នៅថ្ងៃទី២០វិច្ឆិកា លោកវេជ្ជបណ្ឌិត តាក់កឺស៊ី កាសៃ (Takeshi Kasai) អគ្គនាយកអង្គ​ការ​សុខភាពពិភពលោកប្រចាំតំបន់ប៉ាស៊ីហ្វិកខាងលិច លោកស្រី វេជ្ជបណ្ឌិត លី អាយ​លែន (Li Ailan) តំណាងអង្គការសុខភាពពិភពលោកនៅកម្ពុជា បានសរសេរបង្ហោះតាមបណ្ដាញទំនាក់ទំនងធ្វីតទឺ (Twitter) ដើម្បីអបអរកម្ពុជាដែលទប់ស្កាត់បានមិនឱ្យជំងឺ​កូវីដ​១៩ឆ្លងរាលដាលដោយសារព្រឹត្តការណ៍៣វិច្ឆិកា។

លោក តាក់កឺស៊ី កាសៃ បានសរសេរថា៖«សុខភាពសមូហភាពគឺផ្អែកលើការដឹកនាំរឹងមាំនិងសកម្មភាពបុគ្គល។ ខ្ញុំសូមកោតសរសើរប្រទេសកម្ពុជាចំពោះសកម្មភាពដែលកើតពីការសម្រេចចិត្ត ដើម្បីគ្រប់គ្រងការឆ្លងជាចង្កោម ដែលត្រូវបានភ្ជាប់ទៅនឹងដំណើរទស្សន​កិច្ចការទូតនៅថ្ងៃទី៣វិច្ឆិកា និងថ្នាក់ដឹកនាំរដ្ឋាភិបាលដែលបានយកគំរូតាមការអនុវត្តសុខភាពសាធារណៈបានល្អ»។

ចំណែកលោកស្រី លី អាយលែន បានសរសេរដែរថា៖«អបអរសាទរប្រទេសកម្ពុជាដែលបានគ្រប់គ្រងព្រឹត្តិការណ៍កូវីដ១៩នៅថ្ងៃ៣វិច្ឆិកាបានយ៉ាងល្អ ដើម្បីបន្តធ្វើឱ្យកម្ពុជាមានសុវត្ថិ​ភាព។ ការរកឃើញឆាប់រហ័ស ការឆ្លើយតបយ៉ាងរហ័សជាមួយនឹងអន្តរាគមន៍ដែលមានគោល​ដៅ គឺចាំបាច់ចំពោះជោគជ័យនេះ»។

ពាក់ព័ន្ធនឹងព្រឹត្តការណ៍៣វិច្ឆិកានៃការធ្វើដំណើរទស្សនកិច្ចរបស់រដ្ឋមន្រ្តីការបរទេសនិងពាណិជ្ជកម្មហុងគ្រីមកកម្ពុជា គឺបានធ្វើឱ្យមនុស្ស៤នាក់ ក្នុងនោះជាមន្រ្តីជាន់ខ្ពស់២​នាក់​បានឆ្លងជំងឺកូវីដ១៩​ ខណៈមនុស្សជាង១ពាន់៤រយនាក់ផ្សេងទៀត ដែលមានទាំងនាយ​ករដ្ឋមន្រ្តី និងរដ្ឋមន្រ្តីជាច្រើនរួបផ្សេង ត្រូវបានធ្វើតេស្ដនិងធ្វើចត្តាឡីស័ក១៤។



នាយករដ្ឋមន្រ្តីបានប្រកាសបិទបញ្ចប់ព្រឹត្តការណ៍៣វិច្ឆិកានេះកាលពីថ្ងៃទី១៨វិច្ឆិកា គឺក្រោយពីមនុស្សជាង១ពាន់៤រយនាក់បានធ្វើតេស្ដលើកទី៤និងជាលើកចុងក្រោយអវិជ្ជ​មាន។

កម្ពុជាបានចាត់ទុកការឆ្លងកាត់ព្រឹត្តការណ៍៣វិច្ឆិកា ថាជាការឆ្លងកាត់ដំណាក់កាលស្មុគស្មាញមួយដែលមានហានិភ័យខ្ពស់នៃការចម្លងវីរុសកូវីដ១៩។

គិតត្រឹមថ្ងៃទី២១ ខែវិច្ឆិកានេះ កម្ពុជាមានអ្នកឆ្លងជំងឺកូវីដ១៩ចំនួន ៣០៥នាក់ ក្នុងនោះជាសះស្បើយមានចំនួន ២៩៥ នាក់ ចំណែកអ្នកសម្រាកព្យាបាលនៅមន្ទីរពេទ្យមិត្ត​ភាពខ្មែរនិងសូវៀតចំនួន៨នាក់ និងនៅមណ្ឌលសុខភាពចាក់អង្រែចំនួន ២នាក់៕