អង្គការសុខភាពពិភពលោកបានលើកឡើងនៅក្នុងកិច្ចប្រជុំពិសេសរបស់ថ្នាក់ដឹកនាំរបស់​ខ្លួនមួយកាលពីថ្ងៃចន្ទថា មនុស្សម្នាក់ក្នុងចំណោម១០នាក់នៅជុំវិញពិភពលោក អាច​មាន​ឆ្លងជំងឺកូវីដ១៩។

ការលើកឡើងនេះ ខណៈតួលេខឆ្លងសកលដែលត្រូវបាន​គេ​រាយ​​ការណ៍មានចំនួន​៣៥​លាន​នាក់ ប៉ុន្តែអង្គការសុខភាពពិភពប៉ាន់ស្មានថា តួលេខ​ឆ្លង​ពិត​ប្រាកដ​អាច​មាន​ជិត​៨០០​លាននាក់ឯណោះ។

មន្ត្រីជាន់ខ្ពស់របស់អង្គការនេះ បាននិយាយថា ពិភពលោកកំពុង​ស្ថិត​នៅ​ក្នុង​ហា​និភ័យ ហើយក្នុងរយៈពេល១០ខែមកនេះ មិនទាន់មានសញ្ញាណាមួយ​អាច​បញ្ចប់​វា​បាន​នៅ​ឡើយ​។ ប្រទេសមួយចំនួនកំពុងប្រឈមជាមួយនឹងរលកទី២ និងខ្លះ​ស្ថិត​នៅ​ក្នុង​កម្រិត តួរលេខឆ្លងខ្ពស់។

លោក Mike Ryan នាយកប្រតិបត្តិនៃកម្មវិធីសុខភាពពិភពលោកបានប៉ាន់ស្មានថា ១០​%​ នៃចំនួនប្រជាជនពិភពលោកឆ្លងវីរុសនេះ ហើយការឆ្លងមេរោគនេះ គឺមានភាពខុស​គ្នា​នៅតាមបណ្ដាប្រទេសនានា ប៉ុន្តែពិភពលោកនៅតែប្រឈមនឹងហានិភ័យនៅឡើយ​។

លោកថា៖«យើងដឹងថាជំងឺរាតត្បាតនឹងបន្តវិវត្ត ប៉ុន្តែយើងក៏ដឹងដែរថា យើងមាន​ឧប​ករណ៍​ដែលធ្វើការដើម្បីទប់ស្កាត់ការចម្លងនិងជួយសង្គ្រោះជីវិត ហើយពួក​គេកំពុង​ស្ថិត​ក្នុង​ការគ្រប់គ្រងរបស់យើង‍‍‌‌‌‍‍‌‌‌‌‌។

ប្រធានអង្គការសុខភាពពិភពលោកTedros Adhanom Ghebreyesus បានអំពាវនាវ ឱ្យពិភពលោកសាមគ្គីគ្នានិងភាពជាអ្នកដឹកនាំដ៏រឹងមាំ ដើម្បីប្រឆាំងជំងឺរាតត្បាតនេះ។

លោកថា៖«ទោះបីជាប្រទេសទាំងអស់ត្រូវបានរងផលប៉ះពាល់ដោយវីរុសនេះក៏ដោយ យើងត្រូវតែចងចាំថា នេះគឺជាជំងឺរាតត្បាតនេះមិនទាន់ថមថយនៅឡើយ។ ប្រទេស​ចំនួន១០មាន អ្នកឆ្លងនិងស្លាប់ចំនួន៧០ភាគរយ ហើយមានតែប្រទេសចំនួន៣ប៉ុណ្ណោះ ដែលមានការឆ្លងនិងស្លាប់ពាក់កណ្ដាលនៃចំនួននៅទូទាំងពិភពលោក»។

យោងតាមការបូកសរុបពីសាកលវិទ្យាល័យ Johns Hopkinsបញ្ជាក់ថា មនុស្សជាង១​លាន​នាក់បានស្លាប់ដោយសារជំងឺកូវីដ បន្ទាប់ពីសហរដ្ឋអាមេរិក ឥណ្ឌា និងប្រេស៊ីល បានរាយការណ៍ករណីឆ្លងច្រើនបំផុត៕