លោក ឃឹម ហ្វីណង់ អភិបាលស្រុកបន្ទាយស្រី ប្រកាសឲ្យប្រជាពលរដ្ឋទាំងអស់​នៅក្នុងស្រុកបន្ទាយស្រីជាពិសេសអ្នករស់នៅតាមបណ្តោយដងស្ទឹង បង្កើន​ការប្រុងប្រយត្ន័ខ្ពស់ ចំពោះហានិភ័យនៃជំនន់ទឹកភ្លៀងគំហុក(Flash Flood) ជៀសវាងមានគ្រោះថ្នាក់ជាយថាហេតុណាមួយ នៅព្រឹកថ្ងៃទី ១៨ ខែ តុលានេះ។

លោក អភិបាលស្រុកវ័យក្មេងរូបនេះ បានគូសបញ្ជាក់ថា ស្រុកបន្ទាយស្រីកំពុងទទួល​រងឥទ្ធិពល​នៃព្យុះដែលជាហេតុធ្វើអោយភ្លៀងធ្លាក់ជោក​ជាំនៅក្នុងតំបន់ផ្ទៃរងទឹក​ភ្លៀងភ្នំគូលែន ធ្វើឲ្យកម្ពស់ទឹកស្ទឹងបន្ទាយស្រីបានហក់ឡើងពីកម្ពស់៣,៣ម៉ែត្រ ដល់៥,៥ម៉ែត្រ ក្នុងរយៈពេលត្រឹមតែ២៤ម៉ោងចុងក្រោយនេះ។

បើតាមលោក ឃឹម ហ្វីណង់ បញ្ជាក់ថា ស្ថានភាពនេះស្ថិតនៅកៀកនឹងកម្រិត​ប្រកា​សអា​សន្ន(៦ម៉ែត្រ) ដែលនឹង​តម្រូវឱ្យមានការជម្លៀសប្រជាពលរដ្ឋនៅក្នុងតំបន់​មួយចំនួនទៅកាន់ទីទួលមានសុវត្ថិភាព។

លោក បន្តថា ផ្នែកខ្លះនៃផ្លូវកៅស៊ូលេខ៦៦ លេខ៦៧ និងផ្លូវគ្រួសក្រហម​មួយចំនួន​ទៀត ត្រូវបានទឹកហូរឆ្លងកាត់ និងហូរជន់លិចផ្ទះបងប្អូនប្រជាពលរដ្ឋ។ រហូត​មកដល់ពេលនេះ រដ្ឋបាលស្រុកបានសហការជាមួយកម្លាំងកងពលធំអន្តរាគមលេខ២ចំនួន៩០នាក់ ជួយជម្លៀសប្រជាពលរដ្ឋដែលជាប់គាំងដោយសារទឹកជំនន់ចំនួន ១១គ្រួសារនៅ​ក្នុងភូមិកំព្រហ្ម ឃុំឃុនរាម រួចមកហើយ។

អាជ្ញាធរមូលដ្ឋាននៅគ្រប់ភូមិឃុំទាំងអស់នៃស្រុកបន្ទាយស្រីកំពុងត្រៀមកម្លាំងអន្តរាគមន៍ និងដុតដៃដុតជើងកាយបើកមុខទឹក ព្រមទាំងតាមដានឃ្លាំមើលជាប្រចាំ​ចំពោះ​ស្ថានភាពវិវឌ្ឍនៃទឹកជំនន់ទឹកភ្លៀងនៅក្នុងស្រុកបន្ទាយស្រីបន្តទៀត។ នេះជាការ​បន្ថែមរបស់លោក អភិបាលស្រុក។

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បាន​បង្ហាញ​ថា គ្រោះទឹកជំនន់ បានសម្លាប់មនុស្សចំនួន ២៤នាក់ គិតត្រឹមថ្ងៃទី ១៧ ខែតុលា ក្នុងនោះក្មេងចំនួន ៨នាក់។ បើតាមរបាយការណ៍ មានរាជធានី-ខេត្តចំនួន ១៩ បាន​រងផលប៉ះពាល់ដោយទឹកជំនន់ក្នុងនោះ មានប្រជាពលរដ្ឋ ៦១, ៣៦៥គ្រួសាររង​ផល​ប៉ះពាល់ ក្នុងនោះមានជិត៨,០០០គ្រួសារ ត្រូវជម្លៀសទៅទីទួលសុវត្ថិភាព និងប៉ះពាល់ផ្ទះជិត៦ម៉ឺនខ្នង៕