កាលពីចុងខែមករា ឆ្នាំ២០២១ កន្លងទៅ ត្រីបាឃឿ ដែលប្រជាជនខ្មែរភាគច្រើន​ស្ទើរតែពុំ​ស្គាល់នោះ បានបង្ហាញវត្តមានជាលើកដំបូងបំផុត នៅតាមដងទន្លេសាប ចំណុចគន្លងដាយ លេខ៣។ បើតាមលោក ថាច់ ផាណារ៉ា ប្រធានមន្ទីរពិសោធន៍ និងស្រាវជ្រាវវិទ្យាសាស្ត្រជលផល នៃវិទ្យាស្ថានស្រាវជ្រាវ និងអភិវឌ្ឍន៍ជលផល​ទឹកសាប។

លោក ថាច់ ផាណារ៉ា បានថ្លែងដូច្នេះថា« ចាប់តាំងពីឆ្នាំ២០០៦ ដែលខ្ញុំបានចាប់​ផ្តើមសិក្សាស្រាវជ្រាវអំពីត្រីទឹកសាបនៅព្រះរាជាណាចក្រកម្ពុជាយើងនេះ ទាំងនៅ​ទន្លេសាប និងទន្លេមេគង្គនោះ គឺពុំដែលប្រទះត្រីប្រភេទនេះទេ ប៉ុន្តែខ្ញុំដឹងថា ត្រីប្រភេទ​នេះវាមានវត្តមាន នៅតាមដីសណ្តទន្លេមេគង្គក្រោម នៃប្រទេសវៀតណាម ដែលមាន​ឈ្មោះថា កាកែវ»។

លោក ថាច់ ផាណារ៉ា បានបន្ថែមថា ត្រីបាឃឿ ចូលចិត្តរស់នៅតំបន់ទឹកភ្លាវ ឆ្នេរមាន​ខ្សាច់ និងនៅតាមព្រែកជាប់សមុទ្រ ហើយពុំដែលបង្ហាញវត្តមាន​នៅតាមដង​ទន្លេមេ​គង្គកម្ពុជានោះទេ។ ពាក់ព័ន្ធនឹងលក្ខណៈជីវសាស្ត្រវិញ លោកបានបញ្ជាក់ថា ត្រីបាឃឿ មានទំហំជាមធ្យមប៉ុន មេដៃ រាងស្រឡូន និងមានប្រវែងប្រមាណ ២០ ទៅ ២២ សង់ទី​ម៉ែត្រ មានក្បាលខ្លីទំហំប៉ុនដងខ្លួន ព្រុយខ្នងនៃដងខ្លួនដាច់ពីគ្នា ខាងមុខមាន ៥ និងខាងក្រោយមាន ៣៤ ទៅ ៣៦ ដោយឡែកព្រុយកន្ទុយវិញ មានប្រមាណ ៣០ និងមាន​រាងស្រួច។ ត្រីបាឃឿមានស្នាមអុជខ្មៅបញ្ឆិតតាមដងខ្លួន មានព្រុយ​ច្រមុះមួយគូ មានភ្នែកនៅប៉ែកខាងលើនៃក្បាល និងមានរង្វះមាត់ដូចកង្កែប។

លោក ថាច់ ផាណារ៉ា បានសន្និដ្ឋានចំនួន ០២ចំនុច ពាក់ព័ន្ធនឹងការបម្លាស់ទីរបស់​ត្រីប្រភេទនេះ រហូតដល់ជាង១០០គីឡូម៉ែត្រ ពីទន្លេមេគង្គនៃប្រទេសវៀតណាម មកដល់ដង​ទន្លេសាបនៃប្រទេសកម្ពុជា ដោយមូលហេតុទី១ គឺដោយសារ​របបទឹកទន្លេមេគង្គ និងការជោរនាចនៃទឹកសមុទ្រ ដែលបានជួបប្រសព្វគ្នា ទី២ គឺដោយ​សារទឹកទន្លេមេគង្គនៅឆ្នាំនេះឡើងយឺត ដែលបណ្តាលឱ្យទឹក​ភ្លាវហូរ​ចូលយឺត។

ត្រីបាឃឿ ត្រូវបានគេនិយមយកទៅធ្វើជាម្ហូបចំនួន០៤មុខប៉ុណ្ណោះ គឺខរត្រី ប្រឡាក់​ងៀត ស៊ុប និងម្ជូរត្រី ហើយតម្លៃវិញក៏ថ្លៃគួរសមដែរ គឺក្នុងមួយគីឡូចន្លោះពី ២២ ០០០រៀល ទៅ ២៨ ០០០រៀល។

សូមបញ្ជាក់ថា នៅក្នុងសៀវភៅស្តីពីត្រីទឹកសាប នៅព្រះរាជាណាចក្រកម្ពុជា ក៏ពុំ​មានកត់​ត្រាត្រីប្រភេទនេះដែរ ដូច្នេះហើយត្រីប្រភេទនេះ ក៏ពុំត្រូវបានការពារដោយ​ច្បាប់ជលផលនោះទេ ហើយពាក់ព័ន្ធនឹងលក្ខណៈជីវសាស្រ្ត និងជីវចម្រុះ របស់​ត្រីបាឃឿ គឺមានអ្នកដែលបានដឹងតិចតួចប៉ុណ្ណោះ៕ ប្រភព៖ AKP

Latest posts by ខ្មែរណាស់ (see all)