ភ្នំពេញ ៖ បឹងអូរអណ្តែង ស្ថិតនៅសង្កាត់បឹងធំ ខណ្ឌកំបូល រាជធានីភ្នំពេញ ត្រូវបានលុបអស់ស្ទើរទាំងស្រុងច ខណៈដែលពលរដ្ឋជាច្រើនគ្រួសារ តែងតែអាស្រ័យផលពីបឹងមួយនេះ។

លោក មឿន អួន ចៅសង្កាត់បឹងធំបានប្រាប់សារព័ត៌មានខ្មែរណាស់នៅល្ងាចថ្ងៃទី​២២​តុលានេះថា បឹងអូរអណ្តែងដែលមានទំហំប្រមាណជាង៣០ហិកតា ត្រូវបានផ្តល់ឲ្យក្រុមហ៊ុន ផាន អ៊ីម៉ិច ធ្វើការអភិវឌ្ឃ និងបានត្រូវគេចាក់ដីលុបតាំងពីដើមឆ្នាំ២០២០នេះ ដែលធ្វើឱ្យផ្ទៃបឹងនៅសល់ប្រហែល៣ហិកតាប៉ុណ្ណោះ។

លោកថា៖«ខ្ញុំមិនដឹងគេអភិវឌ្ឍធ្វើអ្វីទេ? បឹងនេះគេលុបក្នុងឆ្នាំហ្នឹង លុបអស់ហើយ លុប​សល់តែ២ទៅ៣ហិកតាទៀតទេ។ ពីមុនបឹងនេះពលរដ្ឋអាចយកទឹកប្រើប្រាស់ស្រោចស្រព​ផលដំណាំបាន»។

អនុក្រឹតចុះខែកក្កដាឆ្នាំ២០២០នេះ ដែលមានចុះហត្ថលេខាដោយសម្ដេចនាយករដ្ឋមន្រ្តី ហ៊ុន សែន បានបញ្ជាក់ថា រដ្ឋាភិបាលបានសម្រេចធ្វើអនុបយោគបឹងអូរអណ្តែងនេះទំហំ ៧៧.៨២២ ម៉ែត្រក្រឡា ពីទ្រព្យសម្បត្តិសាធារណៈរបស់រដ្ឋ ទៅជាទ្រព្យសម្បត្តិឯកជន ដើម្បីផ្ទេរទៅឲ្យរដ្ឋបាលរាជធានីភ្នំពេញគ្រប់គ្រងជាកម្មសិទ្ធិ។

លោក ម៉េត មាសភក្ដី មន្រ្តីនាំពាក្យសាលារាជធានី បានប្រាប់សារព័ត៌មានខ្មែរណាស់ថា លោកមិនបានដឹងអំពីការធ្វើអនុបយោគនេះទេ និងសុំពេលស្រាវជ្រាវរឿងនេះសិន៕