អាជ្ញាធរបានឃាត់ខ្លួនគ្រូពេទ្យភូមិម្នាក់នៅស្រុក សំបូរ ខេត្តក្រចេះ ក្រោយចាក់​ថ្នាំ​ធ្វើ​ឲ្យ​កុមារ​អាយុ៣ខែស្លាប់ កាលពីថ្ងៃទី ២៧ ខែកញ្ញា។

លោក ប៊ុន ឈឿន អធិការនគរបាលស្រុកសំបូរ បានបញ្ជាក់ថា ​គ្រូពេទ្យឈ្មោះផាត់ ពិទូរ្យ ជាបុគ្គលិកមណ្ឌលសុខភាពស្រុក​សំបូរ និងមានបើកអាជីវកម្ម​ព្យាបាលឯកជន​នៅនិងផ្ទះ ត្រូវបាននគរបាលស្រុកធ្វើការឃាត់ខ្លួនភ្លាមៗតាមបញ្ជារបស់លោក កែវ សុជាតិ ព្រះរាជអាជ្ញាអមសាលាដំបូង​ បន្ទាប់ពីនគរបាល​ទទួល​បាន​បណ្តឹង​ពី​ឪពុក​ម្តាយ​របស់​ទារករងគ្រោះ។

ចំណែក លោក ឈ្នាង សុវុត្ថា ប្រធានមន្ទីរសុខាភិបាលខេត្តក្រចេះបានបញ្ជាក់ខ្លីថា លោក​មិន​ទាន់​ដឹង​ច្បាស់​អំពី​រឿង​នេះ​នៅ​ឡើយទេ ប៉ុន្តែលោកថា ឪពុកម្ដាយបាន​ចោទ​ប្រកាន់​គ្រូពេទ្យឈ្មោះ ផាត់ ពិទូត្យ ថាបានចាក់​ថ្នាំ​ធ្វើ​ឱ្យ​កូន​របស់​ពួក​គេ​ស្លាប់ ក្រោយ​មក​ទទួល​សេវាព្យាបាលជំងឺរលាកផ្លូវដង្ហើម៕