះ ក្រសួង​អប់រំ យុវជន និង​កីឡា ក៏បានណែនាំ​ដល់​បណ្តា​គ្រឹះស្ថានសិក្សា​ទាំងអស់​ឱ្យមាន​វិធានការ​ទប់ស្កាត់​សកម្មភាព​មិនប្រក្រតី​ក្នុង​ទិវា​នៃ​ក្តីស្រឡាញ់​នេះ​នៅ​តាម​គ្រឹះស្ថានសិក្សា​សាធារណៈ​ និង​ឯកជនផងដែរ ដើម្បី​បន្ត​ពង្រឹង​ការអនុវត្ត​បទបញ្ជា​ផ្ទៃក្នុង​សម្រាប់​គ្រឹះស្ថានសិក្សា និង​ចូលរួម​ទប់ស្កាត់​ការរីក​រាលដាល​នៃ​ជំងឺ​កូវីដ​ ១៩​៕