ក្រុមហ៊ុន Pfizer និងមន្រ្តីសុខភាពសហព័ន្ធអាមេរិក កំពុងបើកស៊ើបអង្កេតមួយ បន្ទាប់​ពីមានបុគ្គលិកថែទាំអ្នកជំងឺម្នាក់បានស្លាប់ក្រោយពេលបានចាក់វ៉ាក់សាំងរបស់ក្រុម Pfizer បាន១៦ថ្ងៃ ប៉ុន្តែក្រុមហ៊ុន Pfizer បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារ៌ម្សិលមិញថា រហូតមកដល់ពេលនេះ ពុំទាន់មានភស្តុតាងបង្ហាញ ការស្លាប់របស់បុគ្គលិកសុខាភិបាលរូបនោះ ជាប់ពាក់ព័ន្ធនឹងការចាក់វ៉ាក់សាំងឡើយ។

បុគ្គលិកពេទ្យដែលមានមូលដ្ឋាននៅរដ្ឋផ្លរីដាបន្ទាប់ពីចាក់វ៉ាក់សាំងរួច បានវិវត្តទៅជាជំងឺ​ដ៏កម្រមួយដែលត្រូវបានគេហៅថាជំងឺឈាមរាវធ្ងន់ធ្ងរ(thrombocytopenia)ដែលបន្ថយសមត្ថភាពរបស់រាងកាយដើម្បីកំណកឈាម និងធ្វើឱ្យបញ្ឈប់ការហូរឈាមខាងក្នុងរាងកាយ។

ស្របពេលក្រុមហ៊ុន Pfizer អះអាងថា មិនមានភស្ដុតាងបង្ហាញពីការស្លាប់នេះជាប់ពាក់ព័ន្ធនឹងវ៉ាក់សាំង ប៉ុន្តែមជ្ឈមណ្ឌល​​ត្រួត​​ពិនិត្យ​និង​បង្កា​ជំងឺ​ឆ្លងCDCអាមេរិកបាននិយាយ​ថា ខ្លួនទទួលបានដំណឹងស្លាប់របស់បុគ្គលិកពេទ្យនេះ ហើយនឹងធ្វើការវាយតម្លៃតាមក្រោយ នៅពេលទទួលបានព័ត៌មានបន្ថែមទៀត។



ក្រុមហ៊ុនផលិតវ៉ាក់សាំង Pfizer បាននិយាយថា មកដល់ពេលនេះ មានមនុស្សរាប់លាននាក់បានចាក់វ៉ាក់សាំងរបស់ខ្លួន ហើយក្រុមហ៊ុនកំពុងតាមដានយ៉ាងដិតដល់នូវរាល់ព្រឹត្តការណ៍អវិជ្ជមានចំពោះបុគ្គលដែលបានចាក់វ៉ាក់សាំង។

វ៉ាក់សាំងការពារកូវីដ១៩ ដែលផលិតឡើងដោយក្រុមហ៊ុន Pfizer និងក្រុមហ៊ុនដៃគូ BioNTech ត្រូវបានអនុម័តឱ្យប្រើប្រាស់ជាលើកដំបូងនៅសហរដ្ឋអាមេរិកតាំងពីថ្ងៃ​ទី​១៤​ខែធ្នូឆ្នាំមុន ដែលបានចាក់ឱ្យអ្នកបម្រើការមើលថែអ្នកជំងឺ និងគ្រូពេទ្យបម្រើការនៅក្នុង​បន្ទប់សង្គ្រោះបន្ទាន់មុនគេ។​ មកដល់ពេលនេះ មានវ៉ាកសាំងរបស់ក្រុមហ៊ុន Pfizer និង​ក្រុមហ៊ុន Moderna ជាង៩លានម្ជុរត្រូវបានចាក់៕