សម្ដេចនាយករដ្ឋមន្រ្តី ហ៊ុន សែន បានអះអាងថា ការធ្វើតេស្ដលើកទី២របស់សម្ដេច ភរិយា​ និងអ្នកជាប់នឹងសម្ដេចទាំងអស់នៅថ្ងៃនទី៩វិច្ឆិកានេះ គឺទទួលបានលទ្ធផលល្អសម្រាប់ដំណាក់កាលទី២ក្នុងចំណោម៤ដំណាក់កាល។

សម្ដេចបានបង្ហោះតាមហ្វេសប៊ុកថា៖«ខ្ញុំត្រូវធ្វើចត្តាឡីស័កបន្តទៀត និងរង់ចាំការធ្វើតេស្តជាលើកទី៣នៅថ្ងៃទី១៤ វិច្ឆិកា និងលើកទី៤នៅថ្ងៃទី១៨វិច្ឆិកា។ ខ្ញុំកំពុងរង់ចាំលទ្ធ​ផលនៃការធ្វើតេស្តបងប្អូន ជិត ៩០០ នាក់ផ្សេងទៀតដែលបានប៉ះពាល់ដោយផ្ទាល់ឬដោយប្រយោលពីព្រឹត្តិការណ៍ដែលខ្ញុំសូមដាក់ឈ្មោះថា(ព្រឹត្តិការណ៍៣វិច្ឆិកា)»។

នាយករដ្ឋមន្រ្តីលើកឡើងទៀតថា ព្រឹត្តិការណ៍៣វិច្ឆិកា ដែលជាថ្ងៃមានមន្រ្តីជាន់ខ្ពស់កម្ពុជា​ជាច្រើន រួមទាំងអ្នកសារព័ត៌មានផង បានប៉ះពាល់ជាមួយរដ្ឋមន្រ្តីការបរទេសនិងពាណិជ្ជកម្មហុងគ្រី នឹងត្រូវបិទបញ្ចប់នៅក្រោយពេលដែលមនុស្សប្រមាណ៩០០នាក់ដឹង​ថា​អវិជ្ជមាននៅប្រមាណ៣សប្តាហ៍ទៀត។

ប៉ុន្តែសម្ដេចថា ដើម្បីកុំឱ្យមនុស្សកើនឡើងដោយសារប៉ះពាល់ប្រយោលជាមួយរដ្ឋមន្រ្តីការបរទេសនិងពាណិជ្ជកម្មហុងគ្រីនេះ គឺតម្រូវឱ្យអ្នកដែលកំពុងធ្វើចត្តាឡីស័ក មិនត្រូវចេញទៅជួបជាមួយមនុស្សផ្សេងទៀតឡើយ ហើយប្រសិនជួបជាមួយអ្នកណា ត្រូវយកអ្នកនោះ​មកធ្វើតេស្តនិងធ្វើចត្តាឡីស័កថែមទៀតដែលនឹងធ្វើឱ្យកាន់តែលំបាកប្រើពេលកាន់តែយូរនិងមនុស្សកាន់តែច្រើន។

នាយករដ្ឋមន្រ្តីថា៖«ដើម្បីបញ្ចៀសករណីដូចដែលខ្ញុំលើកឡើងខាងលើ ខ្ញុំសុំចេញបទបញ្ជាអោយក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាលពិនិត្យតាមដានគ្រប់​មនុស្សដែលបាននិងកំពុងធ្វើចត្តាឡីស័ក ប្រសិនពួកគាត់អនុវត្តមិនបានត្រឹមត្រូវក្នុងការធ្វើចត្តាឡីស័កតាមផ្ទះទេ សូមអញ្ជើញពួកគាត់ទៅធ្វើចត្តាឡីស័កតាមទីកន្លែងដែលរៀបចំដោយក្រសួងសុខាភិបាល ដោយមានការយាមកាមពីកម្លាំងនគរបាលឬកងរាជអាវុធហត្ថអោយបានហ្មត់ចត់»។

លោកបញ្ជាក់ថា នេះគឺជាគន្លឹះក្នុងការឈានទៅបញ្ចប់ព្រឹត្តិការណ៍៣វិច្ឆិកាឱ្យបានឆាប់ និងដើម្បីកុំឱ្យកម្ទេចភ្លើងក្លាយជាអគ្គីភ័យតាមរយៈការធ្វេសប្រហែសរបស់អ្នកធ្វើចត្តាឡីស័ក៕