រថយន្តរបស់អង្គការសុខភាពពិភពលោកWHO ដែលដឹកសំណាកយកទៅតេស្តមេ​រោគកូវីដ១៩ បានរងការវាយប្រហារនៅក្នុងប្រទេសមីយ៉ាន់ម៉ា ដោយបណ្តាល​ឱ្យអ្នកបើកបរស្លាប់និងមន្ត្រីរដ្ឋាភិបាលម្នាក់រងរបួសធ្ងន់។

អង្គការសុខភាពពិភពលោកបានបញ្ជាក់ថា លោក Pyae Sone Win Maung អ្នក​បើកបរ​រថយន្តបានស្លាប់បន្ទាប់ពីការ​វាយប្រហារកាលពីថ្ងៃច័ន្ទនៅក្នុង​សង្កាត់​Minbya នៅភាគពាយព្យនៃរដ្ឋរ៉ាក់ឃីន។

សារព័ត៌មានReutersបានរាយការណ៍ថា រថយន្តនោះបានរងការបាញ់​ប្រហារពីខ្មាន់​កាំភ្លើង។ អង្គការសុខភាពពិភពលោកបាននិយាយនៅក្នុង​សេចក្តីថ្លែងការណ៍​មួយកាល​ពីថ្ងៃអង្គារថា ខ្លួនមានការសោកស្តាយយ៉ាងខ្លាំងចំពោះ​មរណភាព​របស់បុគ្គ​លិក នៅក្នុង​អំឡុងពេលឧប្បត្តិហេតុសន្តិសុខមួយនៅ​ក្នុងស្រុករ៉ាឃីន​នៃប្រទេសមីយ៉ាន់ម៉ា ។

លោក Poonam Khetrapal Singh នាយកអង្គការអាស៊ីអាគ្នេយ៍របស់អង្គការ​សុខភាព​ពិភពលោក បានថ្កោលទោសចំពោះអំពើហឹង្សាគ្រប់ប្រភេទមកលើរាងកាយ ពាក្យសំដី ឬផ្លូវចិត្ត ប្រឆាំងនឹងបុគ្គលិកសុខាភិបាល។

អគ្គលេខាធិការអង្គការសហប្រជាជាតិលោកAntónio Guterres បានថ្កោលទោស​យ៉ាងខ្លាំងចំពោះការវាយប្រហារនេះ ដោយបានសម្តែងសមានទុក្ខដល់​ក្រុមគ្រួសារ​នៃអ្នកស្លាប់ និងបានជូនពរឱ្យបានឆាប់ជាសះស្បើយដល់អ្នករងរបួស៕