លោក រស់ សុវាចា មន្រ្តីនាំពាក្យក្រសួងអប់រំ យុវជន និងកីឡាបានប្រាប់​សារព័ត៌​មានខ្មែរណាស់ថា ក្រសួងនឹងអនុវត្តតាមការសម្រេចរបស់ប្រមុខរដ្ឋាភិបាល ដើម្បីរៀប​ចំបើកដំណើរ​ការសាលារៀនឡើងវិញនៅ​រាជធានីភ្នំពេញនិងទីរួមខេត្តក​ណ្ដា​ល ក្រោយបិទបញ្ចប់ព្រឹត្តការណ៍៣វិច្ឆិកា។

អង្គភាពក្រោមឱវាទក្រសួងអប់រំ យុវជន និងកីឡា ដែលពាក់ព័ន្ធនឹងព្រឹត្តិការណ៍​០៣​វិច្ឆិកា​ទាំង២៤ ក្នុងនោះមានសាលារៀនរដ្ឋចំនួន៩ សាលារៀនឯកជនចំនួន១០ មន្ទីរអប់រំចំនួន៤ និងក្លឹបហាត់កីឡាចំនួន១នៅពហុកីឡដ្ឋានជាតិអូឡាំពិក ត្រូវបានបិទជាបន្តបន្ទាប់ក្រោយមានអ្នកពាក់ព័ន្ធនឹងព្រឹត្តការណ៍៣វិច្ឆិកា។

សម្ដេច ហ៊ុន សែន បានលើកឡើងតាមហ្វេសប៊ុកនៅព្រឹកមិញថា នៅរាជធានីភ្នំពេញ​មានមនុស្សចំនួន១៥៦៩នាក់ ក្នុងនោះមាន៤នាក់ធ្វើតេស្ដវិជ្ជមានកូវី និងខេត្តកណ្តាល​មានចំនួន៦៧នាក់ ដែលបានពាក់ព័ន្ធនឹងព្រឹត្តការណ៍៣វិច្ឆិកា។



សម្ដេចបញ្ជាក់ថា ព្រឹត្តការណ៍៣វិច្ឆិកានេះ នឹងបញ្ចប់នៅភ្នំពេញនិង​ខេត្តកណ្ដាល​នៅថ្ងៃទី១៩វិច្ឆិកា ក្រោយអ្នកប៉ះពាល់ទាំងអស់បាន​ចត្តាឡីស័កតាមការកំណត់​របស់ក្រសួងសុខាភិបាល។

សម្ដេចថា៖«ការបញ្ចប់ព្រឹត្តិការណ៍៣វិច្ឆិកា សំដៅឱ្យក្រសួងអប់រំយុវជននិងកីឡា និងក្រសួងការងារនិងបណ្តុះបណ្តាលវិជ្ជាជីវៈរៀបចំបើកសាលារៀន និងសាលាប​ណ្តុះបណ្តាលវិជ្ជាជីវៈឡើងវិញ ព្រមទាំង​ធ្វើឱ្យសភា​ពការណ៍​គ្រប់ផ្នែកគ្រប់​វិស័យវលទៅរកភាពប្រក្រតីដូចមុនថ្ងៃ០៣​វិច្ឆកា​ឡើងវិញ តែការប្រយុទ្ធជាមួយកូវីដ​១៩នៅតែជាអាទិភាពនៃការងាររបស់យើងទាំងអស់គ្នាដដែល»៕